Akwụkwọ Ozi Si Ireland

Ịchọsi Ndị Nwere Mmasị n’Okwu Chineke Ike

CHI taa efoola, obere mmiri na-ezonụ emeekwala ka o siere m ike isi n’ime ụgbọala m na-ahụ ihe na-emenụ n’ime ime obodo a m na-agbafe. Mgbe m gbara kilomita iri na isii, erutere m n’ugwu dị nso na Westport, bụ́ obere obodo dị n’ụsọ oké osimiri n’ebe ọdịda anyanwụ Ireland. Mgbe e mechara, anwụ chawara, ijiriji ekupụchaa, mụ amalitezie ịhụ ọtụtụ obere ala mara mma, ndị mmiri gbara gburugburu, dị nso n’ebe ahụ. Ọ bụ ala ole na ole n’ime ala ndị ahụ mmiri gbara gburugburu ka ndị mmadụ bi. Ma, ndị na-akpa anụ n’ebe a na-eji ụgbọ mmiri ebuga anụ ụlọ ha n’ụfọdụ ala ndị ahụ mmiri gbara gburugburu ka ha taa ahịhịa.

E nwere ọtụtụ ugwu n’ebe ọdịda anyanwụ nke ụsọ oké osimiri ahụ. Ugwu ndị ahụ nọ na-acha nzu nzu n’ehihie a anwụ na-acha. Ugwu kasị elu n’ebe a bụ Croagh Patrick, bụ́ ugwu ọnụ ya pịrị apị nke ndị obodo a na-akpọ Reek. Ejisiri m ike nyara ụgbọala m gafesịa okporo ámá ndị dị na Westport, bụ́ ndị dị warara ma na-ekwo ekwo, gafeekwa ugwu Reek, gawazie n’ebe Ndịàmà Jehova na-anaghị agakarị ozi ọma.

Nwoke m chọ na-aga amaghị na m na-abịa taa. Enwetara m akwụkwọ ozi kwuru na ọ kwatara ebe a n’oge na-adịbeghị anya, nakwa na ọ chọrọ ka Ndịàmà maliteghachi ịkụziri ya Baịbụl. Anọ m na-eche, sị: ‘Ọ̀ dị afọ ole? Ọ̀ lụọla nwaanyị ka ọ̀ bụ okokporo? Olee ụdị ihe ndị na-amasị ya?’ Elere m akpa m anya, na-eche ma m̀ jikwa Baịbụl na ụdị akwụkwọ dị iche iche e ji amụ Baịbụl. Anọ m na-eche ihe m nwere ike ikwu iji mee ka o nwekwuo mmasị n’ozi ọma Alaeze Chineke.

Agbafeela m Reek ugbu a. Mgbidi ndị e ji naanị nkume rụọ, bụ́ ndị a rụrụ ọtụtụ n’ime ha n’oge Oké Ụnwụ e nwere n’ihe dị ka otu narị afọ na iri ise gara aga, dịgasị n’ala ubi tọgbọ chakoo bụ́ ndị dịịrị ruo n’osimiri. Mgbe m leliri anya elu, lekwa otu nnụnụ mmiri ebe ọ gbasara nku ya, ikuku eburu ya na-aga! E nwegasịrị osisi ndị ifufe hịgọrọ n’ihu ihu.

Ụlọ ndị dị n’ime obodo a enweghị nọmba, okporo ámá ndị dị na ya enweghịkwa aha. Adres e nyere m iji chọta ụlọ nwoke ahụ bụ naanị aha ụlọ ya na mpaghara ebe ọ dị. Ma, ihe mbụ m chọrọ ime bụ ịchọta onye ga-amarịrị ebe mmadụ niile bi, ya bụ, onye na-ekesa akwụkwọ ozi. Mgbe nkeji iri atọ gasịrị, achọtara m post ọfịs obodo ahụ, bụ́ otu ọnụ ụlọ dị  n’otu ogologo ụlọ nwere ọtụtụ ọnụ ụlọ. N’ihe e kowere n’ọnụ ụzọ ya, e dere, sị, “Anyị Emechiela.” N’agbanyeghị nke ahụ, ajụrụ m ajụjụ n’otu ụlọ ahịa dị n’ebe ahụ, a gwa m mpaghara ebe ụlọ ahụ dị.

Mgbe m gbara kilomita asatọ ọzọ, ahụrụ m ebe m na-achọ, ya bụ, ebe ụzọ hịgọrọ banye n’aka nri, obere ụzọ ọzọ abanyekwa n’aka ekpe ya. Akụrụ m aka n’ọnụ ụzọ nke otu ụlọ dị nso n’ebe ahụ. Otu agadi nwaanyị pụtara ma tuoro m ọnụ na ya biwere ebe a mgbe ya dị obere, ma, o wutere ya mgbe ọ chọpụtara na ya amaghị otú m ga-esi achọta nwoke ahụ m na-achọ. Ọ sịrị m bata ka ya kpọọ mmadụ na telefon.

Ka ya na onye ahụ na-ekwu na telefon, ọ nọ na-ele m anya, o dokwara m anya na ọ nọ na-eche onye m bụ na ihe m na-achọ. Ahụrụ m obere ihe oyiyi Meri n’akụkụ ọnụ ụzọ ya, hụkwa nnukwu foto Kraịst n’ahụ́ ájá. Chaplet chịsa n’elu tebụl kichin ya. Iji mee ka obi ruo ya ala, asịrị m ya, “E nwere ozi dị mkpa ndị enyi ya sị m zie ya.”

Di ya batara kọwara m akụkọ obodo ahụ. Ma, ọ dịghị ihe nwaanyị ahụ jụtara onye mbụ ọ kpọrọ na fon, ya asị m chere ka ya kpọọ ndị ọzọ. O yiri ka ọ dịghị onye nụtụrụla banyere nwoke ahụ ma ọ bụ ụlọ ahụ. Elere m ihe na-akụnụ. Chi ejiwela. Achọpụtara m na m ga-edowe ya ụbọchị ọzọ. Ekelere m ha abụọ maka enyemaka ha, banyeghachi n’ụgbọala m lawa.

Abịaghachiri m n’izu so ya. Na nke ugbu a, ahụrụ m nwoke ahụ na-ekesa akwụkwọ ozi, ya akọwaara m nke ọma otú m ga-esi enweta ebe m na-achọ. Mgbe nkeji iri na ise gasịrị, ahụrụ m ebe ọ gwara m na m ga-ahụ ụzọ abụọ gaferịtara. Abanyere m n’aka ekpe, gbara ụzọ ahụ ruo n’isi, gbarakwa ya lọghachi, na-achọ ihe ọzọ ọ sịrị na m ga-ahụ, ya bụ, àkwà mmiri ochie e ji nkume rụọ. Ahụghị m ya. N’ikpeazụ, ahụrụ m àkwà mmiri ahụ, lepụzie anya, lekwa ụlọ ahụ m nọ na-achọ kemgbe n’elu ugwu!

Akwụsịtụrụ m chee echiche otú m ga-esi zie ozi ọma ma m ruo ebe ahụ. Ọ bụ otu agadi nwoke ka m hụrụ n’ụlọ ahụ. Ọ gwara m, sị, “Ewela iwe, lee ụlọ ị na-achọ ebe ahụ.” Ọ tụụrụ m aka n’otu ụlọ osisi nọchiri. Agara m ebe ahụ, kụọ aka n’ọnụ ụzọ, na-atụ anya ịhụ onye m na-achọ. Ka m na-eche ka mmadụ pụta, elere m anya n’Oké Osimiri Atlantic dị nso n’ebe ahụ. Ikuku efesiwela ike, ebili mmiri nọkwa na-enupụta mmiri na-enwu ọcha n’ụsọ oké osimiri ahụ a na-emetọghị emetọ. Ọ dịghị onye m na-ahụ, ọ dịghịkwa onye nọ n’ụlọ ahụ m kụrụ aka.

Agara m ebe ahụ ugboro abụọ ọzọ tupu mụ ahụ otu nwa okorobịa. O kwuru, sị: “Ọ bụ ụlọ a, ma, nwoke ahụ ị na-achọ, bụ́ onye bibu na ya, akwapụla, amakwanụghị m ebe o bizi.” Akọwaara m ya ihe mere m ji bịa, chọpụtakwa na nwa okorobịa a na Ndịàmà Jehova ekwutụbeghị okwu. E nweela mgbe e zuru ya ohi, ọ nọkwa na-eche ihe mere Chineke ji kwere ka ụdị ihe a na ihe ọjọọ ndị ọzọ na-eme. M nyere ya magazin Ụlọ Nche na Teta! ndị ọhụrụ zara ajụjụ ahụ, ọ nakwaara ha ozugbo.

Akwụkwọ Nsọ nyere anyị iwu ịchọsi ndị nwere ezi obi ike. O wutere m na ahụghị m nwoke ahụ m nọ na-achọ. Ma, echetụdịghị m na mgbalị m furu ọhịa. Na Ireland, ịnụ ozi ọma Alaeze Chineke na-agụ ọtụtụ ndị agụụ. Site n’enyemaka Jehova, obere mkpụrụ nke eziokwu Baịbụl ahụ a kụrụ n’obi nwa okorobịa ahụ nwere ike ịmị mkpụrụ otu ụbọchị.