Ịchọ Eziokwu Banyere Eluigwe

ICHE echiche ịga eluigwe nwere nnọọ ike ime mmadụ obi ụtọ! Ndị Alakụba, ndị Hindu, ndị Buda, ndị chọọchị Krisendọm, na ọtụtụ ndị na-enwedịghị mmasị n’okpukpe kwechaara na mmadụ na-adị ndụ mgbe ọ nwụchara. A na-elekarị eluigwe anya dị ka ebe mara mma na ebe a na-ekpori ndụ, bụ́ ebe ndị mmadụ na-agaghị ata ahụhụ nakwa ebe ha na “ndị ha hụrụ n’anya nwụrụ anwụ ga-ahụ ọzọ.” N’agbanyeghịkwa nke ahụ, n’ebe ihe ka ọtụtụ n’ụmụ mmadụ nọ, ilu ochie a bụ eziokwu: Onye ọ bụla chọrọ ịga eluigwe, ma o nweghị onye chọrọ ịnwụ iji gaa ebe ahụ. Olee ihe mere o ji dị otú ahụ?

A sị na e kere anyị ịnwụ ma gawa eluigwe, ọ́ gaghị na-agụkwu ọtụtụ ndị agụụ otú ahụ o si agụ nwatakịrị agụụ ito eto na otú o si agụ nwa okorobịa ma ọ bụ nwa agbọghọbịa ịlụ di ma ọ bụ nwunye? Ma, ihe ka ọtụtụ n’ụmụ mmadụ achọghị ịnwụ anwụ.

N’agbanyeghị nke ahụ, ndị ụkọchukwu na-ekwu na eluigwe bụ ebe e kere anyị ibi ma anyị nọtụchaa obere oge n’ụwa. Dị ka ihe atụ, a sịrị na Tiodọ Edga Kadinal MakKarik, bụ́ achịbishọp nke Wọshịntịn Diisi nke larala ezumike nká, kwuru, sị: “Ụdị ndụ anyị dị ugbu a abụghị ihe mere e ji kee anyị. E kere anyị ibi n’eluigwe.” N’otu aka ahụ, onye bụ́bu president nke Òtù Ndị Ụka Mgbasa Ozi Ọma nke Mba Amerịka, kwuru, sị: “Ihe mere anyị ji dịrị ndụ bụ inye Chineke otuto na ịga eluigwe . . . n’ihi na eluigwe bụ ụlọ anyị.”

Ndị kweere na mmadụ na-aga eluigwe mgbe ọ nwụchara na-ekwerekarị ya n’ihi na ha amachaghị ihe banyere eluigwe. Jọọjị Bana, bụ́ president nke otu ụlọ ọrụ na-enyocha nkụzi okpukpe, chọpụtara na ihe ọtụtụ mmadụ kweere banyere “ndụ a na-adị ugbu a na mgbe a nwụchara” si n’ebe dị iche iche, dị ka na fim, egwú na akwụkwọ ọgụgụ. E kwuru na otu pastọ chọọchị Episkopal na Flọrịda, kwuru, sị: “Ọ dịghị ihe anyị maara banyere eluigwe ma ọ́ bụghị na eluigwe bụ ebe Chineke bi.”

Ma, eluigwe bụ ebe dị mkpa e kwuru okwu ya na Baịbụl. Olee otú Okwu Chineke kwuru na eluigwe dị? È kere mmadụ ibi n’eluigwe? Ọ bụrụ na ọ dị ndị ga-aga eluigwe, olee ihe ha na-aga ime?

[Ihe odide gbatụrụ okpotokpo dị na peeji nke 3]

Olee ihe mere ọtụtụ mmadụ ji achọ ịga eluigwe, ma ya abụrụ naanị mmadụ ole na ole chọrọ ịnwụ iji gaa ebe ahụ?