Ihe Jizọs Kụziri Banyere Onwe Ya
Ihe Jizọs Kụziri Banyere Onwe Ya
“Jizọs anọtụghị ná mgbagwoju anya banyere onye ọ bụ, ebe o si bịa, ihe mere o ji bịa n’ụwa, na ihe na-eche ya n’ọdịnihu.”—ONYE EDEMEDE BỤ́ HABAT LỌKYA.
TUPU anyị ekwere ma nwee okwukwe n’ihe ndị Jizọs kụziri, ọ dị anyị mkpa ịma ihe banyere ya. Ònye ka Jizọs bụ n’ezie? Olee ebe o si bịa? Gịnị bụ nzube ya ná ndụ? N’Oziọma ndị dị na Baịbụl—Matiu, Mak, Luk, na Jọn—anyị ga-anụ azịza ha n’ọnụ Jizọs.
Ọ dịrị ndụ tupu a mụọ ya n’ụwa Ọ dị mgbe Jizọs kwuru, sị: “Tupu a mụọ Ebreham, mụ onwe m adịrịla ndụ.” (Jọn 8:58) Ebreham dịrị ndụ ihe dị ka puku afọ abụọ tupu a mụọ Jizọs. N’agbanyeghị nke ahụ, Jizọs dịdị ndụ tupu a mụọ nna ochie ahụ bụ́ onye ezi omume. Ma, olee ebe Jizọs bibu tupu ya abịa n’ụwa? O kwuru, sị: “Esi m n’eluigwe bịa.”—Jọn 6:38.
Ọkpara Chineke Jehova nwere ọtụtụ ụmụ bụ́ ndị mmụọ ozi. Ma, Jizọs pụrụ iche. Ọ kpọrọ onwe ya “Ọkpara Chineke mụrụ naanị ya.” (Jọn 3:18) Okwu ahụ pụtara na Jizọs bụ naanị onye Chineke kere n’onwe ya. Ọ bụ Ọkpara a a mụrụ naanị ya ka Chineke ji kee ihe ndị ọzọ niile.—Ndị Kọlọsi 1:16.
“Nwa nke mmadụ” Jizọs kpọrọ onwe ya aha a karịa aha ọ bụla ọzọ. (Matiu 8:20) O si otú a gosi na ya abụghị mmụọ ozi nwoghara enwogha ma ọ bụ Chineke bịara n’anụ ahụ́. Kama nke ahụ, ọ bụ nnọọ mmadụ. Chineke ji mmụọ nsọ ya si n’eluigwe budata ndụ Ọkpara ya n’ụwa, mee ka nwa agbọghọ na-amaghị nwoke bụ́ Meri dịrị ime. N’ihi ya, a mụrụ Jizọs dị ka mmadụ zuru okè nke na-enweghị mmehie ọ bụla.—Matiu 1:18; Luk 1:35; Jọn 8:46.
Mesaya e kwere ná nkwa Otu nwaanyị Sameria gwara Jizọs, sị: “Amaara m na Mesaya na-abịa.” Jizọs sịrị ya: “Ọ bụ mụ onwe m nke na-agwa gị okwu bụ ya.” (Jọn 4:25, 26) Okwu ahụ bụ́ “Mesaya” na okwu bụ́ “Kraịst” pụtara “Onye E Tere Mmanụ.” Chineke tere Jizọs mmanụ, ma ọ bụ họpụta ya, ịrụ ọrụ pụrụ iche iji mezuo nkwa Chineke.
Isi ihe mere o ji bịa Ọ dị mgbe Jizọs kwuru, sị: “Aghaghịkwa m izisara obodo ndị ọzọ ozi ọma alaeze Chineke, n’ihi na ọ bụ nke a mere e ji zite m.” (Luk 4:43) Ọ bụ ezie na o meere ndị nọ ná mkpa ọtụtụ ihe ọma, isi ihe o ji ndụ ya mee bụ ikwusa Alaeze Chineke. Anyị ga-atụle ihe ndị ọ kụziri banyere Alaeze ahụ ma e mechaa.
O doro anya na Jizọs bụ mmadụ pụrụ iche. * Anyị ga-emecha hụ na ndụ o biri n’eluigwe mere ka okwu ndị o kwuru n’ụwa bakwuo uru. Ọ̀ bụ ihe ijuanya na o kwusara ozi ga-emetụta ndụ ọtụtụ nde mmadụ gburugburu ụwa?
[Ihe e dere n’ala ala peeji]
^ par. 9 Ọ bụrụ na ị chọrọ ịmatakwu banyere Jizọs na ọrụ ọ na-arụ n’imezu nzube Chineke, gụọ isi 4 nke akwụkwọ bụ́ Gịnị n’Ezie Ka Bible Na-akụzi? nke Ndịàmà Jehova bipụtara.