Jizọs Kraịst—Otú Ozi Ya Metụtaruru Ndị Mmadụ

“O doro anya na ihe akaebe kacha adịgide adịgide e nwere banyere onye amamihe ahụ si Kapaniọm bụ na ndị mmadụ ka na-ege ya ntị ma na-erubere ya isi n’ihi otú okwu ya si eru ha n’ahụ́.” *—ONYE EDEMEDE BỤ́ GREG ISTABRUK.

OKWU ọnụ na-akpa ike. Okwu amamihe e chere echiche kwuo nwere ike iru n’obi, mee ka e nwee olileanya ma gbanwee ndụ. Ọ dịtụbeghị onye okwu ọnụ ya kpara ike karịa nke Jizọs Kraịst. Otu onye nke nụrụ mgbe Jizọs ziri Ozizi Elu Ugwu a ma ama ugbu a mechara dee, sị: “Mgbe Jizọs kwusịrị okwu ndị a, otú o si ezi ihe juru ìgwè mmadụ ahụ anya.”—Matiu 7:28.

Ruo taa, ụmụ mmadụ gburugburu ụwa maara ọtụtụ ihe Jizọs kwuru. Ka anyị tụlee ole na ole n’ime okwu ndị bara uru o kwuru.

“Unu apụghị ịbụ ndị ohu Chineke na nke Akụnụba.”—Matiu 6:24.

“Ya mere, ihe niile unu chọrọ ka ndị mmadụ na-emere unu, unu onwe unu aghaghị imere ha otú ahụ.”—Matiu 7:12.

“Kwụọnụ Siza ihe Siza, ma kwụọnụ Chineke ihe Chineke.”—Matiu 22:21.

“A na-enweta obi ụtọ ka ukwuu n’inye ihe karịa ka a na-enweta n’ịnara ihe.”—Ọrụ 20:35.

Ma, ihe Jizọs mere abụghị naanị ikwu okwu ndị a na-anaghị echefu echefu. Ozi o kwusara kpara ike n’ihi na o mere ka ndị mmadụ mara eziokwu banyere Chineke, kụziere ha otú ha ga-esi nwee ezi obi ụtọ ná ndụ, meekwa ka ha mara nnọọ ihe ga-akwụsị ahụhụ niile ụmụ mmadụ na-ata, ya bụ, Alaeze Chineke. Ka anyị na-atụle ozi a na peeji ndị na-esonụ, anyị ga-ahụ ihe mere ọtụtụ nde mmadụ ka ji ‘na-ege Jizọs ntị ma na-erubere ya isi n’ihi otú okwu ya si eru ha n’ahụ́.’

[Ihe e dere n’ala ala peeji]