Otú Mmadụ Nwere Ike Isi Bụrụ Ezigbo Onye Kraịst na Ezigbo Nwa Amaala

GỊNỊ bụ ihe abụọ dị mkpa Jizọs mere mgbe ọ na-ekwusa ozi ọma? Nke mbụ bụ na ọ gbalịrị inyere ndị mmadụ aka ka ha gbanwee otú ha si ebi ndụ, ọ bụghị ịgbanwe ọchịchị. Dị ka ihe atụ, ọ dị ihe Jizọs kwusiri okwu ya ike n’ozizi ahụ ọ nọ n’elu ugwu zie. Tupu ya ekwuo na ndị na-eso ụzọ ya kwesịrị ịbụ nnu na ìhè, ọ gwara ndị na-ege ya ntị na ndị nwere ezigbo obi ụtọ bụ “ndị maara mkpa ime mmụọ ha.” O kwukwara, sị: “Obi ụtọ na-adịrị ndị dị nwayọọ n’obi, . . . ndị dị ọcha n’obi, . . . ndị na-eme udo.” (Matiu 5:1-11) Jizọs nyeere ndị na-eso ụzọ ya aka ịghọta na ha kwesịrị ịkpọ ihe Chineke kpọrọ asị asị ma na-eme ihe ndị dị Chineke mma. Ha kwesịkwara iji obi ha niile na-ejere Chineke ozi.

Nke abụọ bụ na mgbe Jizọs hụrụ ndị na-ata ahụhụ, o meteere ha ebere ma mee ka ahụhụ ha na-ata belata. Ma mkpa ya mgbe ahụ abụghị ime ka ndị mmadụ kwụsị ịta ahụhụ. (Matiu 20:30-34) Ọ gwọrọ ndị ọrịa, ma o meghị ka ndị mmadụ kwụsị ịrịa ọrịa. (Luk 6:17-19) O nyeere ndị a na-emegbu emegbu aka, ma ndị mmadụ ka na-ata ahụhụ n’ihi ikpe na-ezighị ezi. O nyere ndị agụụ na-agụ nri, ma agụụ ka na-anyụ ndị mmadụ ịkpakwụ.—Mak 6:41-44.

Jizọs Mere Ka Ndị Mmadụ Na-akpa Àgwà Ọma ma Belata Ahụhụ Ha Na-ata

Gịnị mere na mkpa Jizọs abụghị ịgbanwe ọchịchị ma ọ bụ ịkwụsị ahụhụ kpamkpam, kama ya abụrụ ime ka ndị mmadụ na-akpa àgwà ọma na ibelata ahụhụ ha na-ata? Jizọs maara na Chineke bu n’obi iji Alaeze Ya bibie ọchịchị ụmụ mmadụ ma kwụsị ihe niile na-akpata ahụhụ ndị mmadụ na-ata. (Luk 4:43; 8:1) N’ihi ya, mgbe ndị na-eso ụzọ Jizọs chọrọ ka o jirikwuo oge ya na-agwọ ndị ọrịa, Jizọs gwara ha, sị: “Ka anyị gaa ebe ọzọ, n’obodo nta ndị dị nso, ka m wee kwusaakwa ozi ọma n’ebe ahụ, n’ihi na ọ bụ n’ihi nzube a ka m ji bịa.” (Mak 1:32-38) Jizọs belatara ahụhụ ọtụtụ ndị mmadụ na-ata, ma ihe bụ́ mkpa ya bụ ikwusara ndị mmadụ ozi ọma na ịkụziri ha Okwu Chineke.

Ndịàmà Jehova na-eme ihe ahụ Jizọs mere mgbe ha na-ekwusa ozi ọma. Ha na-enyere ndị mmadụ aka, si otú ahụ na-eme ka ahụhụ ndị mmadụ na-ata belata. Ma mkpa Ndịàmà Jehova abụghị ịkwụsịcha ahụhụ ndị mmadụ na-ata. Ha kwetara na ọ bụ Alaeze Chineke ga-akwụsị ihe niile na-akpata ahụhụ ndị mmadụ na-ata. (Matiu 6:10) Ndịàmà Jehova na-eme ka Jizọs, ya bụ, mkpa ha abụghị ịgbanwe ọchịchị kama ọ bụ ime ka ndị mmadụ na-akpa àgwà ọma. Ihe a ha na-eme na-enyere ndị mmadụ aka n’eziokwu, n’ihi na ihe kacha akpatara ndị mmadụ nsogbu abụghị ọchịchị, kama ọ bụ àgwà ndị mmadụ.

Ezigbo Ụmụ Amaala

Ndịàmà Jehova ghọtakwara na ha kwesịrị ịbụ ezigbo ụmụ amaala. N’ihi ya, ha na-erubere ndị ọchịchị isi. Ha na-eji akwụkwọ ndị ha na-ebipụta na ozi ọma ha na-ekwusa enyere ndị mmadụ aka irubere ndị ọchịchị isi. Ma, mgbe ndị ọchịchị gwara Ndịàmà Jehova mee ihe Chineke sịrị ha emela, Ndịàmà Jehova anaghị ekwe. Ha ‘na-erubere Chineke isi dị ka onye na-achị achị karịa mmadụ.’—Ọrụ 5:29; Ndị Rom 13:1-7.

 Ndịàmà Jehova na-akụziri ndị niile bi n’obodo ha Baịbụl n’efu. Ihe a ha na-akụziri ndị mmadụ emeela ka ọtụtụ nde mmadụ kwụsị àgwà ọjọọ. Ha na-enyere ọtụtụ puku mmadụ aka kwa afọ ịkwụsị àgwà ọjọọ ndị dị ka ịṅụ sịga, ịṅụbiga mmanya ókè, ịṅụ ọgwụ ọjọọ, ịgba chaa chaa na ịkwa iko. Ndị a ha nyeere aka aghọọla ezigbo ụmụ amaala n’ihi na ha amụtala ihe Baịbụl kwuru ma na-eme ya eme.—Gụọ isiokwu bụ́ “Baịbụl Na-agbanwe Ndụ Ndị Mmadụ,” bụ́ nke dị na peeji nke 18 na magazin a.

Ihe ọzọ bụ na ihe Ndịàmà Jehova na-akụziri ndị mmadụ na-eme ka ndị niile nọ n’ezinụlọ na-akwanyere ibe ha ùgwù ma na-emekọ ihe ọnụ, ma di na nwunye, ma nne na nna na ụmụ ha, ma ụmụaka na ụmụaka ibe ha. Ihe ndị a na-eme ka ezinụlọ dịkwuo ná mma. Ọ bụrụ na ezinụlọ dị iche iche e nwere n’obodo adị mma, obodo ga-adịkwa mma.

Ugbu a anyị tụlechara isiokwu ise a, ì chere na Baịbụl kwadoro ka Ndị Kraịst na-etinye aka na ndọrọ ndọrọ ọchịchị? Azịza ya doro anya. Ọ kwadoghị ya. Ma ezigbo Ndị Kraịst hà kwesịrị ịbụ ezigbo ụmụ amaala? Ee, ha kwesịrị. Olee otú ha ga-esi bụrụ ma ezigbo Ndị Kraịst ma ezigbo ụmụ amaala? Otú ha ga-esi eme ya bụ ime ihe ahụ Jizọs kwuru, ya bụ, ịbụ nnu na ìhè nke ụwa.

Ndị na-agbalịsi ike ime ihe ahụ Jizọs kwuru na-abara ma onwe ha ma ezinụlọ ha uru. Ha na-abakwara obodo ha uru. Obi ga-adị Ndịàmà Jehova nọ n’ebe i bi ụtọ ịkọwakwuru gị otú ha si na-akụziri ndị mmadụ Baịbụl ugbu a n’ebe i bi. *

[Ihe e dere n’ala ala peeji]

[Ihe odide gbatụrụ okpotokpo dị na peeji nke 10]

Mkpa Jizọs abụghị ịgbanwe ọchịchị, kama ọ bụ inyere ndị mmadụ aka ka ha gbanwee otú ha si ebi ndụ

[Ihe odide gbatụrụ okpotokpo dị na peeji nke 11]

Ndịàmà Jehova ghọtara na ha kwesịrị ịbụ ezigbo ụmụ amaala