Jehova Chineke kere ọtụtụ nde ndị mmụọ ozi tupu ya ekee ụmụ mmadụ. (Job 38:4, 7) Ndị mmụọ ozi bụ mmụọ, ha dịkwa ike. Ha na-ejere Chineke ozi. Mgbe ụfọdụ, Chineke na-edunye ha ka ha chebe ndị na-efe ya nọ n’ụwa ma nyere ha aka. (Abụ Ọma 91:10, 11) Taa, ndị mmụọ ozi na-enyere ndị mmadụ aka ka ozi ọma ndị na-eso ụzọ Jizọs na-ezisara ha baara ha uru.—Gụọ Mkpughe 14:6, 7.

Ànyị kwesịrị ikpegara ndị mmụọ ozi ekpere ka ha nyere anyị aka? Mba. Ọ bụ n’ihi na mgbe anyị na-ekpe ekpere, anyị na-efe onye anyị na-ekpegara ya ofufe. Ọ bụ naanị Chineke ka anyị kwesịrị ife. (Mkpughe 19:10) Ebe ọ bụ na ndị mmụọ ozi na-ejere Chineke ozi, ihe ha na-eme bụ ihe Chineke chọrọ ka ha mee, ọ bụghị ihe ndị mmadụ chọrọ. N’ihi ya, mgbe ọ bụla anyị na-ekpe ekpere, ọ bụ Chineke ka anyị kwesịrị ikpegara ya n’aha Jizọs.—Gụọ Abụ Ọma 103:20, 21; Matiu 26:53.

Chineke kere ndị mmụọ ozi ka ha jiri aka ha na-ekpebi ma hà ga-eme ihe ọma ma ọ bụ ihe ọjọọ otú o kekwara ụmụ mmadụ. Ma, ọ dị mwute na ọtụtụ ndị mmụọ ozi nupụụrụ Chineke isi. (2 Pita 2:4) Setan bụ mmụọ ozi mbụ nupụụrụ Chineke isi. Ndị mmụọ ozi ndị ọzọ sooro ya nupụrụ Chineke isi ma ghọọ ndị mmụọ ọjọọ. N’oge na-adịchabeghị anya, e si n’eluigwe chụda Setan na ndị mmụọ ọjọọ ya n’ụwa.—Gụọ Mkpughe 12:7-9.

Ihe ọjọọ na tigbuo zọgbuo na-arị ibe ya elu kemgbe afọ 1914. Nke a gosiri na oge Chineke ga-eme ka Setan na ndị mmụọ ọjọọ ya kwụsị ịkpa ike eruwela. Chineke ga-emezi ka ụwa anyị a dị otú o kwesịrị ịdị.—Gụọ Mkpughe 12:12; 21:3, 4.