Eric: Biko, anaghị m enwecha mmasị ịkpa ihe gbasara Baịbụl.

Boniface: Nsogbu adịghị. Aha m bụ Boniface. Aha nke gị kwanụ?

Eric: Eric.

Boniface: Ndeewo. Olee otú i mere?

Eric: Ọ dị mma.

Boniface: Biko, ka m jụtụ gị, ị̀ na-aga chọọchị mgbe ị dị obere?

Eric: Ee. Ma, mgbe m bara mahadum, m bịara chefuo ihe gbasara chọọchị.

Boniface: Èéè? Olee ihe ị gụrụ na mahadum?

Eric: Agụrụ m gbasara ihe ndị mere n’oge ochie. Ọ na-atọ m ụtọ ịgụ akụkọ gbasara ndị mgbe ochie.

Boniface: Akụkọ na-atọkwa mụnwa ụtọ. Ị manụ na a kọrọ ọtụtụ akụkọ na Baịbụl. Baịbụl ò so n’akwụkwọ ndị ị gụrụ mgbe ahụ ị nọ mahadum?

Eric: Mba. Ama m na Baịbụl dị mma ọgụgụ, ma, amaghị m na ọtụtụ akụkọ dị n’ime ya.

Boniface: Ama m na ọ ga-amasị gị ka m gosi gị ihe ụfọdụ dị na Baịbụl. Amaghị m ma ì nwere ohere ugbu a ka m gositụ gị ihe ndị mere eme a kọrọ na Baịbụl.

Eric: Ngwanụ. Ma, enweghị m Baịbụl.

Boniface: Nsogbu adịghị. Ka m jiri nke m gosi gị ya. Ebe mbụ m chọrọ igosi gị bụ n’akwụkwọ 1 Ihe E Mere isi 29, amaokwu nke 26 na nke 27. Ọ sịrị: “Ma Devid nwa Jesi chịrị Izrel dum; ụbọchị ọ chịrị Izrel dị afọ iri anọ. Ọ chịrị afọ asaa na Hibrọn, chịakwa afọ iri atọ na atọ na Jeruselem.”

Eric: Olee ihe ị chọrọ iji ihe a ị gụrụ ugbu a kọwaa?

Boniface: E nwere ndị sị na akụkọ Eze Devid bụ akụkọ ifo.

Eric: Olee otú mmadụ ga-esi kwuo ụdị ihe ahụ?

Boniface: Otu ihe mere ha ji ekwu otú ahụ bụ na e wezụga Baịbụl, o siri ike ịhụ akwụkwọ ọzọ kọrọ gbasara Devid. Ma, n’afọ 1993, ụfọdụ ndị na-amụ banyere ihe ndị mgbe ochie gwupụtara otu nkume ndị mgbe ochie dere ihe na ya. A sụgharịa otu n’ime okwu ndị e dere na ya, ọ pụtara “Ụlọ Devid.”

Eric: Èèé!

Boniface: Onye ọzọ Baịbụl kọrọ gbasara ya ndị mmadụ na-ekwetaghị na ọ dịrị ndụ bụ Pọntiọs Paịlet. Ọ bụ otu n’ime ndị gọvanọ chịrị n’oge Jizọs nọ n’ụwa. E dere aha ya na Luk isi 3, amaokwu 1. E nwekwara ndị ọchịchị ndị ọzọ e dere aha ha ebe a.

Eric: Ọọ eziokwu. O nwere ebe sịrị na “mgbe Pọntiọs Paịlet bụ gọvanọ Judia, Herọd abụrụkwa onye na-achị ógbè Galili.”

Boniface: Ọọ ya. O teela ụfọdụ ndị gụrụ  akwụkwọ kwuwere na akụkọ gbasara Pọntiọs Paịlet emeghị eme. Ma, ihe dị ka afọ iri ise gara aga, a chọtara otu nkume n’ala Izrel. E dekwara Pọntiọs Paịlet na ya.

Eric: Hmm. Anụtụbeghị m ihe ndị a mbụ.

Boniface: Obi dị m ụtọ na ị matala ha ugbu a.

Eric: Ịgwa gị eziokwu, ama m na Baịbụl bụ akwụkwọ e leruru anya dee. Ahụkwala m na ọ kọrọ ihe ndị mere eme, ma echeghị m na ihe dị na ya ga-abara ndị mmadụ uru n’oge anyị a.

Boniface: Ọ bụ ihe ọtụtụ ndị na-ekwu. Ma, mụnwa chere na Baịbụl ka bara uru n’oge a. Ihe mere m ji kwuo otú ahụ bụ na ihe na-akpa ụmụ mmadụ kemgbe ụwa agbanwebeghị. Dị ka ihe atụ, ihe oriri, uwe, na ụlọ na-adị ndị mmadụ mkpa kemgbe ụwa. Anyị na-achọkwa ka anyị na ndị ọzọ dịrị ná mma nakwa ka ezinụlọ anyị dịrị n’udo. Ọ́ bụghị eziokwu?

Eric: Ọọ ya.

Boniface: Baịbụl gwara anyị otú anyị ga-esi nweta ihe ndị a niile anyị chọrọ. Ọọ ya mere m ji sị na Baịbụl bara uru taa.

Eric: Kọwatụkwuoro m otú o si baa uru.

Boniface: Ihe m na-ekwu bụ na o nwere ihe ndị e dere na Baịbụl ga-abara anyị uru taa n’agbanyeghị na o teela e dere ha.

Eric: Èéè? Dị ka gịnị na gịnị?

Boniface: Dị ka ihe atụ, ọ gwara anyị achụla ego ọnwụ ọnwụ, gwakwa anyị otú anyị na ndị ezinụlọ anyị na ndị ọzọ ga-esi na-adị n’udo. Baịbụl dị ka anya anyị ji ahụ ụzọ. Dị ka ihe atụ, ị manụ na ọ naghị adịcha mfe nwoke ime ka ezinụlọ ya dịrị n’udo.

Eric: Ọọ eziokwu. Ọ fọrọ obere ka ọ bụrụ otu afọ mụ na nwunye m lụrụ, ma mụ na ya ka na-enwekarị nghọtahie.

Boniface: O nwere ihe ndị Baịbụl kwuru ga-enyere unu aka. Ụfọdụ n’ime ha dị n’akwụkwọ Ndị Efesọs. Ka anyị gụọ Ndị Efesọs isi 5, amaokwu 22, 23, na nke 28. Biko, ị̀ ga-agụtụnụ ebe ahụ?

Eric: Nsogbu adịghị. Ọ sịrị: “Ka ndị bụ́ nwunye na-edo onwe ha n’okpuru ndị di ha dị ka n’okpuru Onyenwe anyị, n’ihi na di bụ isi nke nwunye ya dị ka Kraịst bụkwa isi nke ọgbakọ ahụ, ebe ọ bụ onye nzọpụta nke ahụ́ a.” Nke iri abụọ na asatọ sịrị: “N’ụzọ dị otú a, ndị bụ́ di kwesịrị ịdị na-ahụ nwunye ha n’anya dị ka ahụ́ nke ha. Onye hụrụ nwunye ya n’anya hụrụ onwe ya n’anya.”

Boniface: I meela. Ọ bụrụ na di na nwunye ana-eme ihe a e kwuru ebe a, ì chere na ha agaghị na-ebi n’udo?

Eric: Ha ga na-ebi. Ma, ọ naghịkwa adịcha mfe ime ihe a e kwuru ebe a.

Boniface: Ọ bụ eziokwu. O nweghị onye zuru okè. Ọọ ya mere amaokwu ọzọ dị n’isi nke ise ahụ ji sị ka anyị ghara ịna-eme ka ndị na-enweghị ezi uche. * O nweghị onye kwesịrị ịna-eche na di ya ma ọ bụ nwunye ya ga na-emetacha ihe niile. Mụ na nwunye m achọpụtala na Baịbụl ga-enyeliri anyị aka ịna-agbaghara ibe anyị.

Eric: Ihe a amaokwu a kwuru amaka.

Boniface: Ndịàmà Jehova nwere ebe ha na-edebe ihe n’Ịntanet. Ihe ndị ga-enyere di na nwunye aka dịkwa ebe ahụ. Ọ bụrụ na ị ka nwetụkwuru ohere, m nwere ike igosi gị ụfọdụ n’ime ha.

Eric: Nsogbu adịghị.

Boniface: Ọ dị mma. Adres ebe anyị na-edebe ihe n’Ịntanet bụ www.pr418.com/ig. Ebe a bụ isimbido ya.

Eric: Hhmm. Foto ndị a amaka.

Boniface: Ha bụ foto ebe ụmụnna anyị na-ekwusa ozi ọma n’ebe dị iche iche n’ụwa. Ehee, lekwa ebe ahụ m na-agwa gị. Isiokwu ya bụ “Ihe  Ga-enyere Ndị Di na Nwunye na Ndị Nne na Nna Aka.” N’ebe a, e nwere isiokwu ndị kwuru ihe dị iche iche ga-enyere di na nwunye aka. Olee nke masịrị gị?

Eric: Ọọ nke a sịrị: “Idozi Nsogbu n’Ezinụlọ Gị.” Ka m lee ma ò nwere ihe m ga-ahụ na ya ga-enyere m aka idozi nsogbu n’ezinụlọ m.

Boniface: Isiokwu a kwuru ihe anọ ga-enye aka idozi nsogbu. Legodị ihe paragraf a kwuru. Ị̀ ga-agụtụnụ ya?

Eric: Nsogbu adịghị. Ọ sịrị: “Otú ahụ nkwurịta okwu si dị mkpa n’alụmdi na nwunye, ka ịhụnanya na nsọpụrụ dịkwa mkpa.”

Boniface: I meela. O nwere amaokwu Baịbụl e dere ebe a. Ị pịa ya aka, ya emepee.

Eric: Ehee, o mepeela. Ndị Efesọs 5:33. Ọ sịrị: “Ka onye ọ bụla n’ime unu hụ nwunye ya n’anya dị ka ọ hụrụ onwe ya n’anya; n’aka nke ọzọ, onye bụ́ nwunye kwesịrị ịdị na-akwanyere di ya ùgwù nke ukwuu.”

Boniface: Ị̀ chọpụtara na ihe e kwuru ebe a mmadụ ga-eme bụ ihe di ya ma ọ bụ nwunye ya chọrọ ka o meere ya?

Eric: Aghọtachaghị m ihe ị na-ekwu.

Boniface: Ọ̀ọ na ndị di anaghị achọ ka ndị nwunye ha na-akwanyere ha ùgwù, ndị nwunye ana-achọkwa ka ndị di ha na-egosi ha na ha hụrụ ha n’anya?

Eric: Ọọ eziokwu.

Boniface: Ọ bụrụ na di ana-egosi nwunye ya na ọ hụrụ ya n’anya, í cheghị na ọ ga-adịrị nwunye ya mfe ịkwanyere ya ùgwù?

Eric: Eche m na ọ ga-adịrị ya mfe.

Boniface: O ruola ihe fọrọ obere ka ọ bụrụ puku afọ abụọ e dere amaokwu Baịbụl a. Ma ọ bụrụ na di na nwunye ana-eme ihe e kwuru na ya, ọ ga-enyere ha aka ịna-ebi n’udo.

Eric: Ahụla m na Baịbụl bara uru karịa otú m chere.

Boniface: Obi dị m ụtọ maka ihe a mụ na gị kwurịtara. M ga-achọkwa ka mụ na gị hụ ụbọchị ọzọ ka ị gwa m ihe ị gụtara n’isiokwu nta sịrị, “Ihe Anọ A Ga-eme Iji Dozie Nsogbu.” Ọ dịkwa n’isiokwu a anyị kparịtara. *

Eric: Ọ dị mma. Mụ na nwunye m ga-agụ ya tupu ụbọchị ọzọ anyị ga-ahụ.