Ẹ-ẹpwụ nya Ọya Ohikichu, ahị ka họ ụkụrwọ lọngịrị-ọngịrị nyọka dọmwụ nya ịBayịbụụ ọjẹ́jẹ bala ugbiyegu ọnyị myị́ ọnyị wuu, bwula ọ-kpa ụpwụ nya Chị Ọkẹkẹnị Gboyi Myị́ Oyi! ochiche, mẹ ang jáa. Angị kpa ẹrụ ọnyịịla pyẹ ịlẹ kị chụ nyọka chịchịịchị ye ịlahị nya ụgbẹyị ka họ awa 30 myị. Ányị ahị tị́ ka bwu họ ụkụrwọ nya ẹrụ ọnyịịla ọ-kpa pyẹ ọdatị ọwẹ?

• Ụka nya Ọgbanyẹ-ọgbanyẹ: Kpa ugo ẹkpẹ nya ụpwụ ọwẹ dọmwụ nya ẹla ụ-ụgbẹyị ọlẹ kọ ka kpụ angịnyị ịpyọ, ka maga nyọka họ mẹjẹ jaabwọ kahị kaa bwu jẹ́ ang. Kpịtịya nya angịlẹ kị la irya nyọka jẹ́ ang lụka ọkẹkpẹ, tụ́ angịlẹ ká mwẹẹkpẹ ka ẹga nyaa ụka ọhẹ lẹ. O-riri kị pwa la ọ-ka jẹ́ ang lụka ọkẹkpẹ wẹwẹ, ọ-chịkpẹẹ myị kị ka myị ọnụ nyọka kpa ụpwụ onyeewe ọwẹ jẹ́ ang lẹẹlẹẹ. Kori ká ọngịnyị á ji ẹpwa ka aalẹ, á ya ụpwụ ọwẹ nọ gboo ka, lee ọ-ya ju ẹ-ẹpwụ nya ileta du kịla ọngọlẹ kọ la irya nyọka jẹ́ ang ene-ene ka lẹka. Ọhẹka, ala Service Committee nya Ọjịra-jịra ka nwụla ọtụguru ọkịla nọ myị nyọka kpehe nya ẹla Ohe ẹ-ẹpwụ nya ọya ọwẹ.

• Iwe-ahụrụ Ọkịla: Kori ká ọjịra-jịra nyang a kaa kpa ẹrụ ọnyịịla pyẹ la ịcart, ya ụpwụ nya Chị Ọkẹkẹnị Gboyi Myị́ Oyi! ochiche ju ụwa. Ya je angịlẹ kị ye ụpwụ ọwẹ nyori ahị ka jẹ́-ẹ jẹ́ ịBayịbụụ taa la ọ-nwụ uri ka myị́. Mẹ jọọ pyịnyẹng ahyaahị jaabwọ kahị kaa bwu jẹ́ ịBayịbụụ lee anụ ya ụka hawụlẹ nyọka họ ịnyị ụka ọkịla. Ọngọ kpẹhị rịrị ẹrụ ọnyịịla ọ-kpa pyẹ ka jẹ́-ẹ nwụlanọ chajị ká angị kpa ẹrụ ọnyịịla pyẹ ịhyẹ ka kele ka ẹga ịlẹ kị kaa dọhị ịtụka nyọka ya ẹla nya ịBayịbụụ ọjẹ́jẹ taa. Ịnyịnyị, ahị ka jẹ́-ẹ ya ẹla nya ịBayịbụụ ọjẹ́jẹ ta angịlẹ kahị ka họ ụkụrwọ lawụlẹ lee angịlẹ kahị tọ ụka kahị juwa ya ẹrụ ọnyịịla la ụka ọ-kpahị ju ka.

IJisọsị dahị ehile ya, ahị nyị họ ká angịnyị nyị “ri angịjụgbẹyị nyam,” bala ahị nyị “mẹ ang . . . jaa.” (Mat 28:19, 20) Lẹ, ahị myị́ ka ẹrụ ọnyịịla ọ-kpa pyẹ ọdatị ọlẹ a dahị ụbwọ nyọka họ ụkụrwọ ọwẹ jịra, bwula ọ-kpa ụpwụ nya Chị Ọkẹkẹnị Gboyi Myị́ Oyi! họ ụkụrwọ.