Ahị kaa kpa ọngịrị nyahị họ ụkụrwọ ụka kahị chị ang nọ hịlọhị nyọka họ gụ ọọwa ha iJihova. (1Kọr 9:26) Ọọwa ka dahị ụbwọ nyọka kpa ụka nyahị ha ang la ẹla ọjẹ́jẹ, ene ká ocheju nya odehe ọlẹ ka pweji. (Efe 5:15, 16) Anụ ka kpa ụka nya ang ọjẹ́jẹ nya ugbiyegu chụ ang ọlẹ kanụ ka họ ẹ-ẹpwụ nya ẹka onyeewe myị́? Nyọka danụ ụbwọ, ụpwụ ọ-kpa jẹ́ ang ọlẹ la egbeju nya ẹla lụmẹ-lụmẹ u-uhye nya ang ịlẹ ká ka jẹ́-ẹ chị nọ hịlọng, lẹ kụ irya jwaa la abwọ ọrịrị.—Jem 1:5.

Ọ-chụ pwokwita, la o-wo lawụlẹ nya ugbiyegu ọngọhẹ nyanụ ka jẹ́-ẹ ye ịlahị nya ụgbẹyị myị́? Kori ká dahịhile ọngịrị nyang nwa nyọka jwọọ họ ka, ya ẹla ta angịhyẹ nya angị ye ịlahị nya ụgbẹyị ịlẹ ká iwe-ahụrụ nyaa me ịnyang. (Etu 15:22) Ọhẹka, lụka nya ang ọjẹ́jẹ nya ugbiyegu, a ka jẹ́-ẹ wo ẹla bwu ẹga nya ọngọ ye ịlahị nya ụgbẹyị ọhẹ myị́. Da abwọlẹ ká nwụlanọ nyọka họ ụkụrwọ ẹnụ myị́ ẹnụ ju ụpwụ. Kori ká tị ye ịlahị nya ụgbẹyị ẹnẹhẹ lẹ, kụ ẹhị yẹ iwe-ahụrụ nyang kori ká ụka á ka ji hang nyọka họ myịmyị lẹẹlẹẹ.

Angịhyẹ bwu ugbiyegu nyang ka jẹ́-ẹ chịchịịchị ye ịlahị nya ụgbẹyị ẹ-ẹpwụ nya ọya ookpokpo lee ọ-gụ ọọwa myị́? Kori ká ọngịrị nyang á tị chụhị lẹ bẹẹ, a ka jẹ́-ẹ chịchịịchị ye ịlahị nya ụgbẹyị myị́ bwula ọ-bịrị ụka pyịnyẹng-pyịnyẹng ẹnụ myị́ ẹnụ ẹ-ẹla Ohe. O-ri ká ụkụrwọ lee ube-ụpwụ á myị hang nyọka kpehe nya ẹla Ohe ẹ-ẹpwụ nya epwihi ka, a ka jẹ́-ẹ chụ ụka nya ọmwịịnyọ lee ọya ọlẹ kọ la ahyẹẹnụ nya ọmwịịnyọ ịrụ myị́. Ju ahyẹẹnụ ịlẹ lee ụka ọlẹ ká chụ nyọka chịchịịchị ye ịlahị nya ụgbẹyị ẹjẹẹ ẹ-ẹpwụ nya ụpwụ ọ-kpa wa ahyẹẹnụ lee ọ-dọọ ju ụpwụ.—Etu 21:5.

YẸ IFIM ỌLẸ KỌ RI JU UGBODU . . . ANỤ ANGỊ YE ỊLAHỊ NYA ỤGBẸYỊ, KANỤ WẸ ỊTỌ ẸLA OLEJI ỌLẸ:

• Ẹlịyẹ ẹla ọlẹ kọ́ họ ẹ-ẹga nya ọọnahị Aamand à tị́ mẹjẹ́ẹhị u-uhye nya abwọlẹ ká iJihova kaa kpẹhị rịrị angịlẹ kị hu ịlaa kịlịya nyọka ye ịlahị nya ụgbẹyị?