IJihova á yẹ ọnụ ọmyịmyị nya awụlẹ oyeye lẹhị ohukee kpong-kpong ka, lẹ ọ tịtọ ká ahụ bala ọrụ ka yẹju lawụlẹ lala ọngọ ookpokpo. (Mat 19:5, 6) Ugbiyegu ịhyẹ lụmẹ-lụmẹ ji ẹ-ẹpwụ nya angịnyị nya Ohe Oluhye kị ya ọgụ-ẹpẹtẹ ịnyịịla deeji. Ịlẹhị lẹ, ọngọngọhẹ nyaa-á la kpẹẹkpẹẹ ka. Akama kaa chaa ọgụ. Lẹ, áhị ka la irya ụma ọlẹ kọ be ehe lụmẹ alẹ u-uhye nyori, ebwo ọchịchị bala awụlẹ ọpwa-pwa nyaa ri utoji ọlẹ kị nyị ka myị akama nya ahụ bala ọrụ lẹ, kpong-kpong ka. Ányị ahụ bala ọrụ ịlẹ kị ri Angịnyị nya ịKịrayịsị à tị́ ka bwu chewu ke awụlẹ oyeye nyaa?

Kụ irya ju ẹhị nya ẹla ịrụ ịkpọnchị ịlẹ wẹẹ.

1. Gbe ọkịlẹtụ nyang bwula o-cheji ba hi ọ-tụ aha nya ọlẹng lee ọnyang ọkịla bala ọ-yẹ ifim ipwoku ka ịlẹ kị ka du ká awụlẹ oyeye nyang ka la dẹwụ-dẹwụ.​—Mat 5:28; 2Pit 2:14.

2. Ju igu oriri nyang bala Ohe Oluhye ọngịrị bala ọ-kịnyaa la ọ-ka la irya nyọka họ ẹla kpọọ ịpyọ ẹ-ẹpwụ nya awụlẹ oyeye nyang.​—Eje 97:10.

3. Kịnyaa la ọ-ka hu ọngịnyị onyeewe oriri da kụrụ bala ọ-họ ang ichiche-ichiche ịlẹ kị ka du ká ọhịhị ka kpụ ọngọkịla nyang ịpyọ ịnyịnyị.​—Kol 3:8-10, 12-14.

4. Ya ẹla ta ọngọkịla nyang lihi-ihi bala ụ-ụgbẹyị ọlẹ kọ pwoku.​—Kol 4:6.

5. Họ ụkụrwọ nyang ẹ-ẹpwụ nya ugbiyegu hiigu-hiigu la ọháha.​—1Kọr 7:3, 4; 10:24.

Ụka ká Angịnyị nya ịKịrayịsị à ju ihi nya awụlẹ oyeye aalẹ, ị wẹẹ ju ihi nya ọngọlẹ kọ dọmwụ nya awụlẹ oyeye kọ ri, iJihova.

YẸ IFIM ỌLẸ KỌ RI, O RI OPYII KAHỊ KA “KPA UGBODU OJUJU ONYUDIYO RỤNYẸ” LẸ​—BA EHILE NYA ỤNYẸ ỌRỤRỤ JẸ, KANỤ WẸ ỊTỌ ẸLA ILEJI ỊLẸ:

• Ịlẹhị lẹ, ugbiyegu ka dọmwụ hiigu-hiigu myị, ma ịmayẹ ịlányị à tị́ ka jẹ́-ẹ chaa ọgụ?

• Ányị itiwe nya ehile ịla ịBayịbụụ à tị́ ka bwu da angịlẹ kọ laa lala o-ri ị juwa ẹ-ẹpwụ nya awụlẹ oyeye ọlẹ ká ọháha-á ji ka ụbwọ?

• Ehile iyina iJihova à tị́ da u-uhye nya awụlẹ oyeye?

• Kori ká awụlẹ oyeye á ka nwa kịlahị aalẹ, Ịịyẹ ahụ bala ọrụ à tị́ ka họ?