Ịịyẹ tị́ du ká ọjịra-jịra ịtụka nyahị kaa kpụhị ịpyọ yẹẹyẹẹ? Jaabwọ kọ la lụka onyogo nya ala Isirẹlụ, ọjịra-jịra ịtụka ịlụka nyahị alẹ kaa ya iwe hahị nyọka gbịgba ha iJihova bala iru nya ụnụnụụnọ nya aanahị ịkịla. Ang ịlẹ wuu kahị tị kaa jẹ́ bwu ụwa kaa háahị yẹẹyẹẹ bala ọ-dahị ụbwọ nyọka tụ ju iJihova chwẹẹ gụ ọwọwa ịnyịnyị. Ọ myịmyị kaa kpụhị ịpyọ nya ụka ọlẹ kahị kaa bịrị bala alugbiyegu bala aligu nyahị. Ẹla ịlịịwẹ wuu ọ-myịhị lẹhị bwu ẹpwụ ọkịlẹtụ à kaa guhi gbịla nyọka ka ọjịra-jịra ọtụka ọla ahyẹẹnụ ịta ọwẹ lẹ.

Ụka kahị la iwe nyọka yẹju lawụlẹ, áhị kụ irya u-uhye nya apyobwuna ọlẹ kahị ka ye kem ka, ma jaabwọ kahị ka bwu mẹ ọháha jẹ angịkịla ịnyịnyị. (Gal 6:10; Hib 10:24, 25) Ụka kahị wụrụ ụgbẹyị ha aanahị alẹng bala anyang lee ọ-chị ẹga hụhụ da ha ịlọhị kem aalẹ, ahị wẹẹ mẹjẹ nyori ahị tịtọ nya ịlahị ọkaka nya angịkịla ịnyịnyị. (Filip 2:3, 4) Ọjịra-jịra ịtụka kaa ya iwe da hahị nyọka la aligu inyeewe. Ene ká ọjịra-jịra ka dọmwụ bala ụka kọ myị kpá, lee ụka nya ang oriri nya alẹnụ, ahị ka jẹ́-ẹ kpa ụka ọwẹ joja bala angịlẹ kahị jẹ́ ka. (2Kọr 6:13) Ahị ka jẹ́-ẹ la aligu ịlẹ kị ka juwa gboyi myị́ oyi bwu ọjịra-jịra ịtụka ụma ịlịịwẹ! Ọgụgụ wuu, ụka ká alodehe à yẹ ọháha nya ịlẹhị ọlịnyị ẹ-ẹpwarịrị nyahị, ọhẹka ọ ka gwaa gbịla nyọka yẹju lahị gbịgba ha iJihova.​—Jọn 13:35.

YẸ IFIM ỌLẸ KỌ RI ‘ỌHÁHA NYA ỊLẸHỊ Á KAA GBU ENYI KA’! ỌJỊRA-JỊRA ỌTỤKA NYA ẸPWỤMA LỤMẸ-LỤMẸ, KANỤ WẸ ỊTỌ ẸLA ILEJI ỊLẸ:

• Ányị ị tị bwu mẹ ọháha jẹ angịlẹ kị bwu ẹpwụma ọkịla wẹ ọjịra-jịra ọtụka nya ẹpwụma lụmẹ-lụmẹ la 2019?

• Ịyẹ tị́ du ká ọháha bala ọyẹju lawụlẹ nya angịnyị nya iJihova lẹbyẹbyị lụmẹ?

• Ụpa iyina lẹpwụ nya ọháha ọlẹ ká Angịnyị nya ịKịrayịsị kaa la Ọngọhẹ nya Angị Kpẹhị Rịrị Ogu à tị́ ya ẹla rụ́?

• Ányị ọháha nya Angịnyị nya ịKịrayịsị à tị́ bwu yẹ aanahị ju lawụlẹ ịị Germany bala South Korea?

• Ịịyẹ à tị ka ri eje ọchịchị nyahị?