Ahị jam odehe ọlẹ ká angịnyị kaa yẹ ang ọnyịịla lala ọtịpyọ bala ọ-yẹ ọtịpyọ lala ọnyịịla. (Ayị 5:20) Ịnyịnyị, ọtịpyọ lụmẹ nyori, angịhyẹ kaa họ ang ịlẹ kị wụ iJihova ẹjẹ, tụ abwẹla ipwoku ka ẹ-ẹpwarịrị nya angịnyị ịlẹ kị ri ụma ookpokpo. Aliko nya anyị nyahị ị-la ube-ẹpwụ lee angịkịla kaa tịtọ nyọka mwaaju chajị kị ka dịraa ẹ-ẹpwụ nya abwẹla nyaa. Ányị a tị́ ka bwu nwụla anyị nyang nọ chajị kị ka jẹ́-ẹ kụrụ iwe-ahụrụ ịlịịwẹ myị?

Mẹ ang jẹ anyị nyang yẹẹyẹẹ u-uhye nya ehile nya iJihova. (Liv 18:3) Mẹjáa dụmwọ-dụmwọ jaabwọ ká ịBayịbụụ ya u-uhye nya ẹga nya awụlẹ ọkaka. Ang ọlẹ ká ka mẹjáa ka kpụnịrọ abwọlẹ kị ri ọgbahị kaka ba, bala abwọlẹ kị ka wo etu nya ẹla kaka ba ịnyịnyị. (Ehile 6:7) Tịlọng wo wẹẹ: ‘M̀ mẹ ang jẹ anyị nyam u-uhye nya abwọ kị ka mẹ ọháha jẹ angịkịla ụ-ụgbẹyị ọlẹ kọ pwoku, ang odudu kọ baba kị ka kụrụ ang kẹm-kẹm bala ang odudu ká angịkịla baba nyọka ju ihi nyaa ụka kị juwa i-iwibaa? Anyị nyam ka jẹ́ ang ọlẹ kị ka họ ụka ká ọngọhẹ-ẹ̀ tịtọ nyọka mẹ ụrụrụ nya angị ji lọhị-lọhị jáa lee o-byaa nyị họ ang ọlẹ kọ wụ iJihova ẹjẹ?’ Kori ká mẹ ang jáa nọ u-uhye, ọ ka daa ụbwọ nyọka cheji ba hi iru nya akama lụmẹ-lụmẹ. (Etu 27:12; Ọngọ 7:12) Bwula ọ-mẹ ang jẹ anyị nyang, a wẹẹ mẹjẹ nyori ang ugu ọlẹ ká iJihova ya hang myịng lẹhị.​—Eje 127:3.

YẸ IFIM ỌLẸ KỌ RI, NWỤ́ ẸPWA ỌLẸ KỌ KA RI EHE​—CHEWU KE ANYỊ NYANG BWU ANG “ONYOBYI,” KANỤ WẸ ỊTỌ ẸLA ILEJI ỊLẸ:

• Ịịyẹ tị́ du kọ kaa la angịhyẹ ujwo nyọka mẹ ang jẹ anyị nyaa u-uhye nya ẹga nya awụlẹ ọkaka?

• Ịịyẹ tị́ du ká adịda bala ịnịna ka mẹ ang jẹ anyị “ụgbẹyị ọlẹ kọ ka pwoku ọ-nwụ rịrị bala ọmẹjẹ nya Ọngọlahị la”?​—Efe 6:4

• Ịịyẹ ogu nya iJihova à tị́ họ nyọka da adịda bala ịnịna ụbwọ mẹ ang jẹ anyị nyaa u-u-uhye nya ẹga nya awụlẹ ọkaka?​—w19.05 12, akpa

• Ịịyẹ tị́ du kọ chịla nyọka ya ẹla bala anyị nyang ụka myị́ ụka ene kị ka la akama ọtụka-ọtụka?