Ịyẹ tị́ du kahị ka nwụlanọ? Ẹla nya ube-utoji bala ọngịnyị o-ye nọ ube-utoji ka họ kpịraka lụka ọ-kpahị ju ka myị. Lẹẹlẹ, nwụlanọ lẹẹlẹẹ nyọka kpa iwe ọlẹ kọ ji wẹ họ ụkụrwọ chajị ká ka jẹ́-ẹ ye ụbwọ ọdada ọlam-ọlam ẹ-ẹga nya utoji ọhọhọ ụka ká iwe-ahụrụ ọlịnyị a kpeji. Bwula ọ-họ ịnyị, á mẹjẹ nyori a ju ihi nya ọhịhị bala ehile nya iJihova u-uhye nya ịwọ.—Ụkụr 15:28, 29.

Ịyẹ a tị́ ka họ nyọka nwụlanọ?

• Kụ irya yẹẹyẹẹ bala ọ-raabwọ ka yụbwọ ju ụpwụ nya durable power of attorney (DPA) ẹ-ẹpwụ. a Ọngọ kpa ẹrụ ọnyịịla pyẹ ọlẹ kọ hu enyi Ohe lẹ, ka jẹ́-ẹ ye ụpwụ nya DPA ọwẹ bala Identity Card (ic) ọlẹ kọ ri ịnya anjwo bwu ẹga nya ọngọ kpẹhị rịrị apwụ ọọjịra-jịra myị

• Kori ka kpẹnyị, tọ angịgbahị nya ọjịra-jịra wo nya ụpwụ ọlẹ kọ ri Information for Expectant Mothers (S-401). Ụpwụ ọwẹ ka dang ụbwọ nyọka cheje ọnyịịla u-uhye nya iwe-ahụrụ nya utoji ọhọhọ ọlẹ kọ ka ji myị lụka nya ẹnyị nyang bala ụka nya ọnyị ọmama

• Kori ká baba nya utoji ọhọhọ ọhẹ ọlẹ kọ gu ẹla nya ịwọ lee ọ-ka yeng nọ ube-utoji aalẹ, họ ká angịgbahị nya ọjịra-jịra a jẹ́ neeji dẹẹ, ká tị ya je alube-utoji ịnyịnyị nyori angịhyẹ nya Alibeenu nya iJihova nyị ja ka ju ọwa ụga

Ányị angịgbahị nya ọjịra-jịra à tị́ ka bwu dụbwọ? Ị ka jẹ́-ẹ dang ụbwọ nyọka yụbwọ ju ụpwụ nya DPA nyang ẹ-ẹpwụ. Ma, á-angịgbahị a ka cheje nya utoji ọhọhọ hang ka lee ọ-gba irya nyịlaa ịwa kpehe u-uhye nya eje ọlẹ kọ baba ká ọngọngọọng lịlọmwụ ka chị ka ịnyịnyị. (Rom 14:12; Gal 6:5) Ụka ká ya je angịgbahị nya ọjịra-jịra iloye nyang nyori a la iwe-ahụrụ nya utoji ọhọhọ ọhẹ ọlẹ kọ gu ẹla nya ịwọ, ị ka bẹkọ wụrụ ala ịKọmitii nya Angị Me Obyi Bala Angị Họ Utoji (HLC) ahyaahị wọnụ nyang ju.

Ányị ala HLC à tị́ ka bwu dang ụbwọ? Ị mẹ ang jẹ aanahị ịlẹ kị ka họ ụkụrwọ i-iwe-ahụrụ ọwẹ jaabwọ kị ka da ebwo nya angị họ utoji bala angị leje ụbwọ kị ka jẹ́ ẹla ọlẹ kahị myị la u-uhye nya ịwọ. Ị ka ya ẹla u-uhye nya utoji ọlẹ kị ka họng bala ọngọ họ uda nyang chajị kị ka jẹ́-ẹ cheji ba hi ịwọ o-go jụng. Kori kọ baba, ị ka dang ụbwọ nyọka mwahị nya ọngọ họ uda ọlẹ kọ ka myị ọnụ ju eje ọchịchị nyang.

YẸ IFIM ỌLẸ KỌ RI ABWỌLẸ Á KA BWU CHEJE U-UHYE NYA UTOJI ỌHỌHỌ ỌLẸ KỌ GU ẸLA NYA ỊWỌ, KANỤ WẸ ỊTỌ ẸLA ILEJI ỊLẸ:

• Ịyẹ a tị́ jẹ́ bwu ifim ọwẹ kọ ka dang ụbwọ nwụlanọ gbe ụka ká ẹla nya utoji ọhọhọ ọlẹ kọ gu ẹla nya ịwọ a kpeji?

  Ọwẹwẹ nyang