Alibyi oyaya ri ẹla ọ-mẹjẹ ọngịnyị, ma o-ri ọ-nwụ rịrị bala ega ọchịchị ịnyịnyị. IJihova kaa yalibyi lahị chajị kahị ka jẹ́-ẹ gbịgba họọ ụgbẹyị ọlẹ kọ ka yehi myị. (Rom 12:1; Hib 12:10, 11) Ụka ọhẹ, alibyi o-ya tahị kaa jụjụ, ma ụka kahị ye myị bala ọ-kpa họ ụkụrwọ Ohe Oluhye kaa yehi myị bala wahị kụrụụhị. (Etu 10:7) Ịyẹ angịlẹ kị wẹẹ yalibyi la ọngịnyị à tị́ ka kpịtịya bala angịlẹ kị wẹẹ yalibyi la?

Ọngọ yalibyi la ọngịnyị. Angịgbahị nya ọjịra-jịra, adịda bala ịnịna bala angịkịla ka maga nyọka yalibyi la ọngịnyị ẹ-ẹpwụ nya ahyẹẹrwẹrwa bala ọháha jaabwọ ká iJihova kaa họ. (Jer 46:28) Ọchịla nyọka yalibyi ọnyọọngịrị la ọngịnyị pwoku ọhọbịrị bala ang ọtịpyọ ọlẹ kọ họ bala ọ-ka yoo ụgbẹyị ọlẹ kọ ka mẹ ọháha jẹ.​—Tay 1:13.

Ọngọlẹ kị wẹẹ yalibyi la. Ụgbẹyị ọnyị myị́ ọnyị ọlẹ kị yalibyi la ahị, ahị pwa la ọ-ka ye myị ka ma, ahị maga kahị kpa họ ụkụrwọ ahyaahị. (Etu 3:11, 12) Ahị angịnyị ehe baba nya alibyi o-ya la chajị ahị la kpẹẹkpẹẹ ka, ọ tị ka bwula agbẹyị ịdatị-ịdatị myị. Ang ọlẹ kahị wa bwu ịBayịbụụ ka yalibyi lahị lee ọlẹ kahị wo bwu ọjịra-jịra nyahị. Lee ọ-ka bwu ẹga nya angịgbahị nya ọjịra-jịra. Kori kahị ye alibyi myị bala ọ-ka kpa họ ụkụrwọ, ahị ka la ọhịhị ọlam-ọlam bala ọ-ka hịhị gboyi myị́ oyi.​—Etu 10:17.

YẸ IFIM ỌLẸ KỌ RI “ANGỊLẸ KỊ HÁ IJIHOVA Ọ KAA YALIBYI LA LẸ,” KANỤ WẸ ỊTỌ ẸLA ILEJI ỊLẸ:

• Ányị ọhịhị nya Canon à tị́ dọmwụ? Ányị ọ tị́ bwu yẹda?

• Alibyi ụma oyina ọ tị́ ye bwu ẹga nya iJihova?

• Ẹlịyẹ ahị tị jẹ́ bwu ẹla nyamwụ ọwẹ?