Jaabwọ kahị wẹẹ bọhụ ẹ-ẹpwụ nya ‘ahyẹẹnụ ihyẹẹkpẹ nya odehe ọlẹ,’ ahị yẹhị rịrị nyori akama ka juwa lụmẹ gụ ọwọwa kịlahị-ịlahị. (2Tim 3:1; “ang ọjụjụ” bwu ang ọjẹ́jẹ ọla nwtsty bwu Mat 24:8) Ụka ká ayịreji o-bwu agaga à họ, angịnyị nya iJihova kaa ye ọmẹjẹ ọlẹ kọ ka daa ụbwọ bala ịlẹ kị ka chị ọhịhị nyaa da. Ọchịda nyahị ụka ọọwa kpụnịrọ ahị ọ-ka ju ihi nyọka nwụlanọ lẹẹlẹẹ ẹ-ẹpwụ nya olegu bala ugbinyịrọ.​—Luk 16:10.

• Nwụlanọ ẹ-ẹpwụ nya olegu: Hu ụka nọ nya ịBayịbụụ ọjẹ́jẹ ọlam-ọlam bala ang ọjẹ́jẹ nyịlọng. Mwahị nya agbẹyị ịdatị-ịdatị ịlẹ ká ka bwu kpa ẹrụ ọnyịịla pyẹ. A chị uko kori ká chị ebwo hị aanahị ịla ọjịra-jịra lụka o-kpii ka. (Ayị 30:15) A ji ụbwọọng ẹnẹnẹhẹ hi iJihova bala iJisọsị ka.​—od 176 ¶15-17

• Nwụla ang nya ugbinyịrọ nọ: Datị hi ọ-la ịbang ọ-jaabwọ nya ẹla ka, ugbiyegu ọnyị myị́ ọnyị ka ra ang oriri rịrị e-eji, enyi, iteji bala ang ịkịla kori ká ọbaba á ji nyọka kụ ẹga ookpokpo lụka o-kpii.​—Etu 22:3; g17.5 4, 6

YẸ IFIM ỌLẸ KỌ RI À NWỤLANỌ GBE AYỊREJI O-BWU AGAGA LẸ? KANỤ WẸ ỊTỌ ẸLA ILEJI ỊLẸ:

• Ányị ahị tị́ ka bwu nwụlanọ ẹ-ẹpwụ nya olegu gbe ayịreji o-bwu agaga?

• Ịịyẹ tị́ du kọ baba nyọka . . .

  • wo ẹla bwu ẹga nya angịgbahị nya ọjịra-jịra ene nya ayịreji o-bwu agaga, ụka ká ayịreji o-bwu agaga á kpeji, bala ụka kọ họ kpá?

  • nwụla ịbang ọhẹ nọ nya ọ-jaabwọ nya ẹla ka?

  • ya ẹla u-uhye nya ụma nya ayịreji o-bwu agaga ịdatị-ịdatị bala abwọlẹ kahị ka họ ẹ-ẹpwụ nya iwe-ahụrụ ọnyị myị́ ọnyị?

• Agbẹyị ịta iyina ahị tị́ ka jẹ́-ẹ da angịkịla ụbwọ ụka ká ayịreji o-bwu agaga á họ taa?

TỊLỌNG WO WẸẸ, ‘Ẹlịyẹ m tị jẹ́ ẹ-ẹga nya ọnwụlanọ bwu ẹga nya ẹdụrụ nya COVID-19?’