Ihi nya Ohe Oluhye ojuju kaa bwu ọkịlẹtụ. (Etu 3:1) Chajị nya ọọwa lẹ, ụka kahị juwa mẹ ang jẹ, ahị ka maga nyọka họ ká ẹla nyahị ka gu ọngọlẹ kahị wẹẹ mẹ ang jẹ ọ-ọkịlẹtụ. Ányị ahị tị́ ka bwu họ ịnyị?

Á mẹ ẹlịlẹhị ịlẹpwụ nya ịBayịbụụ jẹ ọngọlẹ ká kaa mẹ ịBayịbụụ jẹ kem ka, ma dọọ ụbwọ nyọka yẹ jaabwọ ká ẹla ọọwa bwu gwoo ẹ-ẹpwụ nya ọhịhị, bala igu oriri nyamwụ bala iJihova. Dọọ ụbwọ nyọka jẹ jaabwọ ká ehile ịlẹpwụ nya ịBayịbụụ mẹ ọháha, abwẹla ọnyịịla bala ọngịnyị ọnyịịla oriri nya Ohe Oluhye jẹ. La ọdụmwọ, tọọ ịtọ ẹla ịlẹ kị ka dọọ ụbwọ nyọka kụ irya u-uhye nya abwọlẹ ká ang ọlẹ kọ wẹẹ jẹ lọọ. Dọọ ụbwọ chajị kọ ka kụ irya u-uhye nya abwọlẹ ká ọhịhị nyamwụ ka há gụ ọwọwa kori kọ tụụbwọ hi ịhọhọ lee abwẹla ịtịpyọ ịlẹ kọọ họ ene-ene. Ụka ká yẹ ọháha o-bwu ọkịlẹtụ kpehe ọlẹ ká ọngọlẹ ká kaa mẹ ịBayịbụụ jẹ la ẹ-ẹga nya iJihova, ọọwa ka du ká ọkẹkẹnị nyang ka haju gụ ọwọwa.

YẸ IFIM ỌLẸ KỌ RI, YE ỌKẸKẸNỊ ỌLẸPWỤ NYA Ọ-HỌ KÁ ANGỊKỊLA KA RI ANGỊJỤGBẸYỊ BWULA Ọ-NWÀ KỊLAHỊ​—HỌ KÁ ẸLA KA GU ỌNGỊNYỊ Ọ-ỌKỊLẸTỤ, KANỤ WẸ ỊTỌ ẸLA ILEJI ỊLẸ:

• Ịịyẹ tị́ du ká Inori tọ agidi wo yẹkẹẹ: “Á kụ irya ju ẹla ọlẹ kahị ya ẹnụmwụ gụ ọọwa wẹẹ?”

• Ányị Inori à tị́ da Agidi ụbwọ nyọka jẹ nyori ehile ịlẹpwụ nya ịBayịbụụ mẹ ọháha ọlẹ ká iJihova la ẹ-ẹga nyamwụ jẹ?

• Ányị Inori à tị́ bwu da Agidi ụbwọ nyọka kụ irya u-uhye nya abwọlẹ kọ ka mẹjẹ nyori Ohe Oluhye họ́ọ?