Ahyẹẹrwẹrwa ọmẹjẹ ri ọ-ka maga nyọka jẹ́ irya ọkụkụ nya angịnyị, abwọlẹ ká ẹla kaa laa ọ-ọkịlẹtụ, ang ọlẹ kọ ju apyobwuna haa bala ọ-ka jẹ́ ịbaba nyaa. Angịkịla kaa jẹ́ ụka káhị mẹ ahyẹẹrwerwa jáa. Kori kahị tịtọ nyọka da angịkịla ụbwọ ịnyịlẹhị aalẹ, ọọwa ka dahị ụbwọ nyọka mẹ ahyẹẹrwẹrwa jáa. Ụka kahị mẹ ahyẹẹrwẹrwa jẹ ẹ-ẹrụ ọnyịịla ọ-kpa pyẹ, ahị wẹẹ gbịla ọgụ-ẹpẹtẹ nya ọháha bala ẹhị ọ-kpa rịrị nya iJihova, ọọwa tị ka gbile angịnyị nyọka wẹ ka jọ́ọ.​—Filip 2:4.

Ahyẹẹrwẹrwa ọmẹjẹ á ri ang nya ijẹẹhị ọlẹ kahị kaa kpa nyọka jẹ́-ẹ mẹ ang jẹ ka. Ọ-kaa bwula ụgbẹyị ọlẹ kahị kaa ke ụrụ bala o-ya ẹla. Ịnyịnyị, ahị kaa mọọ jẹ a-abwẹla, ẹ-ẹhị bala ụ-ụgbẹyị ọlẹ ahị kaa dụbwọ lụka nya ẹla oyaya. Ahị kaa mọọ jẹ bwula ọmẹjẹ nyori ahị kpa ọngọọwa i-irya ịlẹhị. Ahị kaa maga nyọka jẹ ang ịlẹ kịị há ọngọọwa, ọmyịmyị bala iwe-ahụrụ nyamwụ. Ahị kaa ya joo ẹla ọlẹ kọ ka họ bala abwọlẹ kọ ka bwu họ ẹla, ma áhị kaa ya ẹla rịrọọ nyọka yẹda pyii ka. Ụka ká angịlẹ kahị tọ ẹ-ẹrụ ọnyịịla a ye ụbwọ ọdada nyahị myị, ahị kaa chị ọkẹkẹnị gụ ọwọwa.

YẸ IFIM ỌLẸ KỌ RI YE ỌKẸKẸNỊ ỌLẸPWỤ NYA Ọ-HỌ KÁ ANGỊKỊLA KA RI ANGỊJỤGBẸYỊ BWULA Ọ-NWÀ KỊLAHỊ​—MẸ AHYẸẸRWẸRWA JẸ, KANỤ WẸ ỊTỌ ẸLA ILEJI ỊLẸ:

• Ányị Inori à tị́ mẹ ahyẹẹrwẹrwa jẹ ụka ká Agidi á wẹ lụka ka?

• Ányị Inori à tị́ mẹ ahyẹẹrwẹrwa jẹ ụka ká Agidi ya nyori ịnyịrọ nyị chị ọwa pyẹpyẹ nyọka jẹ ang?

• Ányị Inori à tị́ mẹ ahyẹẹrwẹrwa jẹ ụka ká Agidi ya nyori ọ́ ri ọngọ jẹ́-ẹ nwụ ang họ yẹẹyẹẹ ka?