HỊHỊ LALA ANGỊNYỊ NYA ỊKỊRAYỊSỊ
À Ka Jẹ́-ẹ Da Ugbiyegu Nyang Ụbwọ Nyọka Chị Ọkẹkẹnị Gu Ọwọwa
IJihova tịtọ ká ugbiyegu ka chị ọkẹkẹnị. (Eje 127:3-5; Ọngọ 9:9; 11:9) Ma, ọkẹkẹnị nyahị ka gụụhị byi enyi myị ọọlajị nya iwe-ahụrụ ịnyaa-nyaa ịla odehe ọlẹ bala ẹla ọ-jẹ́ họ ka nya angịhyẹ ẹ-ẹpwụ nya ugbiyegu. Ịịyẹ ọngọngọọng ẹ-ẹpwụ nya ugbiyegu à tị́ ka họ nyọka da ugbiyegu nyaa ụbwọ chị ọkẹkẹnị gụ ọwọwa?
Ọrụ-ahụ ka ju ahụ nyamwụ ihi. (1Pit 3:7) Ọ ka bịrị ụka bala ahụ nyamwụ. Ọ́ ka ya ẹhị rịrị ká ahụ nyamwụ ka họ ang ọlẹ kọ kpoye nya ọngịrị nyamwụ ka, ọ tị ka mẹjẹ nyori ang ọlẹ ká ahụmwụ họ họọ bala ugbiyegu myọọ lẹhị. (Kol 3:15) Ọ ka mẹjẹ bwula abwẹla bala ọhọhọ nyamwụ nyori ahụ nyamwụ nyị họ́ọ bala ọ-mịla oja họọ.—Etu 31:28, 31.
Ahụ ka mwahị nya agbẹyị ịlẹ kọ ka da ọrụmwụ ụbwọ. (Etu 31:12) Ọ ka kpa ịlọmwụ keji ha ọrụmwụ bala ọ-tụ kpii yoo. (Kol 3:18) Ahụ ka ya ẹla lọdụmwọọ ta ọrụmwụ bala ụka kọ juwa ya ẹla rwọọ.—Etu 31:26.
Adịda bala ịnịna ka ya ụka ha anyị nyaa. (Ehile 6:6, 7) Ị ka byi anyị nyaa bwu ọnụ nyori nyị há ịịwa. (Mat 3:17) Ụka kị ka ya alibyi laa, ị ka họ ịnyị la ọháha bala omeme labwọ.—Efe 6:4.
Anyị ka ju ihi bala ọ-ke ụrụ la adaa bala ịnaa. (Etu 23:22) Ị ka ya iwe-ahụrụ nyaa bala ẹla ọla irya nyaa ju adaa bala ịnaa. Ị ka ye alibyi myị bala o-ju ihi nya adaa bala ịnaa.—Etu 19:20.
YẸ IFIM ỌLẸ KỌ RI, CHỊ ỌKẸKẸNỊ Ẹ-ẸPWỤ NYA UGBIYEGU NYANG, KANỤ WẸ ỊTỌ ẸLA OLEJI ỌLẸ:
Ịyẹ ọng myị́ ọng à tị́ họ du ká ọkẹkẹnị ji ẹpwụ nya ugbiyegu?
