Ịmayẹ kaa ya ọkịlẹtụ ọ-kpa enyi hahị, ọgụgụ ụka ká ịmayẹ ịịwa a tata gụ abwọlẹ kahị me irya. IDevidi jẹ́ nyori ịmayẹ nya ọwa ịlẹ kị nyị bwu ẹga nya Adịrahụ ịSọlụ nyị ka wẹ ka cheju wẹẹ bala o-ri iJihova ka họ ọnụ ọmyịmyị nyamwụ nyọka hwọọ nya adịrahụ jịra. (1Sam 16:13) Ọmyịmyị ọlala nya iDevidi dọọ ụbwọ nyọka godayị gbe iJihova la ugbodu ojuju.

Ụka ká ịmayẹ a wẹ chịhị ọgụ, ahị ka jẹ́-ẹ kpa ijeehi, ang ọjẹ́jẹ lee ọ-họ ẹla la ịrya nyọka yẹ iwe-ahụrụ nyahị da. (1Sam 21:12-14; Etu 1:4) Ma, iwe-ahụrụ ilujwo ịhyẹ ka ji wẹẹ nanana nyori ahị ka họ ang ọlẹ kahị ka jụ họ myị bwula ọ-kpa itiwe nya ehile ịlẹpwụ nya ịBayịbụụ họ ụkụrwọ. Ẹ-ẹpwụ nya iwe-ahụrụ ịlịnyị, o-ri pyii kahị ka mẹ ugbodu ojuju jẹ bala ọ-ka godayị gbe iJihova. Lụka ọkpịị ọ ka chị akama nyahị wuu eju bala ọ-ka hịlẹ “egbejida hi egbahị” nyahị wuu. (Ọwụ 21:4) Kori ka o-gba kpehe nyahị a wẹ ọọlaji nya ụbwọ ọdada nya iJihova lee ọọlaji nya ang ọkịla wẹwẹ, ang ookpokpo ọlẹ kahị jẹ́ ri: Ịmayẹ ọnyị myị́ ọnyị lụka ọlẹ kị ka cheju. Ẹlịlẹhị ọwẹ ka jẹ́-ẹ ya ẹjẹ ọkpụkpụ hahị.

YẸ IFIM ỌLẸ KỌ RI ANGỊNYỊ Ị-YẸJU LAWỤLẸ Ẹ-ẸPWỤ NYA ODEHE NYA EBWO ỌCHỊCHỊ, KANỤ WẸ ỊTỌ ẸLA ILEJI ỊLẸ:

• Akama iyina Angịnyị nya ịKịrayịsị ịla oye edii nya United States ịhyẹ à tị́ chịpwụrụ bwu?

• Ányị ị tị́ mẹ ugbodu ojuju bala ọháha jẹ?

• Ányị ị tị́ bwu kịnyaa la ọ-ka ya ẹhị rịrị u-uhye nya “ang ọlẹ kọ chịla-chịla gụgụ wuu”?​—Filip 1:10