HỊHỊ LALA ANGỊNYỊ NYA ỊKỊRAYỊSỊ
Ụgbẹyị Ọlẹ Áhị ka Bwu Da ILeta
-
Da ẹnyị nya ẹga ọlẹ ká kụ́ kpangga. Kori ká tị yẹ nyori, ọ́ pwoku nyọka da ẹnyị nya ẹga ka kụ́ ka aalẹ, à ka jẹ́-ẹ da ẹnyị nya ẹga ká Ube nya Ịpyị-Adịrahụ ji myị́, kori ká angịgbahị nya ọjịra-jịra á ya ẹga da hang. A tị da ẹnyị nya ẹga ká egbeju-ẹpwa ji ẹ-ẹpwụ nya iLeta ọọwa ẸNẸNẸHẸ KOO.
-
Da ẹnyị nya ọngọọwa ẹ-ẹpwụ nya iLeta, kori ká jẹ́ ẹnyị nyamwụ. Ọọwa ká dudu kó ka yọọ lala ẹla nya ụkụrwọ nya okpoko ka.
-
Da ẹla ọlẹpwụ nyamwụ bala ịna ị-kpa wa ụpwụ kị́ la kpẹẹkpẹẹ. Myịmyị kpa omyi ẹla ịlẹ kị́ pwoku ụ-ụrụ. ILeta ọọwa chịla kọ́ ka la kpakpa ọkọkọ nyọka ju egbeju ka. Kori ká dọọ lụbwọ, maga kọ́ há yẹẹyẹẹ chajị kọ́ ka chịkpẹẹ la ọwawa. Ẹla ọlẹpwụ nyamwụ a la ọngịrị lụmẹ ka. A tị dọọ kọ́ lala ẹla nya ụmwara ka ịnyịnyị.
ILeta ọlẹ kị́ da mẹjẹ lẹẹ, da ahị nya ẹla iluhye ịwẹ wụlẹ gụ ọwọwa. Ọọwa á tị ri yẹkẹẹ, ahị ka da ẹla ọlụwa wuu ju ang ụka káhị tịtọ nyọka da iLeta du kịla ọngịnyị o-oye nyahị ka. Dọọ ụ-ụgbẹyị ọlẹ kọ́ ka pwoku iwe-ahụrụ bala ọhọhọ ọla oye nyang, bala ẹla ọlẹ ká tịtọ nyọka ya ẹ-ẹpwụ nya iLeta ọọwa ịnyịnyị.