IFim bala iFoto kaa du ká ọngịnyị kaa ke ụrụ la ang ọlẹ kọ́ juwa jé, bala ọ-ka dọọ ụbwọ jẹ́ etu nya ang ọlẹ kị́ wẹẹ mẹjọọ bala ọ-kpịtịya nyaa ịnyịnyị. IJihova, Ọngọ Mẹjẹ Ọgụgụ wuu kaa kpa ang ịlala ụma ịlịịwẹ mẹ ẹla ịkpọngchị jẹ. (Ọmw 15:5; Je 18:1-6) Ịnyịnyị, IJisọsị Ọngọ Mẹjẹ Ọtụka, á kaa họ lẹ. (Mat 18:2-6; 22:19-21) Ang-abwọ ọkpọngchị ọhẹ ọlẹ kọ́ ju apyobwuna yẹẹyẹẹ lẹẹlẹẹ à ri iFim ẹẹ. À kaa mẹ iFim jẹ angịlẹ á kaa jẹ́ ịBayịbụụ ta, ụka ká juwa mẹ ang jaa?

Ị họ iFim iwo (10) ịlẹ kị́ ka jẹ́-ẹ dahị ụbwọ mẹ egbeju nya ẹla ịlẹpwụ nya ụpwụ nyahị ọlẹ kọ ri, Oja Ọnyịịla o-Bwu Ẹga nya Ohe Oluhye! jẹ yẹẹyẹẹ. Egbeju nya iFim ọnyọnyọọnyị pwoku ịtọ ẹla ịlẹ kị́ da kpọyịị wẹ ẹ-ẹpwụ nya ụ-ụpwụ ọwẹ. Ị tị họ ụpwụ ọwẹ ọlẹ kọ ju ị-ịwẹbsayịtị nyahị, ụ-ụgbẹyị ọlẹ kọ ka jẹ́-ẹ kpụhị ịtịya nya ụka ọlẹ kọ́ baba káhị ka mẹ iFim ọnyọnyọọnyị jẹ. Ịnyịnyị, iFim ịkịla juwa ịlẹ kị́ da ẹla ịlẹpwụ nya Apwụ Ịlẹ Áhị Kaa Kpa Mẹ Ang Jẹ wụlẹ gụ ọwọwa.

A juwa mẹ ang jẹ u-uhye nya egbeju nya ẹla ọlẹ ká yẹ nyori, ọ ka lujwo ha ọngọlẹ á kaa jẹ́ ịBayịbụụ ta la ọjẹ́jẹ? Lee, ọngọlẹ á kaa jẹ́ ịBayịbụụ ta juwa chịpwụrụ bwu ẹpwụ nya ọmayẹ ọhẹ? Mwahị kekeeke ka jw.org bala JW Broadcasting, nyọka yẹ iFim ọlẹ kọ ka jẹ́-ẹ dọọ ụbwọ. Kori kọ́ háng, ahụ bala ọngọlẹ á kaa jẹ́ ịBayịbụụ ta ka yẹ iFim ọọwa bala ọ-ka ya ẹla u-uhye nyamwụ lawụlẹ myị́.

Ọya ọnyị myị́ ọnyị, ị kaa gba iFim inyeewe-inyeewe kpehe. Ụka ká juwa yaa, kụ irya jaabwọ ọlẹ á ka bwu kpa mẹ ang jẹ angịkịla.