Lụka kpii, ugbodu ojuju nya iJihova ẹ-ẹga nya odehe ọlẹ ka cheju. Ịgba ọgbagba nya ịnịịkịla wuu ka tayịreji, ọtụchawụlẹ nya alẹpwụma nya odehe wuu ka gba mịla angịnyị nya Ohe Oluhye, ụka ọọwa iJihova ka ta angị ịnyịbyị wuu ayịreji ẹ-ẹwụ nya Amagẹdọn. Angịnyị nya ịKịrayịsị wẹẹ yẹhị rịrị gbe ụka ká ang ịkpọnchị ịwẹ ka họ.

Ịlẹhị lẹ, áhị jẹ́ ang myị́ ang wuu chẹrị-chẹrị u-uhye nya akama ọtụka okpelego ka. Ọ-chụ pwokwita, áhị jẹ́ ụka ọlẹ kpangga kọ ka dọmwụ ka. Áhị jẹ́ ẹla ọlẹ ká alegbeju i-kpeji ka ya nyọka rụ ịlaa ịgba nya ang odudu kị wẹẹ gba mịla ala ịgba ọgbagba ka. Áhị jẹ́ jaabwọ ká alẹpwụma ka gba mịla angịnyị nya Ohe tata kaka ba ka lee ang ọlẹ kọ juwa ẹ-ẹpwụ nyọọwa wuu ka. Áhị jẹ́ ang ọlẹ kpangga ká iJihova wẹẹ ka kpa ta angị inyibyi ayịreji ẹ-ẹwụ nya Amagẹdọn ka.

Ma, Ụpwụ Ịgọgọ ya ala ịlẹ kahị baba wuu jehi chajị kahị ka jẹ́-ẹ yẹhị rịrị gbe ijuju ọọwa la ahị ọdahile bala ugbodu ojuju. Ọ-chụ pwokwita, ahị jẹ́ nyori ahị jam hịhị lẹẹlẹẹ o-ocheju nya ụka “ohyẹẹkpẹ nya odehe ọlẹ.” (2Tim 3:1) Ahị jẹ́ nyori ụka kị ka gba mịla ịgba ọgbagba, ị ka “chị ụtụrụ ọọwa eku kpikpiri” chajị ká ịgba ọgbagba nyịlẹhị á ka tayịreji ka. (Mat 24:22) Ahị jẹ́ nyori iJihova ja chị angịnyị nyamwụ da. (2Pit 2:9) Ahị myịmyị jẹ́ nyori Ọngọlẹ ká iJihova chụ kọ ka ta angị ịnyịbyị ayịreji bala o-chewu ke ịrụ nya angịnyị ri ọlabwẹla ọnyịịla bala ọ-la ọngịrị ọtụka-ọtụka.—Ọwụ 19:11, 15, 16.

Ang ịlẹ kị wẹẹ ka họ ị-ịlahị ka luhi-uhi lụmẹ du kọ ka “chị́ angịnyị ehe wuu enikpi.” Ma, bwula ọ-kụ irya reee ju agbẹyị ịlẹ ká iJihova bwu chị angịnyị nyamwụ da lụka ịkẹkpẹ, ahị ka jẹ́-ẹ “hu ẹhị [nyahị] hwaa ka uhye,” la ahị ọdahile nyori ọchịda nyahị juwa ju chwẹẹ lẹ.—Luk 21:26, 28.