Dọmwụ bwu ẹka ọlẹ, ahị ka ye ụka yẹẹyẹẹ nyọka nwụlanọ gbe ọ-Họ Kpa Kpịtịya nya igu nya ịKịrayịsị. Kori ká ọhọhọ ọwẹ á pwoku ahyẹẹnụ ọhẹ ẹ-ẹpwụ nya epwihi aalẹ, Ọjịra-jịra nya Ọhịhị Bala Ụkụrwọ Nyahị Ahị Angịnyị nya ỊKịrayịsị, ị́ ka ji la epwihi ọọwa ka. Kori kó ti pwoku omyimyi nya epwihi aale, ẹla oyaya bwu ịBayịbụụ bala Watchtower Ọjẹ́jẹ á ka ji la epwihi ọọwa ka ịnyịnyị. À ka jẹ́-ẹ kpa ụka ọlẹ kọ́ wẹẹ ka hi hang họ ụkụrwọ hiigu-hiigu myị́? Jaabwọ kọ́ la loyi ọhọhẹ, ẹga ọ-nwụlanọ kaa ji chajị nya ọhọhọ ọwẹ loyi nyahị ọlẹ ịnyịnyi. (Lu 22:7-13; km 3/15 1) Ma, ang ịkịla tị ji ịlẹ kị́ baba káhị ka họ, chajị nyọka ye apyobwuna yẹẹyẹẹ bwu ọhọhọ ọwẹ ịnyịnyị. Ịyẹ ahị tị́ ka họ?

• Kụ irya ju ang odudu ọlẹ kọ́ baba káhị ka juwa ọọjịra-jịra ọwẹ.—1Kọ 11:23-26

• Kịnyaa la abwọ ọrịrị bala ọ-kụ irya ju igu oriri nyang bala iJihova yẹẹyẹẹ.—1Kọ 11:27-29; 2Kọ 13:5

• Myịmyị wa apwụ nyahị ịlẹ kị́ da etu nya ọ-Họ Kpa Kpịtịya nya igu nya ịKịrayịsị wụlẹ bwu ẹpwụ nya ịBayịbụụ bala ọ-kụ irya jwaa yẹẹyẹẹ ịnyịnyị.—Jọn 3:16; 15:13

Aanahị ịhyẹ kaa wa ịBayịbụụ ọwawa nya ọ-Họ Kpa Kpịtịya nya igu nya ịKịrayịsị ịlẹ kị́ ju ụ-ụpwụ ọlẹ kọ ri, Examining the Scriptures Daily bala ọ-kụ irya jwaa kpori-kpori. Angịkịla kaa wa ịBayịbụụ ịlẹpwụ nya akpa oleji ọlẹ. Angịkịla myịmyị tị kaa wa apwụ nya Watchtower ịlẹ kị́ ya ẹla u-uhye nya ọ-Họ Kpa Kpịtịya nya igu nya iJisọsị bala ọháha ọlẹ ká iJihova bala iJisọsị mẹjẹ ẹ-ẹga nyahị. Ang ọjẹ́jẹ u-uhye nya iJisọsị ọnyị myị́ ọnyị ọlẹ ká chụ nyọka jẹ́ lụka ọwẹ ịnyịnyị, ka dang ụbwọ nyọka tụ́ ju iJihova bala iJisọsị ọnyị nyamwụ chwẹẹ.