Ọ-kaa háng nyọka kpa ifim bala ịtọ ẹla ị-gba irya kpehe ịlẹpwụ nya ụpwụ nya Chị Ọkẹkẹnị Gboyi Myị́ Oyi! họ ụkụrwọ? Apa ịlẹ kị ri “Angịhyẹ Kaa Yẹkẹẹ,” “Ụkụrwọ ọlẹ á ka họ,” bala “Jẹ́ Ang Ịlẹ Dọọ u-Uhye” tị bẹẹ? Apa ịkịla iyina a tị́ me irya kị ka dang ụbwọ myị jaabwọ ọlẹ ká wẹẹ họ ụkụrwọ nyọka họ ká angịkịla ka wẹ ka ri angịjụbẹyị nya iJisọsị?—Mat 28:19, 20.

Apwụ Bala Ifim: Kori kọ háng nyọka jẹ́ ịBayịbụụ bala ọngịnyị la ụpwụ ọlẹ kị gba kpehe tị bẹẹ, ányị a tị́ ka họ ká ka yẹ ifim bala omyi ẹla ị-kịla ju ịkịla ẹ-ẹga ookpokpo myị? Ọ-ọlẹpwụ nya ifon, a ka jẹ́-ẹ chụ ụpa ọhẹ bwu ẹpwụ nya apa ine ịlụwa. E-ekpeleji nya egbeju nya ang ọjẹ́jẹ, á ka jẹ́-ẹ chụ ifim ịlẹ kị ri ịnya ụpa ọọwa kpangga. (Yẹ ifoto 1.)

Ang ọlẹ kọ ri “Ụrụrụ”: Kori á ja jẹ́ ang bala ọngịnyị la ọlẹpwụ nya ifon, ọ-ka há kori ká kpa ang ọlẹ kọ ri “Ụrụrụ” lụka ọdatị-datị ụka nya ang ọjẹ́jẹ nyanụ. Ẹ-ẹpwụ nya ang ọjẹ́jẹ ọọwa, yụbwọ ba ịna ịta ọluhye-ọgba ụwa ẹ-ẹbẹ ọọwa ka chụ “Ụrụrụ.” Abwụma ọ-yẹda ọlịnyị ka dang ụbwọ nyọka juwa kụ irya u-uhye nya abwọlẹ ká ang ọlẹ kanụ wẹẹ kpa jẹ́ gu egbeju nya ẹla nya ang ọjẹ́jẹ ọwẹ. Nyọka tịrẹkpẹ ka abwụma ọlẹ kọ ji ene-ene, yụbwọ ba ịna ịta ọluhye-ọgba ká chụ ẹga ọlẹ kọ ri “Ang Ọdada.”

“M̀ Nwụlanọ lẹ?”: Akpa ịwẹ kị juwa ọ-ọbaba nya ụpwụ ọwẹ gba ahị nya ẹla kpehe u-uhye nya ang ịlẹ ká ọngịnyị ka họ ene kọ ka jẹ́-ẹ kpa ẹrụ ọnyịịla pyẹ bala alọjịra-jịra bala ọ-ka hu enyi Ohe. (Yẹ ifoto 2.)

Ọdawụlẹ Ọlẹkpẹ: Ọdawụlẹ Ọlẹkpẹ kaa da ẹla wụlẹ gụ ọọwa u-uhye nya egbeju nya ala ịlẹ kị baba yẹẹyẹẹ. Ụpwụ ọlẹpwụ nya ifon la ang ẹjẹẹ e-ekpeleji nyamwụ kọ ka kpang tịrẹkpẹ ká ẹga ọlẹ kanụ ji ene-ene ẹ-ẹpwụ nya ang ọjẹ́jẹ. (Yẹ ifoto 2.)