HỊHỊ LALA ANGỊNYỊ NYA ỊKỊRAYỊSỊ
Juwa Kụ Ọlọyị Gboo Giri-giri ẹ-Ẹpwụ nya Ugbodu Ojuju
Ányị a tị́ dayị gbe Ịpyị-Adịrahụ nya Ohe Oluhye tata ka ba? À juwa bọhụ ẹ-ẹpwụ nya akama? (Rom 8:25) Iru nya angịnyị nya ịKịrayịsị kaa wụ́ angịnyị ẹjẹ, ị kaa haa ẹla ọkịrọrọ, waa ju agba, lee ọ-dọmwụ tịtọ nyọka nwaa nwụ. Angịkịla nyaa la ịmayẹ lala ẹdụrụ ọnyọọngịrị ọ-jwaa jụ bala okwirichi ọchịchị.
Ịyẹ à tị́ ka dahị ụbwọ kụ ọlọyị giri-giri ẹ-ẹpwụ nya ọmayẹ ọnyị myị́ ọnyị? Ahị baba nyọka ju ọmyịmyị nyahị ọngịrị ẹnụ myị́ ẹnụ bwula ọ-wa ịBayịbụụ bala ọ-kụ irya ju ẹla ọlẹ kahị wa kpori-kpori. Ahị ka ya irya nyahị nịrọ ẹhị ọrịrịị-rịrị nyahị. (2Kọr 4:16-18; Hib 12:2) Ahị ka bịlẹ iJihova ẹ-ẹpwụ nya abwọ ọrịrị kọ ka ya ọngịrị nya olegu ịgọgọ hahị. (Luk 11:10, 13; Hib 5:7) Adịda ọnyịịla nyahị ka jẹ́-ẹ dahị ụbwọ “kpa ọkẹkẹnị ọchịchị ọtụka la ugbodu ojuju pwụ ọbaba.”—Kol 1:11.
YẸ IFIM ỌLẸ KỌ RI, O RI OPYII KAHỊ KA KPA “UGBODU OJUJU ONYUDIYO RỤNYẸ” LẸ—LA AHỊ ỌDAHILE NYỌKA YE ANG-OGU ỌỌWA, KÁ WẸ ỊTỌ ẸLA ỊLẸ:
-
Ẹla ịlẹ kahị “yahị me-ka” iyina à tị́ ka chịhị́ ọgụ myị́ ọ-ọhịhị? (Ọng 9:11, NW )
-
Ányị abwọ ọrịrị à tị́ ka dahị ụbwọ ụka kahị juwa ẹ-ẹpwụ nya ịmayẹ?
-
Kori kahị jụ́ họ lụmẹ ẹ-ẹpwụ nya ụkụrwọ nya iJihova jaabwọ kahị kaa họ ene-ene ka, ịyẹ tị́ du kọ baba nyahị ọ-ka ya irya nyahị rịrị u-uhye nya ang ọlẹ kahị ka jụ́ họ lẹẹlẹẹ?
-
Ịyẹ à tịị dang ahụ ụbwọ nyọka la ahị ọdahile nyori à ka ye ang-ogu ọwẹ pyii?