ANG ODUDU ỌLẸ KỌ́ BABA: O ri opyii ká angịnyị ka wụrụ ẹnyị nya iJihova ene kị ka la ọchịda lẹ. (Rom 10:13,14) Ma, ọ-ọng myị́ ọng ọlẹ kọ myị jẹ́ ịBayịbụụ balahị à kaa tịtọ nyọka ba ehile nya iJihova jẹ ka. Ahị ka kpa ụka nyahị họ ụkụrwọ yẹẹyẹẹ bwula ọ-da angịlẹ kị tịtọ nyọka yẹda kaka họ ẹla kpụ iJihova ịpyọ, ụbwọ. Kori kọ nọ chẹẹ, kahị yẹ nyori ọngọlẹ kahị-ị̀ jẹ́ ịBayịbụụ ta á nwà kịlahị ka aalẹ, ọ ka há gụ kori kahị hwabwọ la ang ọjẹ́jẹ ọọwa, kahị kpa ụka nyahị ka ẹga nya angịlẹ ká iJihova wẹẹ gbile wẹ ogu nyamwụ. (Jọn 6:44) Kori kọ tị nọ chẹẹ, kahị yẹ nyori ọngọọwa yẹda bala ọmẹjẹ bwula abwẹla nyamwụ nyori ọwa nyị nwụlanọ nyọka la ọhịhị ọmyịmyị-ka aalẹ, ọ ka kpụhị ịpyọ nyọka dọmwụ nya ịBayịbụụ ọjẹ́jẹ balọọ myịmyị.—Ụkụr 13:48.

JAABWỌ ÁHỊ KA BWU HỌ ỊNYỊ:

• Ji ọngọlẹ ká wẹẹ mẹ ang jẹ obe ọhọhọ nyọlẹ kọ tịtọ nyọka jẹ́ ẹla ọlẹpwụ nya ịBayịbụụ kpori-kpori.—1Tim 2:4

• Ya ẹla kpori-kpori u-uhye nya ang odudu kọ baba nyọka kpa ẹla ọlẹ kọ wẹẹ jẹ́ họ ụkụrwọ.—Luk 6:46-49

• Ya ẹla balọọ u-uhye nya ọ-chụ pwokwita nya ọngọ hụ ajẹ nya iJisọsị, ká byoo nyị kụ irya kpori-kpori u-uhye nya ang ọlẹ kọ wẹẹ woo kpa la ọ-kpa ẹla ọlẹ kọ jẹ́ họ ụkụrwọ.—Mat 13:18-23

• Ya ang odudu ká wẹẹ ka hwabwọ la ịBayịbụụ ọjẹ́jẹ ọwẹ joo; a tị yoo ụ-ụgbẹyị ọlẹ kọ ka wọọ ẹjẹ ka

• Ya joo nyori ahụ nyị ka kele kaka jwoo ọhụ ụka ọhẹ bala ụka ọkịla, kori kọ ti yẹda, anụ nyị ka jẹ́-ẹ jẹ́ ịBayịbụụ lawụlẹ myịmyị wẹẹ

YẸ IFIM ỌWẸ, KÁ WẸ ỊTỌ ẸLA ILEKPELEJI ỊLẸ:

• Ẹ-ẹpwụ nya ẹla oyaya nyaa ọwẹ, ẹlịyẹ a tị́ yẹ kọ mẹ jẹ́ng nyori ọlẹng ọwẹ á nwà kịlahị ẹ-ẹpwụ nya ang nya olegu ka?

• Ányị ọọnahị ọwẹ à tị́ dọọ ụbwọ jẹ́ nyori ọ baba nya ọwa ọ-ka nwụhọ?

• Ányị ọọnahị ọwẹ à tị́ họ ká ọlẹng ọwẹ ka jẹ́ nyori, ịBayịbụụ ọjẹ́jẹ nyaa ọwẹ nyị ka jẹ́-ẹ dọmwụ myịmyị wẹẹ?