Lụka ọlẹ ká iJisọsị jam odehe ọlẹ, ọ kaa ya ẹla yẹẹyẹẹ ụ-ụhyẹ nya ehile ọlẹ kọ ya: “Anụ Ju Ihi nya Adanụ Bala Ịnanụ.” (Mat 15:4;Ehe 20:12) IJisọsị jẹ ju angịkịla ọhụ ịnyị myị, chajị owa lịlọmwụ kaa ju “ihi” nya adamwụ bala ịnamwụ bwu ụka nya onjwo-onjwo nyamwụ. (Luk 2:51) Ụka ọlẹ kọ nwa kaka ri ọngọgbahị, ọ maga nya ịlẹhị-ịlẹhị kị́ ka jụwa kpẹhị rịrị ịnamwụ kori kọ gbugbu kpá wẹwẹ.​—Jọn 19:​26, 27.

Lụka nya oyi nyahị ọlẹ ịnyịnyị, anjwo ikolobya bala ịyẹẹnọ ịla ogu nya iJihova ịlẹ kị́ kaa ke ụrụ dụmwọ wo ẹla nya adaa bala ịnaa bala o-ya ẹla taa ụ-ụgbẹyị ọlẹ kọ pwokwu, mẹ ihi ọtụka-ọtụka jẹ ẹ-ẹga nyaa. kori ká adahị bala ịnahị a chị okwirichi wẹwẹ, ahị ka kịnyaa la ọ-jwaa ihi bwula ọ-kẹ ụrụ wo ẹla ọmẹjẹ nyaa. (Etu 23:22) Ahị ka myịmyị-ị ju adahị bala ịnahị ihi ụka kị́ ri angịgbahị bwula, ọ-kpẹhị rịraa bala ọ-ha ịbaba nyaa haa. (1Tim 5:8) Kori kahị ri onjwo lee ọngọgbahị, ẹla o-ya ta adahị bala ịnahị ụ-ụgbẹyị ọlẹ kọ pwokwu, a ri itiwe nya ihi ojuju ẹ-ẹga nyaa lẹ.

YẸ IFIM NYA IFOTO IGBE-IGBE ỌLẸ KO RI; ÁNYỊ M TỊ KA BWU YA ẸLA TA ADAM BALA ỊNAM?, KÁ WẸ ỊTỌ ẸLA ỊLEKPELEJI ỊLẸ:

• Ịyẹ tị́ du ọ kaa lujwo nyọka ya ẹla ta adang bala ịnang ụka ọhẹ?

• Ányị a tị́ ka bwu ya ẹla ụ-ụgbẹyị ọlẹ kọ lihi-ihi ta adang bala ịnang?

• Ịyẹ tị du ká aga ọmama nyang nyọka ya ẹla ta adang bala ịnang hiigu lụmẹ? (Etu 15:22)