Kụ irya nyori à juwa ịGalili lụka nya iJisọsị wẹẹ. À hu ang ka ju ka iJerusalẹm nyọka họ ọhụhụ nya Adáa. IJerusalẹm myị̀ la iru nya angịnyị lụmẹ-lụmẹ ịlẹ kị warị bwu ẹga ọlụrụ datị-datị nyọka họ ọhụhụ ọwẹ ịnyịnyị. À titọ nyọka kiliya ha iJihova ọọwa le, á dọmwụ nya ẹdịyẹ ọwẹ la ẹmwụ ụbwọ juwa be bwụụ bwu ẹpwụ nya iru nya angịnyị ya ahị da ka ube ịgọgọ lẹlẹ. Ụka ká pwụ ụwa, à ya iru nya angịnyị kị hyị ọgba juwa tịtọ nyọka kiliya ịnyịnyị. Ọ nọ pyịnyẹng lẹ, ụka-à hi pwụng nyọka ya ẹmwụ nyang ha ọngọkiliya ẹẹ. Lụka ọwẹ, á kpịtịya ahyaahi nyori ahụ bala ọọnang nyị ya ẹla ju awụlẹ, ọhẹka, ọ-ka juwa ẹ-ẹpwụ nya iru nya angịnyị ịwẹ lee epweji ọwẹ myị́. IJisọsị ya ẹla ọlẹ ọcḥila á ka họ. (Wa ịMatiyu 5:24.) Ányị ahụ bala ọọnang à tị ka bwu họ okpunyi lawụlẹ jaabwọ ká iJisọsị yaa? Ẹ-ẹpwụ nya omyi ẹla ịlẹ kị da e-ekpeleji wẹ́, ya ịna chị ọwẹwẹ ọlẹ ká jẹ́ nyị hágụ.

Ọ CHỊLA Á KA . . .

• ya ẹla bala ọọnang kori á jẹ́ myị́myị́ nyori ẹla nyang nyị kpọ wọọ ẹjẹ kem ịnyị

• maga nyọka nwụ ọọnang rịrị kori á yẹ nyori ẹla kaa wọọ ẹjẹ hyahya lụmẹ, lee à me irya nyori ọ labị ẹ-ẹpwụ nya ẹla ọwẹ ịnyịnyị

• ke ụrụ dụmwọ wo ẹla nya ọọnang ụka kọ juwa ya ẹla. Kori ka yẹ nyori a labị ka wẹwẹ, ya ụbwọ beji họọ bwu ọkịlẹtụ nyang u-uhye nya ẹla ọlẹ ka họ dudu kọ wọọ ẹjẹ wẹẹ

ỌỌNANG CHỊLA Ọ́ KA . . .

• kpa ẹla ọlẹ ká họ wọọ ẹjẹ pyẹ ya ju angịkịla ọọjịra-jịra

• hu ẹpẹpẹ jung bwula o-ya abị ọlẹ ká họ wuu jeng kwẹngkwẹng, bala ọ-tịtọ á ka myị ọnụ nya abị gbaa

• kpịtịya jaabwọ ọlẹ ká kpa ịlọng keji bala ọ maga nya ịlẹhị-ịlẹhị ene ká jẹ́ wẹẹ ka ẹga nyamwụ, ọọwa lẹ, ọ hịnyọhi hang bwu ẹpwụ nya ọkịlẹtụ lẹlẹ

Ọ ri ịnyịlẹhị nyori áhị kaa kpa iyo kaka kiliya alẹ kaka. Ma, ẹlịyẹ iJisọsị à tị wẹẹ mẹjẹ u-uhye nyọka họ okpunyi bala aanahị bala Ohe Oluhye ọ-ka ye ịgba ọgbagba nyahị myị?