Ọ-kaa kpa adịda bala ịnịna ịlẹ kị́ ri angịnyị nya Ohe ịpyọ nyọka yẹ nyori anyị nyaa nwa ka ri anchẹ nya iJihova ịla ọmyịmyị. Adịda bala ịnịna ka daa ụbwọ nyọka họ ịnyị myị́ bwula ọ-ka mẹ ẹla ọla ịBayibuu jaa yẹẹyẹẹ bwu eji-eji. (Ehi 6:7; Et 22:6) Ọ kaa lujwo la ọhọhọ ụka ọhẹ? Ee, ọ-ọlịnyị! Ma, ọngọ tọ la abwiye-abwiye ka wọ la abwiye-abwiye ịnyịnyị.​—3Jọn 4.

Ang lụme-lụmẹ ji ká adịda bala ịnịna ka jẹ́-ẹ jẹ́ bwu ẹga nya iJosẹfụ bala iMeri. “Ẹka myị́ ẹka wuu, adịda bala ịnịna nya iJisọsị kaa kele ka iJerusalem ụka nya ọjịra-jịra nya Ang Oriri Ọchịpwụrụ,” nanana nyori ị kaa maga yẹẹyẹẹ ene bala ọ-bịrị okpoko (Lu 2:41) Ọwẹ mẹjẹ nyori, ugbiyegu nyaa ọ-ka tụ ju iJihova chwẹẹ baba haa gụ ang ịkịla wuu. Adịda bala ịnịna ka jẹ́-ẹ mẹ ụgbẹyị ọnyịịla jẹ anyị nyaa alẹ ịnyịnyị bwula ọ-kpa iwe ọlẹ kị la mẹ ang jaa, bwula ẹla oyaya bala abwẹla nyaa.​—Eje 127:​3-5.

YẸ IFIM ỌLẸ KỌ RI, Ị KPA IWE ỌNYỊ MYỊ́ ỌNYỊ ỌLẸ KỊ́ LA, KÁ WẸ ỊTỌ ẸLA ILEJI ỊLẸ:

• Ányị Jon bala Sharon Schiller à tị́ bwu hu ang nya olegu kụ ịlahị jene-jene ẹ-ẹpwụ nya ugbiyegu nyaa?

• Ịyẹ tị du ká adịda bala ịnịna ka mẹ ang jẹ, kpẹhị rịrị bala ọ-nwụ ọnyị nyaa ọnyọnyọọnyị rịrị ụ-ụgbẹyị ọdatị-datị?

• Ányị adịda bala ịnịna à tị́ ka da anyị nyaa ụbwọ nyọka godayị giri-giri ụka nya ịmayẹ?

• Ang abwọ iyina bwu ẹpwụ nya ịlẹ ká ogu nya iJihova họ á tị́ kpa da anyị nyang ụbwọ nyọka nwa kịlahị-ịlahị ẹ-ẹpwụ nya ang nya olegu?