Ẹ-ẹpwụ nya Ehile nya iMosisi, ọrụ-ahụ ọlẹ kọ́ tịtọ nyọka pwa ahụ nyamwụ ka da ụpwụ nya awụlẹ ọpwa-pwa pyii lẹ. Ọọwa du ká angịnyị-ị́ ka pwa awụlẹ ododoodu ịnyị ka. Ma, lụka nya oyi nya iJisọsị, aligbeju ị-mẹ ẹla nya Ohe jẹ họ awụlẹ ọpwa-pwa chịkpẹẹ. Ọrụ-ahụ ka jẹ́-ẹ pwa ahụ nyamwụ ụ-ụgbẹyị ọnyị myị́ ọnyị myị́. (Ang ọjẹ́jẹ ịla nwtsty bwu ịMak 10:​4, 11) IJisosi mẹjẹ gede-gede nyori iJihova à ri ọmwụ odada bala itiwe nya awụlẹ oyeye lẹ. (ịMakị 10:​2-12) Ahụ bala ọrụ chịla kị ka ri “ọngọ ookpokpo” ẹ-ẹpwụ nya awụlẹ oyeye nyaa gbe oyi myị́ oyi. Ẹla ọlẹpwụ nya ụpwụ nya ịMatiyu mẹjẹ nyori ụgbẹyị ọlẹ ká ịBayịbụụ myị ọnụ ju nya awụlẹ ọpwa-pwa kẹnẹ-kẹnẹ à ri ‘ụya ọhọhọ’ lẹ.​—Mat 19:9.

Angịnyị lụmẹ-lụmẹ alẹ, á kaa yẹ awụlẹ oyeye ụ-ụgbẹyị ọlẹ ká iJisọsị yọọ ka, ma ị kaa yọọ lala ala ịFarịsii. Ụka ká akama-á ji u-ugbiyegu, awụlẹ ọpwa-pwa alodehe à kaa tịtọ nyọka kpa myọọ lẹ. Angịnyị nya ịKịrayịsị-ị́ tị kaa kpa iro ọnwanwa nya awụlẹ oyeye nyaa kọ ayịlọ ka, ị kaa maga nya ịlẹhị-ịlẹhị nyọka kụrụ akama ọnyị myị ọnyị ọlẹ kọ́ wẹ ẹga nyaa bwula ọ-kpa ẹla ọlẹpwụ nya ịBayịbụụ họ ụkụrwọ. Yẹ ifim ọlẹ kọ ri: Ọháha bala Ihi Ojuju Du ká Ugbiyegu Kaa Ye Ju Lawụlẹ, ká wẹ ịtọ ẹla ilekpeleji ịlẹ:

• Ányị a tí ka bwu kpa ẹla ọla ụpwụ nya Etu 15:1 họ ụkụrwọ ẹ-ẹpwụ nya awụlẹ oyeye nyang? Ịyẹ tị́ du ká ẹla ọwẹ baba?

• Ányị a tí ka bwu cheji ba hi akama bwula ọ-kpa ẹla ọla ụpwụ nya Etu 19:11 họ ụkụrwọ?

• Kori ká o-wo lawụlẹ ka á ji ẹ-ẹpwụ nya awụlẹ oyeye nyang, ọkọkọ nyọka kụ irya nyori, ‘Áhị pwa awụlẹ mẹẹ?’ Ịtọ ẹla iyina a tị́ ka kụ ẹhị yẹ?

• Ányị a tị́ ka họ nyọka ri ọrụ-ahụ lee ahụ ọnyịịla bwula ọ-kpa ẹla ọla ụpwụ nya ịMatiyu 7:12 họ ụkụrwọ?