‘Ọ chịla kánụ ka ri ịtịcha ị-mẹ ẹla nya Ohe Oluhye jẹ.’ (Hib. 5:12) Kụ irya ju ẹla ọwẹ wẹẹ! IJihova—ọngọlẹ kọ́ ri ịtịcha ọgụgụụgụ wuu wụrụụhị nyọka mẹ ẹla nyamwụ jẹ angịkịla! Lẹ, ụkụrwọ nyọka mẹ ẹla nya ịlẹhị u-uhye nya iJihova jẹ—ẹ-ẹpwụ nya ugbiyegu, ọọjịra-jịra, lee ẹ-ẹpwụ nya ẹrụ ọnyịịla ọ-kpa pyẹ—ri iwe ọtụka-ọtụka bala ụkụrwọ ọnyọọngịrị. Ahị tị́ ka họ ányị káhị ka họọ myị́?

Ahị ka ye ọwẹwẹ nya ịtọ ẹla ọwẹ bwu ụpwụ ọlẹ ká ịPọlụ, ọngọjụgbẹyị nya ịKịrayịsị da kịla iTimoti: “Aa cheri ká juwa kpa ụka nyang bala ọngịrị nyang wuu họ ụkụrwọ nya Ụpwụ Ịgọgọ ọwawa je angịnyị bala o-juwa kpa ẹla nya Ohe Oluhye gbile angịnyị ụbwọ ụ-ụrụ bala ọ-juwa mẹ ẹla nya Ohe Oluhye jẹ angịnyị . . . mẹ.” ỊPọlụ myịmyị yẹkẹẹ, “Bwula ụgbẹyị ọlịịwẹ, ahụ ayịdang bala angịlẹ ká juwa mẹ ẹla nya Ohe Oluhye jẹ, a ka bwu wu ọchịda . . . ọyị myị́” lẹ. (1 Tim. 4:13, 16) Oja ọlẹ kọ́ ka chị ọhịhị da, a wẹẹ kpa pyẹ lẹ. Ịnyị à dudu kọ́ baba ká ka maga nya ịlẹhị-ịlẹhị nyọka wa ụpwụ bala ọ-mẹ ang jẹ yẹẹyẹẹ lẹ. Ụpwụ ọlẹ ka dang ụbwọ nyọka jẹ́-ẹ họ ịnyị. Kụ ẹhị yẹ ang ịlẹpwụ nyamwụ ịhyẹ lẹẹ wẹẹ.

IJihova à ri ọngọ ‘mẹ ang jẹ’ ọlẹ kọ́ gụgụụgụ wuu lẹ. (Ayị. 30:20) O ri nyịlẹhị nyori ụpwụ ọlẹ ka dang ụbwọ nyọka jẹ́-ẹ wa ụpwụ bala ọ-mẹ ang jẹ yẹẹyẹẹ. A tị deeri nyori iJihova à la ẹrụ ọnyịịla ọlẹ káhị wẹẹ kpa pyẹ bala ọ-kaa gbile angịnyị ba ịlọmwụ ịnyịnyị lẹ koo. (ỊJọn 6:44) Lẹ, raabwọ bịlẹ olegu ịgọgọ bala ọ-mẹ ang jẹ bwu ịBayịbụụ ụka myị́ ụka. A họ ká irya nya angịnyị à ji ẹga nyang, gụ ẹga nya ẹla nya iJihova ẹnẹnẹhẹ ka. Ọkọkọ nya ọọwa lẹ, maga ká da angịnyị ụbwọ nyọka la ọháha ha iJihova bwu ọkịlẹtụ nyaa.

Ohe Oluhye wụrụng nyọka mẹ ang ọlẹ kọ́ gụgụ wuu ám̀ odehe jẹ angịnyị. Ahị la ahị ọdahile nyori, à ka jẹ́-ẹ jụ ụkụrwọ ọwẹ họ myị́ bwula ọ-kpụnịrọ “ọngịrị ọlẹ ká Ohe Oluhye” kaa ya ha ọngịnyị.—1 Pit. 4:11.

Ahị angịmẹjẹ ịkịla

Governing Body nya Alibeenu nya iJihova