EGBEJU 5
Ịyẹ À Tị́ Ri Irya nya Ohe Oluhye u-Uhye nya Odehe Ọlẹ?
1. Ịyẹ à tị́ du ká Ohe Oluhye họ odehe ọlẹ?
IJihova họ odehe ọlẹ ha angịnyị ehe nyọka kụ am̀ ịnyị. Ẹpwa nyahị o ri lẹ. Lẹ, ọ́ họ angịnyị ehe nya ọgbanyẹ-ọgbanyẹ ịlẹ kị́ ri Adam bala Iivu nyọka kụ epwoohe ka chajị Ohe Oluhye họ alegu-ẹrụ nyọka kụ epwoohe ene-ene lẹ. (IJobu 38:4, 7) Ịnyị à du, ụka kọ họ Adam kpá, kọ yọọ kụ ẹga ọnyịịla-ọnyịịla ị-ịparadayịsị ọlẹ kị wụrụ nya iku nya ịdẹn lẹ. (Ọmwụ Ọdada 2:15-17) IJihova myị ọnụ họọ bala anyị ịtụma nyamwụ nyori ị ka juwa hịhị gbe oyi myị́ oyi odehe ọlẹ.—Wa Eje Ọnyịịla 37:29; 115:16.
Iku nya ịdẹn kẹnẹ-kẹnẹ à ri ịParadayịsị nya ọgbanyẹ-ọgbanyẹ lẹ. Irya nya Ohe Oluhye ri, Adam bala Iivu ka pyẹ myị odehe ọlẹ bwula anyi ịlẹ kị́ ka ma. Jaabwo ọlẹ kị wẹẹ pyẹ, ị ka họ odehe ọlẹ wuu ka ri ịParadayịsị. (Ọmwụ Ọdada 1:28.) Odehe ọlẹ á ka tayịreji ẹnẹnẹhẹ ka. Ọ ka ri ẹpwa nya angịnyị ehe gbe oyi myị́ oyi.—Wa Ayịsaya 45:18.
Yẹ ifim Why Did God Create the Earth?
2. Ịyẹ tị́ du ká odehe ọlẹ ri ịParadayịsị lẹẹlẹẹ ka?
Adam bala Iivu á ju ihi nya Ohe Oluhye ka, lẹ iJihova kwaa kpehe bwu ẹpwụ nya iku. Bwu ụka ọwẹ ịparadayịsị byi, ọngịnyị ehe ọhẹ-lọhẹ á tị jẹ́ tịrọọ ẹkpẹ myị ka. ỊBayịbụụ yẹkẹẹ, nyị “pẹhi odehe ju alabwẹla onyobyi ụ-ụbwọ.”—IJobu 9:24.—Wa Ọmwụ Ọdada 3:23, 24.
IJihova deeri hi irya ọlẹ kọ la ẹ-ẹga nya angịnyị ehe bwu ọmwụ ọdada lẹẹ? Ehe! Ọwa à ri agụgụ lẹ. Ẹla nyamwụ ọhẹ-lọhẹ á kaa deeji ka. (Ayịsaya 55:11) Ọ ka họ irya nyamwụ ọlẹ kọ la ẹ-ẹga nya angịnyị ehe wuu jịra jaabwọ ọlẹ kọ́ tịtọ ọ́ ka la bwu ọmwụ ọdada.—Wa Eje Ọnyịịla 37:11, 34.
3. Ányị Ohe á tị́ ka bwu tịrị ịParadayịsị ẹkpẹ?
Odehe ọlẹ ka ri ịParadayịsị myịmyị ụka ká iJisọsị á dọmwụ nyọka kpeji. Lụka nya ẹwụ nya Amagẹdọn, iJisọsị ka kpa alegu-ẹrụ ịlahị warị kaka ta alabwẹla ịtịpyọ ịlẹ kị myị ọnụ ju ẹla nya Ohe Oluhye ka wuu ayịreji. Ọọwa lẹ, iJisọsị à ka wu olegu onyobyi ju agba lala ẹka ụnọ lẹpwụ-lẹpwụ (1,000) lẹlẹ. Angịlẹ kị́ ri angịnyị nya Ohe Oluhye wuu ka chịda, chajị iJisọsị ka gbaa bala ọ-chewu kaa. Ị ka hịhị gbe oyi myi oyi ị-ịParadayịsị ám̀ odehe ọlẹ.—Wa Ọwụrụụ-wụrụ 20:1-3; 21:3, 4.
4. Ụka oyina akama à tị́ ka chị eju?
Ụka oyina Ohe Oluhye à tị́ ka chị ang ịtịpyọ ilodehe ọlẹ wuu eju? IJisọsị mẹ ang “ẹjẹẹ” ịlẹ káhị ka kpa jẹ́ ụka ocheju nya odehe ọlẹ jẹẹhị. Akama ịlẹ kị wẹẹ jahị da angịnyị ehe alẹ, mẹjẹ nyori ahị jam ụ-ụka ọlẹ ká “ọmyịmyị nya odehe ọlẹ ka pwụ eji” lẹ.—Wa ỊMatiyu 24:3, 7-14, 21, 22.
IJisọsị ka chị akama wuu eju ẹ-ẹpwụ nya ẹka ụnọ [1,000] ọlẹ kọ ka kpeji bwu epwoohe wẹ odehe ọlẹ. (Ayịsaya 9:6, 7; 11:9) Ọ́ ba ọ-ka ri Adịrahụ kem ka, iJisọsị ka ri ọngọkiliya ọlẹ ọ́ ka hụ́ ịhọbịrị nya angịlẹ ká Ohe Oluhye há wuu cheri-cheri. Bwula iJisọsị, Ohe Oluhye ka myị́ ẹdụrụ, okwirichi ọchịchị bala igu ogbugbu wuu gbanggbang.—Wa Ayịsaya 25:8; 33:24.
5. Owo anyị à tị́ ka juwa ị-ịParadayịsị?
Ụ-ụwa u-Ube nya Ịpyị-Adịrahụ, à ka tọ angịlẹ ká Ohe Oluhye há bala ọ-tịtọ nyọka jẹ́ ang jaabwọ ọlẹ kị ka bwu họ ẹla ọlẹ kọ ka kpọọ ịpyọ
Angịlẹ kị họ irya nya Ohe Oluhye à ka juwa ị-ịparadayịsị lẹ. (1 ỊJọn 2:17) IJisọsị du angịjugbẹyị nyamwụ ẹrụ nyị ka tịtọ nya angị la dụmwọ, bala ọ-mẹ ẹla nya Ohe Oluhye jaa. Lẹẹlẹẹ, iJihova wẹẹ nwụla uku-uku nya angịnyị nọ gbe ọhịhị ọla ịParadayịsị ám̀ odehe ọlẹ. (ỊSẹfanịya 2:3) Ụ-ụwa u-Ube nya Ịpyị-Adịrahụ nya Alibeenu nya iJihova, angịnyị kaa jẹ́ ang jaabwọ ọlẹ kị́ ka bwu ri ọrụ-ahụ, adịda, ahụ bala ịnịna ọnyịịla. Ala ugbiyegu kaa gbịgba lawụlẹ bala ọ-jé ang jaabwọ ọlẹ kị́ ka bwu ye apyobwuna bwu ẹpwụ nya oja ọnyịịla ọwẹ.—Wa ỊMayịka 4:1-4.
