Ohe Oluhye tụ́ anyị ịtụma nya Ebiraham guru nyọka ri ẹpwụma, ọọwa lẹ ọ ya ehile haa ẹẹ. Ọ ju ẹpwụma ọọwa ẹnyị nya “Isirẹlụ.” Ịwa kem à kaa gbịgba ha Ohe Oluhye nyịlẹhị bala ọ-kpa omyi ẹla nyamwụ họ ụkụrwọ lẹ. (Eje Ọnyịịla 147:19, 20) Lẹ, ẹpwụma ịkịla wuu ka jẹ́-ẹ ye ahị ọwawa bwu ẹga nya ala Isirẹlụ.—Wa Ụkụrwọ nya Alẹrụ 3:25.

Ohe Oluhye chụ ala Isirẹlụ nyọka ri alibeenu nyamwụ. Oja nyaa mẹjẹ jaabwọ ká angịnyị ka ye apyobwuna bwula o-ju ihi nya ehile nya Ohe Oluhye. (Ehile Ọmada 4:6) Angịkịla ka jẹ́-ẹ warị kaka jẹ́ Ohe Oluhye nya ịlẹhị bwula ọ-yẹ ọhọhọ nyaa.—Wa Ayịsaya 43:10, 12.

Ọ nọ chẹẹ, ẹpwụma nya Isirẹlụ họ ẹla wụ Ohe Oluhye ẹjẹ dudu kọ́ ya ọjịra-jịra nya angịnyị nya ịKịrayịsị ku ọmwakpa nyaa. (ỊMatiyu 21:43; 23:37, 38) Lẹ, angịnyị nya ịKịrayịsị ku ọmwakpa nya ala Isirẹlụ nyọka ri alibeenu nya iJihova lẹẹlẹẹ lẹ.—Wa Ụkụrwọ nya Alẹrụ 15:14, 17.

IJisọsị du angịjụgbẹyị nyamwụ ẹrụ nyọka kpa ẹrụ ọnyịịla pyẹ odehe wuu bala ọ-họ ká angịnyị kà ri angịjụgbẹyị nyamwụ. (ỊMatiyu 10:7, 11; 24:14; 28:19, 20) Lụka kpii, Ohe Oluhye kà ta alabwẹla ịtịpyọ ayịreji ám̀ odehe ọlẹ. Ọọwa ri, ụkụrwọ ọwẹ juwa ka cheju lẹ. Ọwẹ tị ri ụka ọhọhẹ ká iJihova tụ́ ụnọ nya angịnyị guru bwu ẹpwụma nya odehe wuu ẹ-ẹpwụ nya ịgba ọgbagba nya ịlẹhị. (Ọwụrụụ-wụrụ 7:9, 10) Angịnyị nya ịKịrayịsị nya ịlẹhị kaa yẹjula awụlẹ nyọka ju awụlẹ ọhụ bala ọ-ka dawụlẹ ụbwọ. Odehe wuu, ang ọlẹ kị́ kaa jẹ́ bwu ịBayịbụụ ọọjịra-jịra nyaa á datị hi awụlẹ ka.—Wa Ala iHiburu 10:24, 25.

Lẹka nya 1870, ogu ochiche nya angịlẹ kị́ kaa jẹ́ ịBayịbụụ dọmwụ nyọka gba ẹlịlẹhị ịla ịBayịbụụ ịlẹ kị́ byi tatata kpehe myịmyị. Ị jẹ́ nyori iJisọsị du angịnyị nyamwụ wuu ka ya ẹrụ ọnyịịla, ọọwa lẹ ị dọmwụ nyọka kpa ẹrụ ọnyịịla pyẹ odehe wuu lẹlẹ. Lẹka nya 1931, ị yẹ ẹnyị nyaa da ka ri Alibeenu nya iJihova.—Wa Ụkụrwọ nya Alẹrụ 1:8; 2:1, 4; 5:42.

Lụka nya oyi ọhọhẹ, ebwo nya angịgbahị ịhyẹ ịlẹ kị́ jẹ́ ẹla yẹẹyẹẹ kaa kpẹhị rịrị ọjịra-jịra nya angịnyị nya ịKịrayịsị ẹ-ẹga ịdatị-datị. Angịgbahị ịwẹ myị nyori iJisọsị a ri olegbeju nya ọjịra-jịra wuu lẹ. (Ụkụrwọ nya Alẹrụ 16:4, 5) Ịnyịnyị alẹ, angịgbahị ịhyẹ ịlẹ kị jẹ́ ang yẹẹyẹẹ kaa kpẹhị rịrị ọjịra-jịra nya Alibeenu nya iJihova odehe wuu. Ị wụraa nya Governing body. Ị kaa kpẹhị rịrị egbeju ẹpwa ichiche nya Alibeenu nya iJihova ịlẹ kịị yẹ apwụ da ka òja ịkịla, họ apwụ, bala ọ-ya apwụ ị-kpa jẹ́ ịBayịbụụ ha angịnyị gụ òja ohu irwiye da iwo ịrụ (750). Ọjịra-jịra ịlẹ kị́ kaa ye ọhụ ojuju bala ẹla ọ-mẹjẹ bwu ẹga nya Governing Body ám̀ odehe wuu gụ ụnọ ohu da iwo imiiye (120,000). Ẹ-ẹpwụ nya ọjịra-jịra ọnyị myị́ ọnyị, ị chụ alẹng ịlẹ kị chịla nyọka ri angịgbahị nya ọjịra-jịra. Ị kaa kpahị ju ịkpịlọ nya Ohe Oluhye yẹẹyẹẹ.—Wa 1 IPita 5:2, 3.

Alibeenu nya iJihova kaa kpa ẹrụ ọnyịila pyẹ bala ọ-họ ká angịkịla ka ri angịjụgbẹyị. Ahị kaa kpa ẹrụ ọnyịịla pyẹ bwu ẹpwa ka ẹpwa jaabwọ ká angịjụgbẹyị nya iJisọsị họ. (Ụkụrwọ nya Alẹrụ 20:20) Ahị myịmyị kaa jẹ́ ịBayịbụụ bala ọng myị́ ọng ọlẹ ká ẹlịlẹhị há yẹẹyẹẹ. Alibeenu nya iJihova á tị kaa gbigba lawule ịịwẹ kem ka, ahị ri ala ugbiyegu ọlẹ kọ la adịda ọ-la ọháha bala aanịna ịlẹ kị́ kaa kpahị ju awụlẹ. (2 Ala ịTẹsalonika 1:3) Alibeenu nya iJihova ri ugbiyegu ọlẹ kọ́ kaa chị ọkẹkẹnị gụgụ wuu ám̀ odehe ọlẹ chajị ahị kaa yẹjula awụlẹ nyọka họ irya nya Ohe Oluhye bala ọ-da angịkịla ụbwọ.—Wa Eje Ọnyịịla 33:12; Ụkụrwọ nya Alẹrụ 20:35.