IJisọsị datị hi angịnyị ehe ịkịla chajị ọ ri olegu-ẹrụ e-epwoohe ene kịị mọọ ám̀ odehe ọlẹ. (ỊJọn 8:23) Ọwa Ohe Oluhye à họ nya ọgbanyẹ-ọgbanyẹ lẹ, ọ tị dọọ ụbwọ họ ang ịkịla wuu ịnyịnyị. IJisọsị ụbwọọmwụ iJihova à họ la ụbwọ nya ịlọmwụ lẹ, ịnyị a dụ kị́ wụrọọ nya “ọnyẹwẹ olookpokpo” nya Ohe Oluhye lẹ. (ỊJọn 1:14) Ụpwụ Igọgọ myịmyị wụrụ iJisọsị nya omyi “Ẹla”, chajị ọ kaa kpa ọnụ-ẹla ha Ohe Oluhye.—Wa Etu 8:22, 23; Ala iKọlosi 1:15, 16.

Ohe Oluhye dụ ọnyị nyamwụ ẹrụ bwu epwoohe wẹ odehe ọlẹ bwula ọ-ya ọhịhị nyamwụ ju ka ẹpwụ nya iMeri, ọnyang nya ala ijuu ọlẹ kọ jẹ́ ọlẹng ẹnẹnẹhẹ lẹka. Lẹ, iJisọsị-ị́ la adịda ám̀ odehe ọlẹ ka. (ILuku 1:30-35) IJisọsị wẹ odehe ọlẹ nyọka (1) mẹ ẹlịlẹhị chajị nya Ohe Oluhye jẹ, (2) ya ọgụ-ẹpẹtẹ ọnyịịla deeji ẹ-ẹga nyọka họ irya nya Ohe Oluhye tụ ụka ká akama á wẹ chịhị ogu, bala (3) ọ-ya ọhịhị ọkpẹẹkpẹẹ nyamwụ “kịla iya” chajị nyọka chịhị da.—Wa ỊMatiyu 20:28.

Iya ọkịlaakịla baba ụka ọhẹ nyọka chị ọngịnyị da bwu ẹpwụ nya igu ọgbugbu. Ọ ka ri uri ọlẹ kịị nwụ nyọka chị ọhịhị da myị́. (Ehe Ọkpụkpụ 21:29, 30) Okwirichi ọchịchị bala igu ogbugbu á ri irya nya Ohe Oluhye ha angịnyị ehe bwụ ọmwụ ọdada ka. Ányị ahị tị họ káhị jẹ́? Ohe Oluhye byi Adam, ọlẹng ọlẹ kọ họ họhẹ-họhẹ nyori, kori kị́ nyị họ “ọhọbịrị” alẹ, nyị ka gbu. Lẹ, kori ká adam á họ ọhọbịrị ka ịnọ, ọ́ ka gbu ẹnẹnẹhẹ ka. (Ọmwụ Ọdada 2:16, 17; 5:5) ỊBayịbụụ họ káhị jẹ́ nyori Adam à jụ ọmwụ nya igu ogbugbu ha angịnyị ehe wuu lẹ. Ọọwa ri, Adam ya ọhọḅịrị bala igu chị kịla anyị ịtụma nyamwụ wuu. Lẹ, ahị baba nya iya ọkịlaakịla ọlẹ  kọ́ ka gbahị kpehe bwụ ẹpwụ nya igu ọlẹ káhị ri ugu nyamwụ bwu ẹga nya Adam.—Wa Ala iRom 5:12; 6:23.

Owo à tị́ ka jụ uri nwụ nyọka chịhị da bwụ ẹpwụ nya igu myị́? Ụka káhị gbu, uri nya ịhọbịrị nya ịlọhi kem ahị kaa nwụ lẹ. Lẹ, ọngịnyị ehe ọ-la kpẹẹkpẹẹ ka ọhẹ-lọhẹ á ka jẹ́-ẹ nwụ uri nya ịhọbịrị nya angịkịla myị́ kpongkpong ka.—Wa Eje Ọnyịịla 49:7-9.

IJisọsị datị hi angịnyị ehe chajị ọ la kpẹekpẹẹ. Lẹ, ó gbu chajị nya ịhọbịrị nya ịlọmwụ ka, ọ́ họ ọhọbịrị ẹnẹnẹhẹ lẹka. Ọkọkọ nya ọọwa lẹ, iJisọsị gbu chajị nya ịhọḅirị nya angịkịla ịnyị. Ohe Oluhye mẹ ọháha ọ-la ọ-chụme ka jẹ ẹ-ẹga nya angịnyị ehe wuu bwula ọ-du ọnyẹwẹ nyamwụ kaka gbu chajị nyahị. IJisọsị tị mẹ ọháha jẹ ịnyịnyị bwula ọ-ju ihi nya adamwụ bala ọ-ya ọhịhị nyamwụ kịla iya chajị nya ịhọbịrị nyahị.—Wa ỊJọn 3:16; Ala iRom 5:18, 19.

Yẹ ifim Why Did Jesus Die?

Ụka ọlẹ ká iJisọsị jam odehe, ọ kaa họ alẹdụrụ ụda, wule egu eji bala ọ-gba angịnyị kpehe bwu ẹpwụ nya akama ịdatị-datị. Ọwẹ mẹ ang ịnyịịla ịlẹ kọ́ ka họ ị-ịlahị jẹẹhi, ha angịlẹ wuu kị́ ju ihi nya Ohe Oluhye. (ỊMatiyu 15:30, 31; ỊJọn 5:28) Nyọlẹ ká iJisọsị gbu kpá, Ohe Oluhye wulọọ eji kaka hịhị la abwụma nya olegu. (1 IPita 3:18) Bwu ụka ọwẹ, iJisọsị hụhụ u-upwuriri nya Ohe Oluhye, juwa dayị gbe ụka ọlẹ ká iJihova ka ya ọngịrị họọ nyọka ri Adịrahụ u-uhye nya odehe ọlẹ. (Ala iHiburu 10:12, 13) Lẹẹlẹẹ, iJisọsị juwa kpeji e-epwoohe lẹ, angịjụgbẹyị nyamwụ tị wẹẹ kpa ẹrụ ọnyịila ọọwa pyẹ ẹ-ẹga myị́ ẹga nya odehe wuu ịnyịnyị.—Wa ỊDanẹlụ 7:13, 14; ỊMatiyu 24:14.

Lụka kpii, iJisọsị ka kpa ọngịrị nya adịrahụ oriri nyamwụ myị́ akama ịlodehe ịlẹ wuu, bala ọ-ka ta angịlẹ kị́ ju ọmwụ nyamwụ ayịreji gbanggbang. Angịlẹ kị́ la ọmyịmyị ẹ-ẹga nya iJisọsị bwula ọ-ju ihi nyamwụ ka ye ọkẹkẹnị mwụba-mwụba, ụka ká odehe ọlẹ wuu ka ri ịparadayịsị.—Wa Eje Ọnyịịla 37:9-11.