Ohe Oluhye wụrụ angịnyị ụma ọnyị myị́ ọnyị nyọka tụ́ jwoo chwẹẹ ẹ-ẹpwụ nya abwọ ọrịrị. (Eje Ọnyịịla 65:2) Ma, a-abwọ ọrịrị wuu ọ kaa ke ụrụ wo, lee o-ye myị ka. Lala ọ-chụ pwokwịta, ọrụ-ahụ ọlẹ kọ́ kpahị ju ahụ nyamwụ yẹẹyẹẹ ka, Ohe á ka wo abwọ ọrịrị nyamwụ ka. (1 IPita 3:7) Ịnyịnyị, lụka ká ala Isirẹlụ juwa ẹ-ẹpwụ nya ang ọtịpyọ ọhọhọ, Ohe Oluhye pwa la ọ-ka wo abwọ ọrịrị nyaa. Ma, Ohe Oluhye ka wo abwọ ọrịrị nya ọlọhọbịrị ọtụka-ọtụka kori kọ́ yẹda. Abwọ ọrịrị ri ihi ọtụka-ọtụka ịnyịlẹhị.—Wa Ayịsaya 1:15; 55:7.

Yẹ ifim Does God Listen to All Prayers?

Abwọ ọrịrị ri ụpa nya ịgba ọgbagba nyahị, lẹ, ọ baba káhị ka raabwọ ha iJihova, Ọngọlẹ kọ họhị kem. (ỊMatiyu 4:10; 6:9) Ịnyịnyị, nyọlẹ káhị la kpẹẹkpẹẹ ka lẹ, ọ baba káhị ka raabwọ la ẹnyị nya iJisọsị chajị nyọlẹ kọ warị ka ka gbu chajị nya ọhọbịrị nyahị. (ỊJọn 14:6) IJihova á tịtọ káhị ka ma ẹla okpokpo ya lee ọ-wa abwọ ọrịrị bwu ẹpwụ nya ụpwụ ka. Ọ tịtọ káhị ka raabwọ bwu ẹpwụ nya ọkịlẹtụ nyahị.—Wa ỊMatiyu 6:7; Ala IFilipayị 4:6, 7.

Ohe Oluhye jẹ́-ẹ wo abwọ ọrịrị ọlẹ káhị rị ọ-ọkịlẹtụ la o-yoo kpehe ka ịnyịnyị. (1 ỊSamwẹlụ 1:12, 13) Ọ wụrụụhi nyọka raabwọ ụka myị́ ụka wuu, lala ọmwụ ọdada nya ahyẹẹnụ bala ocheju nya ahyẹẹnụ, ụka káhị ka ri ang, bala ụka káhị juwa ẹ-ẹpwụ nya akama.—Wa Eje Ọnyịịla 55:22; ỊMatiyu 15:36.

Ọ-ka tụ́ ju Ohe Oluhye chwẹẹ á chịkpẹẹ ka, chajị ahị kụ bala angịlẹ kị la ọmyịmyị ẹ-ẹga nya Ohe Oluhye ka. Ị́ myị ọnụ ju ehe ọlẹ kọ́ chị u-uhye nya odehe ọlẹ ọ-ka myị̀ la okpunyi ka. (2 ITimoti 3:1, 4; 2 IPita 3:3, 13) Lẹ, ahị baba nya otuguru bala aanahị chajị nyọka ye ọhụ ojuju. Ịwa ịnyịnyị tị baba nyahị.—Wa Ala iHiburu 10:24, 25.

 Ọ-tuguru bala angịlẹ ká Ohe Oluhye há ka dahị ụbwọ tụ́ ju Ohe Oluhye chwẹẹ ịnyịnyị. Ọjịra-jịra nya Alibeenu nya iJihova kaa ya iwe ọlịnyị hahị nyọka ye apyobwuna bwu ọmyịmyị nya angịkịla.—Wa Ala iRom 1:11, 12.

À ka jẹ́-ẹ tụ́ ju iJihova chwẹẹ bwula ọ-kụ irya kpori-kpori u-uhye nya ang ịlẹ ká jẹ́ bwu ịBayịbụụ. Kụ irya ju akụrwọ nyamwụ, ẹla ọmẹjẹ, bala ehe ọchịchị nyamwụ. Abwọ ọrịrị bala irya ọ-kụ kpori-kpori ka dahị ụbwọ jẹ́ jaabwọ ká ọháha bala ẹla ọjẹ́jẹ nya Ohe Oluhye lụmẹ kaka ba.—Wa IJochuwa 1:8; Eje Ọnyịịla 1:1-3.

À ka jẹ́-ẹ tụ́ ju Ohe Oluhye chwẹẹ kori ká dahịhilọọ bala ọ-la ọmyịmyị ẹ-ẹga nyamwụ. Ma, ọmyịmyị lala okoji. Jaabwọ ká okoji baba nya enyi, ịnyịnyị ọmyịmyị nyang à baba nya enyi lẹ. À ka jẹ́-ẹ kpa enyi ju ọmyịmyị nyang bwula ọ-jẹ́ ang gụ ọọwa u-uhye nya ang o-dudu ká la ọmyịmyị ọwẹ.—Wa ỊMatiyu 4:4; Ala iHiburu 11:1, 6.

IJihova kaa kpahị ju angịlẹ kị́ la ọháha họọ. Ọ kaa chewu kaa hi ịngịngịhyẹ ọlẹ kọ́ ka du ká ọmyịmyị bala ẹhị ọrịrị nya ọhịhị ọmyịmyị-ka nyaa ka gwaa byi. (Eje Ọnyịịla 91:1, 2, 7-10) Ọ kaa dahị ọna u-uhye nya ụma nya ọhịhị ọlẹ kọ́ ka kpa akama wẹ ugbinyịrọ nyahị bala o-ka dudu káhị ka chị ọkẹkẹnị ka. IJihova mẹ ụgbẹyị nya ọhịhị ọlẹ kọ́ há gụ wuu jẹẹhị.—Wa Eje Ọnyịịla 73:27, 28; IJemsi 4:4, 8.