ANG ỌJẸ́JẸ 01

Ányị ịBayịbụụ À Tị́ ka Jẹ́-ẹ Dang Ụbwọ?

Ahị wuu la ịtọ ẹla u-uhye nya ọhịhị, akama, igu, bala ijuju nyahị. Ahị myịmyị kaa kụ irya u-uhye nya ang lala abwọlẹ kahị ka bwu ye okpoko kpa họ ịbaba nyahị bala abwọlẹ ká ugbiyegu nyahị ka bwu chị ọkẹkẹnị. Angịnyị lụmẹ-lụmẹ yẹ nyori ịBayịbụụ kaa daa ụbwọ ye ọwẹwẹ nya ịtọ ẹla ịtụka, ọ́ tị ba ọọwa kem ka, ọ kaa mẹ ang jáa ịnyịnyị u-uhye nya ọhịhị. À me irya ká ịBayịbụụ ka jẹ́-ẹ da ọngọngọhẹ ọlẹ ká jẹ́ ụbwọ?

1. Ịtọ ẹla iyina ịBayịbụụ à tị́ wẹ?

ỊBayịbụụ wẹ ịtọ ẹla ịlẹ: Ányị ọhịhị à tị́ bwu dọmwụ? Ịyẹ tị́ du kahị jam hịhị? Ịyẹ tị́ du ká angịnyị kaa yẹ akama? Ẹlịyẹ à tị́ kaa họ ụka ká ọngịnyị-ị́ gbu? Kori ká ọng myị́ ọng á tịtọ nya okpunyi, ịyẹ tị́ du ká ẹwụ ọdada bene myị̀ ẹga myị́ ẹga ị-ịwẹ? Ịyẹ à tị́ ka họ ta odehe ọlẹ ị-ịlahị? ỊBayịbụụ juhi ọhụ nyọka mwahị nya ọwẹwẹ nya ịtọ ẹla ịlịịwẹ, uku ịmanyị tị́ nya angịnyị tị ye ọwẹwẹ wu ịlaa ẹpwụ lẹ.

2. Ányị ịBayịbụụ à tị́ ka jẹ́-ẹ dahị ụbwọ ẹnụ myị́ ẹnụ?

ỊBayịbụụ kaa mẹ ẹla ọnyịịla jẹ́ẹhị. Ọ-chụ pwokwita, ọ mẹjẹ ugbiyegu jaabwọ kị ka bwu chị ọkẹkẹnị nyịlẹhị. Ọ ya jehi ang ọlẹ kahị ka jẹ́-ẹ họ ụka ká olegu á chị́ịhị pyẹpyẹ bala abwọ kahị ka họ ká ụkụrwọ nyahị ka kpụhị ịpyọ. À ka jẹ́ ang ọlẹ ká ịBayịbụụ mẹjẹ u-uhye nya ẹhị nya ẹla ịwẹ bala ịkịla jaabwọ kahị wẹẹ jẹ́ ụpwụ ọlẹ lawụlẹ. À ka myị ọnụ nyori “ẹla myị́ ẹla ọlẹpwụ nya Ụpwụ Ịgọgọ . . . ju apyobwuna.”—2 iTimoti 3:16.

Ụpwụ ọlẹ-ẹ́ ku ọmwakpa nya ịBayịbụụ ka. Ọkọkọ nyọọwa lẹ, o jung ọhụ nyọka kụ ẹhị yẹ ịBayịbụụ lịlọng. Lẹ, ahị bịlẹng ká ka wa ụpwụ ịgọgọ ịlẹ kị da a-ang ọjẹ́jẹ ịwẹ bala ọ-chwaa ka pwoku ẹla ọlẹ ká wẹẹ jẹ́.

JẸ́ GỤ ỌỌWA

Kụ ẹhị yẹ abwọlẹ ká ịBayịbụụ da angịnyị ụbwọ, jaabwọ ká ọ-wọọ wa ka kpụng ịpyọ, bala ang odudu ká baba nya ụbwọ ọdada nyọka wo etu nyamwụ wẹẹ.

3. ỊBayịbụụ ka jẹ́-ẹ kpahị ụgbẹyị

ỊBayịbụụ lala ila ọlẹ ko juwa hụ́ ahịgboo ọtụka-ọtụka. Ọ ka jẹ́-ẹ dahị ụbwọ nyọka cheje ọnyịịla bala o-ya ang ọlẹ kọ ka họ ị-ịlahị jehi.

Wa Eje Ọnyịịla 119:105, kanụ ya ẹla u-uhye nya ịtọ ẹla ịlẹ:

Ányị ọngọ da Eje Ọnyịịla à tị́ yẹ ịBayịbụụ?
Ányị a tị́ yẹ ịBayịbụụ?

4. ỊBayịbụụ ka jẹ́-ẹ wẹ ịtọ ẹla nyahị

Ọnyang ọhẹ ye ọwẹwẹ nya ịtọ ẹla ọlẹ ko ri olo họọ ẹ-ẹpwụ nya ẹka ịmanyị tị́ bwu ẹpwụ nya ịBayịbụụ. Yẹ IFIM ọwẹ, kanụ ya ẹla u-uhye nya ịtọ ẹla ịlẹ.

IFIM: Ẹhị Ọrịrịị-rịrị a Gung Myị́ ka! (1:48)

Jaabwọ ká yẹ ẹ-ẹpwụ nya ifim ọwẹ, ịto ẹla ụma iyina ọnyang ọwẹ à tịị tọ?
Ányị ịBayịbụụ ọjẹ́jẹ à tị́ dọọ ụbwọ?

ỊBayịbụụ juhi ọhụ nyọka tọ ịtọ ẹla. Wa ịMatiyu 7:8, kanụ ya ẹla u-uhye nya ịtọ ẹla ọlẹ:

Ịtọ ẹla iyina a tị́ la, ká me irya nyori ọwẹwẹ nyaa ka juwa ẹ-ẹpwụ nya ịBayịbụụ?

5. ỊBayịbụụ ọwawa ka jẹ́-ẹ kpụng ịpyọ

ỊBayịbụụ ọwawa kaa kpụ angịnyị lụmẹ-lụmẹ ịpyọ, ị tị kaa ye apyobwuna bwu ẹpwụ nyamwụ. Yẹ IFIM ọwẹ, kanụ ya ẹla u-uhye nya ịtọ ẹla ịlẹ.

IFIM: ỊBayịbụụ Ọwawa (2:05)

Jaabwọ ká yẹ ẹ-ẹpwụ nya ifim ọwẹ, irya ọlanyị anjwo ịwẹ à tị́ la u-uhye nya ụpwụ ọwawa?
Nanana nyori ụpwụ ọwawa á kaa há angịwẹ ka, ịyẹ tị́ du ká ịBayịbụụ ọwawa kaa háa?

ỊBayịbụụ ya nyori ọwa nyị ka jẹ́-ẹ mẹ ang ọlẹ kọ ka kpụ́ụhị ẹjẹ bala ọ-yẹhị ọrịrịị-rịrị hahị jẹ́ẹhị. Wa Ala iRom 15:4, kanụ ya ẹla u-uhye nya ịtọ ẹla ọlẹ:

Ehe ọchịchị nya ẹjẹ ọkpụ́kpụ bala ẹhị ọrịrịị-rịrị ọlẹpwụ nya ịBayịbụụ háng?

6. Angịkịla ka jẹ́-ẹ dang ụbwọ wo etu nya ẹla ọlẹpwụ nya ịBayịbụụ

Datị hi ọ-ka wa ịBayịbụụ lịlaa, angịnyị lụmẹ-lụmẹ yẹ nyori o-ya ẹla u-uhye nyamwụ bala angịkịla kaa daa ụbwọ. Wa Ụkụrwọ nya Alẹrụ 8:26-31, kanụ ya ẹla u-uhye ịtọ ẹla ọlẹ:

Ányị ahị tị́ ka bwu jẹ́ etu nya ẹla ọla ịBayịbụụ?—Yẹ ọgba 30 bala 31.

Ọlẹng ọla Itiyopiya baba nya ụbwọ ọdada nyọka wo etu nya ẹla ọla Ụpwụ Ịgọgọ. Angịnyị lụmẹ-lụmẹ alẹ kaa ye apyobwuna ụka kịịwa bala angịkịla-á kụ ẹhị yẹ ịBayịbụụ lawụlẹ

ANGỊHYẸ KAA YẸKẸẸ: “ỊBayịbụụ ọjẹ́jẹ ri ụka ọbịrịị-bịrị.”