ANG ỌJẸ́JẸ 16

Ịyẹ IJisọsị à Tị́ Họ Ụka Kọ Jam Odehe?

Angịnyị lụmẹ-lụmẹ jẹ́ iJisọsị, ma ẹla ọlẹ kọ họ lụka kọ ri ọnyị ọlụbwọ bala ụka nya igu nyamwụ kem ị jẹ́ lẹ, angịkịla tị yọọ lala ọlọmwụ ọ-jẹ́ ẹla ịịwẹ kem ịnyị. Ma, ahị ka jẹ́-ẹ jọ́ọ gụ ọọwa bwula ọ-jẹ́ ang u-uhye nya abwọlẹ kọ hịhị ụka kọ jam odehe? A-ang ọjẹ́jẹ ọlẹ, ahị ka kụ ẹhị yẹ ang ịkpọnchị ịlẹ ká iJisọsị họ, bala abwọlẹ ká ọọwa gung.

1. Ụkụrwọ oyina à tị́ baba ha iJisọsị gụ wuu?

Ụkụrwọ ọlẹ kọ baba ha iJisọsị gụ wuu ri ọ-ka “ya ẹrụ ọnyịịla chajị nya ịpyị Adịrahụ nya Ohe Oluhye.” (Wa iLuku 4:43.) O ya ẹrụ ọnyịịla dodehe nyori Ohe nyị ja ya ịpyị Adịrahụ lee eji ọkpakpa ọhẹ yeji, ọlẹ kọ ka myị́ akama nya angịnyị ehe wuu. a Ẹ-ẹpwụ nya ẹka ịta bẹhya gbẹgbịlẹ, iJisọsị họ ụkụrwọ yẹẹyẹẹ nyọka ya ẹla ọnyịịla ọwẹ je angịnyị.—ỊMatiyu 9:35.

2. Ịyẹ tị́ du ká iJisọsị họ akụrwọ ẹbyẹbyị?

ỊBayịbụụ chabwọ nya “uda ọhọhọ nyamwụ bala ụkụrwọ ẹbyẹbyị ọhọhọ bala ang i-ju ẹjẹẹ ịlẹbyẹbyị ịkịla la datị-datị ịlẹ ká iJisọsị kpa ọngịrị nya Ohe Oluhye họ.” (Ụkụrwọ nya Alẹrụ 2:22) Bwula ọngịrị nya Ohe, iJisọsị jẹ́ kpụ̀ ọhụ bala enyi ba, ya ang oriri ha ụnọ ịmanyị tị́ nya angịnyị, họ alẹdụrụ uda, bala ọ-dọmwụ wule egu eji ka la ọhịhị. (ỊMatiyu 8:23-27; 14:15-21; ịMakị 6:56; iLuku 7:11-17) Akụrwọ ẹbyẹbyị nya iJisọsị họ ọ la gbagbịla nyori Ohe à doo ẹrụ lẹ. Ị myịmyị mẹjẹ nyori iJihova la ọngịrị nyọka myị́ akama nyahị wuu.

3. Ẹlịyẹ ahị tị́ ka jẹ́ bwu ụgbẹyị ọlẹ ká iJisọsị hịhị?

IJisọsị ju iJihova ihi ẹ-ẹpwụ nya iwe-ahụrụ ọnyị myị́ ọnyị. (Wa ịJọn 8:29.) IJisọsị họ ang myị́ ang ọlẹ ká Adamwụ byoo nyị họ. Nanana nyori angịhyẹ tịtọ nyọka hwoo abwọ, ọ họ ịnyị ẹ-ẹpwụ nya ọhịhị nyamwụ wuu gbee kọọ gbu. Ọ mẹjẹ nyori ọ chịkpẹẹ ká angịnyị ehe ka gbịgba ha iJihova, kori kị dọmwụ juwa ẹ-ẹpwụ nya iwe-ahụrụ olujwo wẹwẹ. Lẹ, iJisọsị “ri ang o-ju ẹjẹẹ” hahị, kahị ka “ba ọgụ-ẹpẹtẹ” nyamwụ jẹ rige-rige.—1 iPita 2:21.

JẸ́ GỤ ỌỌWA

Kụ ẹhị yẹ jaabwọ ká iJisọsị kpa ẹrụ ọnyịịla pyẹ bala ọ-họ akụrwọ ẹbyẹbyị.

4. IJisọsị kpa ẹrụ ọnyịịla pyẹ

IJisọsị jẹdịyẹ ịmayịlị ịmanyị tị́ a-agbẹyị ị-myị̀ la ekuruwa, juwa ya ẹrụ ọnyịịla je angịnyị lụmẹ-lụmẹ jaabwọ kọ chịkpẹẹ kaka ba. Wa iLuku 8:1, kanụ ya ẹla u-uhye nya ịtọ ẹla ịlẹ:

IJisọsị kaa ya ẹrụ ọnyịịla ju angịlẹ kị tụguru nyọka ke ụrụ wo lọọ kem ịnyị?
Ányị iJisọsị à tị́ kaa maga kaka ba chajị kọ ka jẹ́-ẹ ya ẹla ju angịnyị?

Ohe ya neeji nyori iMesaya nyị ka kpa ẹrụ ọnyịịla pyẹ. Wa Ayịsaya 61:1, 2, kanụ ya ẹla u-uhye nya ịtọ ẹla ịlẹ:

Ányị iJisọsị à tị́ họ ọmwụ ọyẹyẹ ọwẹ jịra?
À me irya ká angịnyị baba nyọka wo ẹrụ ọnyịịla alẹ ịnyịnyị?

5. IJisọsị mẹ ẹlịlẹhị i-ju apyobwuna jẹ

Datị hi ẹrụ ọnyịịla nya Ịpyị-Adịrahụ ọ-kpa pyẹ, iJisọsị kaa mẹ ẹla ịkịla ịlẹ kị ka da angịnyị ụbwọ jẹ. Kụ ẹhị yẹ ọ-chụ pwokwita ịhyẹ bwu Ẹla Ọmẹjẹ Oluhye Ọgbọdọ wẹẹ. Wa ịMatiyu 6:14, 34 bala 7:12, kanụ ya ẹla u-uhye nya ịtọ ẹla ịlẹ:

Ẹla i-ju apyobwuna iyina iJisọsị à tí mẹjẹ ọgba ịwẹ?
À me irya ká ẹla ịwẹ ka jẹ́-ẹ da angịnyị ụbwọ alẹ?

6. IJisọsị họ akụrwọ ẹbyẹbyị

IJihova ya ọngịrị ha iJisọsị nyọka họ akụrwọ ẹbyẹbyị lụmẹ-lụmẹ. Nyọka yẹ ọ-chụ pwokwita ọhẹ, wa ịMakị 5:25-34 lee yẹ IFIM ọwẹ, kanụ ya ẹla u-uhye nya ịtọ ẹla ịlẹ kị tọọ da.

IFIM: Ọnyang Ọlẹdụrụ Ọhẹ La Uda Ọhọhọ (5:10)

Ẹ-ẹpwụ nya ifim ọwẹ, ẹlịyẹ ọnyang ọlẹdụrụ ọwẹ à tị́ jẹ́ myị̀myị̀?
Ịyẹ à tị́ kpụng ịpyọ u-uhye nya ụkụrwọ ẹbyẹbyị ọwẹ?

Wa ịJọn 5:36, kanụ ya ẹla u-uhye nya ịtọ ẹla ọlẹ:

Ẹlịyẹ ụkụrwọ ẹbyẹbyị nya iJisọsị à tị́ “ri ibeenu” lee ọ-mẹjẹ u-uhye nyamwụ?

À jẹ́ ẹla ọlẹ?

Iru nya ẹla ịlẹ kahị jẹ́ u-uhye nya iJisọsị bwu apwụ nya ịBayịbụụ ine ịlẹ kịị wụrụ nya apwụ nya Ẹrụ Ọnyịịla. Apwụ ịịwa ri ịMatiyu, ịMakị, iLuku, bala ịJọn. Ọngọngọọng nya angị da apwụ nya Ẹrụ Ọnyịịla ịwẹ, gu ẹnyị nya ang ịdatị-datị u-uhye nya iJisọsị. Ụka kahị wa apwụ ine-ine ịwẹ, ẹla ọlẹ kahị ka jẹ́ u-uhye nya ọhịhị nya iJisọsị ka kpụhị ịpyọ yẹẹyẹẹ.

ỊMATIYU

à da ụpwụ nyamwụ jene lẹ. O ya ẹla yẹẹyẹẹ u-uhye nya ang ọmẹjẹ nya iJisọsị, ọgụgụụgụ ri ang ịlẹ ká iJisọsị mẹjẹ chajị nya Ịpyị-Adịrahụ nya Ohe.
ỊMAKỊ

à da ụpwụ nya Ẹrụ Ọnyịịla ọlẹ kọ la kpii gụ wuu ẹẹ. Ọ ya ẹla yẹẹyẹẹ u-uhye nya ang ịkpịpyọ-kpịpyọ ịlẹ kị họ.
ILUKU

ya jehi jaabwọ ká abwọ ọrịrị baba ha iJisọsị kaka ba bala ọ-chabwọ jaabwọ ká iJisọsị kaa kpa anyang ụ-ụgbẹyị ọdụmwọ.
ỊJỌN

ya ẹla yẹẹyẹẹ u-uhye nya ọngịnyị ụma ọlẹ ká iJisọsị ri bwula o-joja nya ẹla ịlẹ ká iJisọsị ya bala aligu nyamwụ, tụ́ angịkịla ịnyịnyị.