IJihova ri Ohe ọlẹ kọ kaa họ ang memeeme. (1 Ala ịKọrịntị 14:33) Lẹ angịnyị nyamwụ á ka jẹ́-ẹ họ ẹla júgu-jùgu ẹnẹnẹhẹ ka. Ányị iJihova à tị́ kaa kpẹhị rịrị ọjịra-jịra nyamwụ? Ányị ahị tị́ ka bwu dụbwọ ẹ-ẹpwụ nya ọnwànwa nya ọjịra-jịra?

1. Oowo à tị́ ri olegbeju nya ọjịra-jịra?

‘ỊKịrayịsị ayịdang à ri olegbeju nya ọjịra-jịra lẹ.’ (Ala Efesọsị 5:23) Ọ kaa kpẹhị rịrị ụkụrwọ nya angịnyị nya iJihova odehe wuu bwu epwoohe. IJisọsị chụ angịgbahị nya ọjịra-jịra ịlẹ kị godayị giri-giri lụka ọtata lẹ nyọka ri “ọnchẹ ọ-chịla o-hu ọkịlẹtụ ha bala ọngọ jẹ́ ẹla.” Ịwa-ịwa à ri Angị Kpẹhị Rịrị Ogu lẹ. (Wa ịMatiyu 24:45-47.) Lala alẹrụ bala angịgbahị ịla iJerusalẹm ugbeene, Angị Kpẹhị Rịrị Ogu ịwẹ kaa kpịlahị ẹ-ẹpwarịrị nya ọjịra-jịra wuu. (Ụkụrwọ nya Alẹrụ 15:2) Ma, a-alẹng ịwẹ à ri alegbeju nya ogu nyahị ka. IJihova bala Omyi Ẹla nyamwụ à kaa kpaa ụgbẹyị lẹ, ị tị kaa kpịlaa keji ha olegbeju oriri nya iJisọsị.

2. Ịyẹ à tị́ ri ụkụrwọ nya angịgbahị nya ọjịra-jịra?

Angịgbahị nya ọjịra-jịra ri alẹng ịlẹ kị gbịgba ha iJihova lụka ọtata lẹ. Ị kaa mẹ ang jẹ angịnyị nya iJihova bwu ịBayịbụụ, ị myịmyị kaa daa ụbwọ bala o-jwaa ọhụ. Ị́ kaa nwaa uri nya ụkụrwọ ọwẹ ka. Ọkọkọ nya ọọwa, ị kaa ‘họọ la irya ookpokpo jaabwọ ká Ohe Oluhye ayịdang tịtọ, la ọ-dahịhile ịkọbọ ka, ma ẹ-ẹpwụ nya ịpyọ ọkpụkpụ nyamwụ.’ (1 iPita 5:1, 2) Angịmyẹrụ kaa tuubwu yi angịgbahị nya ọjịra-jịra ịnyịnyị. Kori kọ tị nọ chẹẹ, angịmyẹrụ ịwẹ kaa nwà ka ri angịgbahị lịlaa.

Angị Kpẹhị Rịrị Ogu kaa chụ angịgbahị ịhyẹ nyọka ri angị kpẹhị rịrị isekut. Ị kaa ju ọjịra-jịra ịdatị-datị ụga nyọka mẹ ang jáa bala ọ-ka jwaa ọhụ. Angị kpẹhị rịrị isekut kaa kpa ẹla ọlẹ ká Ụpwụ Ịgọgọ ya chụ angịmyẹrụ bala angịgbahị nya ọjịra-jịra.—1 iTimoti 3:1-10, 12; ịTayịtọsị 1:5-9.

3. Ụkụrwọ oyina Olibeenu nya iJihova ọnyọnyọọnyị à tị́ la?

Ọng myị́ ọng kaa “gwogbo” ha iJihova bwula ọ-la ụpa ọọjịra-jịra bala o-ya ẹrụ ọnyịịla jaabwọ kị ka jụ họ kaka ba.—Wa Eje Ọnyịịla 148:12, 13.

 JẸ́ GỤ ỌỌWA

4. IJisọsị ri olegbeju ọdụmwọ

IJisọsị wụrụụhị wẹ ẹga nyamwụ. Wa ịMatiyu 11:28-30, kanụ ya ẹla u-uhye nya ịtọ ẹla ọlẹ:

• Irya ọlanyị iJisọsị à tị́ tịtọ kahị ka la u-uhye nya ịlahị ọkpakpa nyamwụ?

5. Angịgbahị kaa mẹ ang jẹ bwula ọgụ-ẹpẹtẹ nyaa

1. Angịgbahị nya ọjịra-jịra kaa họ ká igu oriri nyaa bala iJihova ka la ọngịrị, ị tị kaa da ugbiyegu nyaa ụbwọ nyọka họ ịnyị ịnyịnyị

2. Angịgbahị kaa kpahị ju ọng myị́ ọng ọọjịra-jịra

3.   Angịgbahị kaa ya ẹrụ ọnyịịla ụka myị́ ụka

4. Angịgbahị ri angịmẹjẹ. Ị tị kaa kpa ẹga cheri-cheri bala ọ-họ akụrwọ ịkịla ịnyịnyị

6. Ahị ka jẹ́-ẹ họ ụkụrwọ bala angịgbahị nya ọjịra-jịra

ỊBayịbụụ ya ẹlẹhẹ ọkpọnchị ọlẹ kọ du kahị baba nyọka ju ihi nya angịgbahị nya ọjịra-jịra. Wa Ala iHiburu 13:17, kanụ ya ẹla u-uhye nya ịtọ ẹla ịlẹ:

• Ịyẹ tị́ du ká ịBayịbụụ ya nyori ahị nyị ju angị wẹẹ kpịlahị ihi? Ányị ahụ à tị́ yẹ ẹlẹwẹ?

Wa iLuku 16:10, kanụ ya ẹla u-uhye nya ịtọ ẹla ọlẹ:

• Ịyẹ tị́ du kọ baba nyọka ju angịgbahị ihi kori kọ dọmwụ ri ẹla ọ-pyịnyẹng?

 ẸLỊYẸ A TỊ́ JẸ́?

IJisọsị à ri olegbeju nya ọjịra-jịra lẹ. Ahị kaa ju ihi nya angịgbahị ịlẹ kị wẹẹ họ ụkụrwọ e-ekpeleji nyamwụ chajị ị kaa dahị ụbwọ nyọka la okpunyi nya ọkịlẹtụ bala ọ-mẹ ang jẹ́ẹhị bwula ọgụ-ẹpẹtẹ nyaa.

Ẹlịyẹ A Tị́ Yụbwọ Chị?

• Owo à tị́ ri olegbeju nya ọjịra-jịra?

• Ányị angịgbahị à tị́ kaa da ọjịra-jịra ụbwọ?

• Ụkụrwọ oyina ọnchẹ nya iJihova ọnyọnyọọnyị à tị́ kaa họ?