ANG ỌJẸ́JẸ 27
Ányị Igu nya IJisọsị à Tị́ ka Chịhị Da?
Ahị kaa họ ọhọbịrị, yẹ akama, bala o-gbu chajị nyọlẹ ká Adam bala Iivu ju ihi nya Ohe ka. a Ma, ahị tị la ẹhị ọrịrịị-rịrị. IJihova du iJisọsị ịKịrayịsị Ọnyị nyamwụ warị wẹ odehe ka gbu wọnụ nyahị ju chajị kahị ka la ọchịda bwu ẹpwụ nya ọhọbịrị bala igu. ỊBayịbụụ mẹjẹ nyori iJisọsị nyị rahị kpehe bwula igu nyamwụ. Ọhịhị ọkpẹẹkpẹẹ nyamwụ ọlẹ kọ hu ha à ri uri ọlẹ kọ nwụ̀ nyọka rahị kpehe lẹ. (Wa ịMatiyu 20:28.) Chajị nyọlẹ ká iJisọsị la kpẹẹkpẹẹ bala ọ-kaa ju ihi nya iJihova, ọ ka jẹ́-ẹ hịhị gboyi myị́ oyi ụka kọ jam odehe ịnọ myị́. Ma, o gbu chajị kahị ka jẹ́-ẹ la ang ịlẹ wuu ká Adam bala Iivu ya byi tịrẹkpẹ. IJisọsị mẹjẹ jaabwọ kahị họ́ọ ọwa bala iJihova kaka ba ịnyịnyị. Ang ọjẹ́jẹ ọlẹ ka họ ká ẹla nya iJisọsị ka myịng lẹhị gụ ọọwa.
1. Ányị igu nya iJisọsị à tị́ dahị ụbwọ alẹ?
Nyọlẹ kahị ri alịhọbịrị, ahị kaa họ ẹla wụ́ iJihova ẹjẹ ụka lụmẹ-lụmẹ. Ma, kori kahị chị ijẹma u-uhye nya ọhọbịrị nyahị, kahị bịlẹ iJihova bwula ẹnyị nya iJisọsị nyọka hịnyọhi hahị, kahị tị maga la ọngịrị nyahị wuu nyọka ma ọhọbịrị ọọwa họ kaka aalẹ, ahị ka jẹ́-ẹ ri aligu nya Ohe. (1 ịJọn 2:1) ỊBayịbụụ yẹkẹẹ: “ỊKịrayịsị ọlabwẹla ọnyịịla gbu igu ọlụka ookpokpo ọlẹ kọ nwa ụga ọ-pyịyọọ chajị nya ịhọbịrị nyahị ahị angịnyị ehe wuu. ỊKịrayịsị gbu igu ọọwa wọnụ nyahị ahị alabwẹla onyobyi ju, chajị kọ ka jẹ́-ẹ bwula ọọwa kpahị kịla Ohe Oluhye.”—1 iPita 3:18.
2. Ányị igu nya iJisọsị à tị́ ka dahị ụbwọ ị-ịlahị?
IJihova du iJisọsị ka ya ọhịhị ọkpẹẹkpẹẹ nyamwụ kiliya “chajị ká ọng myị́ ọng ọlẹ kọ myị [la iJisọsị] lẹ, á ka ta ayịreji kaka. Ma, kọ ka la ọhịhị ọmyịmyị-ka.” (ỊJọn 3:16) Chajị nya ẹla ọlẹ ká iJisọsị họ, iJihova ja ka nwụla ang ịlẹ ká egbeju ọngịrị nya Adam bịrị, lụka ọ-kpii. Ọọwa ri, kori kahị la ọmyịmyị u-uhye nya iya ọkịlaakịla nya iJisọsị, ahị ka la iwe nyọka hịhị gboyi myị́ oyi odehe onyeewe!—Ayịsaya 65:21-23.
JẸ́ GỤ ỌỌWA
Jẹ́ ang gụ ọọwa u-uhye nya ang odudu ká iJisọsị hu ọhịhị nyamwụ kiliya bala abwọlẹ á ka yé apyobwuna bwu iya ọkịlaakịla ọọwa.
3. Igu nya iJisọsị họ ahị lịlọhị bwu ọhọbịrị bala igu
Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.
-
Iwe oyina à tị́ nyẹ Adam nyọlẹ kọ họ ọhọbịrị?
Wa Ala iRom 5:12, kanụ ya ẹla u-uhye nya ịtọ ẹla ọlẹ:
-
Ányị ọhọbịrị nya Adam à tị́ gu ọhịhị nyang?
Wa ịJọn 3:16, kanụ ya ẹla u-uhye nya ịtọ ẹla ọlẹ:
-
Ịyẹ tị́ du ká iJihova du Ọnyị nyamwụ wẹ odehe?
-
Adam ri ọlẹng ọkpẹẹkpẹẹ ọlẹ kọ họ ọhọbịrị, chajị nya ọọwa angịnyị ehe wuu kaa họ ọhọbịrị bala ọ-gbu
-
IJisọsị ri ọlẹng ọkpẹẹkpẹẹ ọlẹ kọ ju ihi nya Ohe, chajị nya ọọwa angịnyị ehe ka jẹ́-ẹ la kpẹẹkpẹẹ bala ọ-la ọhịhị ọmyịmyị-ka
4. Igu nya iJisọsị ka jẹ́-ẹ da ọng myị́ ọng wuu ụbwọ
Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.
-
Ányị igu nya ọngọ ookpokpo à tị́ ka ju apyobwuna ha angịnyị wuu?
Wa 1 iTimoti 2:5, 6, kanụ ya ẹla u-uhye nya ịtọ ẹla ọlẹ:
-
Adam ri ọlẹng ọkpẹẹkpẹẹ, ma nyọlẹ kọ họ ọhọbịrị, angịnyị ehe wuu kaa họ ọhọbịrị bala ọ-kaa gbu. IJisọsị ri ọlẹng ọkpẹẹkpẹẹ. Ụgbẹyị oyina ọhịhị nya iJisọsị ọlẹ kọ hu kiliya à tị́ chịhị da bwu ẹpwụ nya ọhọbịrị bala igu?
5. Iya ọkịlaakịla nya iJisọsị ri āhị ọlẹ ká iJihova ya hang
Aligu nya iJihova kaa yẹ iya ọkịlaakịla nya iJisọsị lala āhị ọlẹ ká iJihova ya haa ịwa lịlaa. Ọ-chụ pwokwita, wa Ala ịGaletiya 2:20, kanụ ya ẹla u-uhye nya ịtọ ẹla ọlẹ:
-
Ányị ọlẹrụ ịPọlụ à tị́ mẹjẹ nyori o hu iya ọkịlaakịla nya iJisọsị nya āhị ọlẹ ká iJihova ya họọ?
Ụka ká Adam họ ọhọbịrị, eje nya igu woo ọwa bala anyị nyamwụ wuu. Ma iJihova du Ọnyị nyamwụ warị ka gbu chajị ká ka jẹ́-ẹ hịhị gboyi myị́ oyi.
Jaabwọ ká wẹẹ wẹ Ụpwụ Ịgọgọ ọwẹ, kụ irya nya abwọlẹ kọ ka la iJihova ụka ká Ọnyị nyamwụ wẹẹ yẹ akama wẹẹ. Wa ịJọn 19:1-7, 16-18, kanụ ya ẹla u-uhye nya ịtọ ẹla ọlẹ:
-
Ányị ẹla ọlẹ ká iJihova bala iJisọsị họ hang à tị́ lang?
ỌNGỊNYỊ KA TỌNG WO MYỊ́: “Ányị igu nya ọlẹng ookpokpo à tị́ ka chị iru nya angịnyị da myị́?”
-
Ányị a tị́ ka wẹ?
ẸLỊYẸ A TỊ́ JẸ́?
Chajị nyọlẹ ká iJisọsị gbu, iJihova ka jẹ́-ẹ hịnyọhi ịhọbịrị nyahị, ahị tị myịmyị ka jẹ́-ẹ hịhị gboyi myị́ oyi ịnyịnyị.
Ẹlịyẹ A Tị́ Yụbwọ Chị?
-
Ịyẹ tị́ du ká iJisọsị gbu?
-
Ụgbẹyị oyina ọhịhị nya iJisọsị ọlẹ kọ hu kiliya à tị́ chịhị da bwu ẹpwụ nya ọhọbịrị bala igu?
-
Ányị igu nya iJisọsị à tị́ ju apyobwuna hang?
JẸ́ ANG ỊLẸ DỌỌ U-UHYE
Jẹ́ ang odudu kị wụrụ ọhịhị ọkpẹẹkpẹẹ nya iJisọsị nya āhị nya ọ-ra kpehe.
“Ányị Iya Ọkịlaakịla nya IJisọsị à Tị́ ‘Chị Iru nya Angịnyị Da’?” (Ụpwụ ọla intanẹtị)
Jẹ́ ang ọlẹ kahị ka họ nyọka chịda.
“Ụgbẹyị Oyina IJisọsị à Tị́ Chị Angịnyị Da?” (Ụpwụ ọla intanẹtị)
IJihova ka jẹ́-ẹ hịnyọhi ịhọbịrị ịtụka ịnyịnyị?
“Ọwẹwẹ nya Ịtọ Ẹla u-Uhye nya ỊBayịbụụ” (Ẹpwang ọ-Kụ Gbeji nya ahyẹẹnụ 1 nya Ọya Ọharụ, 2013)
Yẹ jaabwọ ká ẹla ọjẹ́jẹ u-uhye nya iya ọkịlaakịla nya ịKịrayịsị da ọlẹng ọhẹ ụbwọ nyọka yẹ abwẹla nyamwụ da.
a Ọhọbịrị á ri ang ọtịpyọ ọhọhọ kem ka. O ri iwe-ahụrụ ọlẹ kahị ji du ká irya nyahị kaa kpahị jahị da ang ọtịpyọ ọhọhọ chajị nyọlẹ kahị ri anyị nya Adam bala Iivu.
