ANG ỌJẸ́JẸ 55
Da Ọjịra-jịra Nyang Ụbwọ
Ịkịka nya odehe wuu, uku-uku nya angịnyị kaa gbịgba ha iJihova la ọkẹkẹnị ụ-ụwa ẹ-ẹpwụ nya ụnụụnọ nya ọjịra-jịra. Ang ọlẹ kị kaa mẹjáa bala abwọlẹ kị kaa kpaa ụgbẹyị myaa lẹhị yẹẹyẹẹ, ọ tị kaa kpaa ịpyọ nyọka da ọjịra-jịra ụbwọ a-agbẹyị lụmẹ-lụmẹ. Irya ọlịnyị a la u-uhye nya ọjịra-jịra ọlẹ ká ji lẹ?
1. Agbẹyị iyina a tị́ ka jẹ́-ẹ kpa ụka bala ọngịrị nyang da ọjịra-jịra ụbwọ?
Ọng myị́ ọng nyahị wuu ka jẹ́-ẹ dụbwọ ọọjịra-jịra. Ọ-chụ pwokwita, angịhyẹ juwa ọọjịra-jịra nyang kị ri angịgbahị lụmẹ lẹ lee ọ-la ịnyịrọ ogogo ka? À ka jẹ́-ẹ dụbwọ kpaa ka ọjịra-jịra? Lee à ka jẹ́-ẹ daa ụbwọ a-agbẹyị ịkịla, lala ọ-ka ra ang oriri kpa waa lee ang ịkịla ịlẹ kị baba, lee ọ-dụbwọ kpa ẹpwa nyaa cheri-cheri? (Wa iJemsi 1:27.) Ịnyịnyị, ahị ka jẹ́-ẹ yụbwọ kpịlọhị ọ-ọkịlẹtụ nyọka dụbwọ kpa Ube nya Ịpyị-Adịrahụ cheri-cheri bala ọ-kpahị jwoo. Ọngọngọhẹ á kaa gbileehi la agbụrụ ka họ ang ịwẹ ka. Ọháha ọlẹ kahị la ẹ-ẹga nya iJihova bala aanahị à kaa guhi gbịla nyọka hu ịlọhị ha “bwu ọkịlẹtụ” lẹ.—Eje Ọnyịịla 110:3.
Aanahị ịlẹ kị hu enyi Ohe lẹ ka jẹ́-ẹ da ọjịra-jịra ụbwọ a-agbẹyị ịkịla. Aanahị alẹng ịlẹ kị ri adam alẹng ẹ-ẹpwụ nya ang nya olegu ka jẹ́-ẹ ri angịmyẹrụ lee angịgbahị nya ọjịra-jịra. Aanahị alẹng tụ́ anyang ka jẹ́-ẹ dụbwọ kpa ẹrụ ọnyịịla pyẹ yẹẹyẹẹ bwula o-ye ịlahị nya ụgbẹyị. Angịhyẹ ka jẹ́-ẹ dụbwọ nwụ́ ẹga ịgbịgba lee ọ-mwụ́ ka ọjịra-jịra ọlẹ kọ baba nya ụbwọ ọdada a-agbẹyị ịkịla.
2. Ányị ahị tị́ ka kpa okpoko bala ang ụdụ nyahị da ọjịra-jịra ụbwọ?
Ahị ka jẹ́-ẹ “chị ihi ju [iJihova] bwula ang ịlẹ [kahị] la.” (Etu 3:9) Ahị hwoo nya ihi ọtụka-ọtụka nyọka hu okpoko bala ang ụdụ nyahị ha nyọka da ọjịra-jịra bala ụkụrwọ nya ẹrụ ọnyịịla ọ-kpa pyẹ ọla odehe wuu ụbwọ. (Wa 2 Ala ịKọrịntị 9:7.) Ị kaa kpa ọhaha nyahị da aanahị ịlẹ ká ẹla o-bwagaga họ ta ụbwọ ịnyịnyị. Angịhyẹ kaa “hu okpoko ọhẹ nụwa a-ang” ụka myị́ ụka, chajị kị ka hwoo ha. (Wa 1 Ala ịKọrịntị 16:2.) Ahị ka jẹ́-ẹ ya ọhaha nyahị ju a-akpa ịlẹ kị kaa ya rịrị ẹ-ẹga ọgbịgba nyahị lee o-hu ha bwu intanẹtị ịị donate.pr418.com. IJihova ya iwe hahị nyọka mẹ ọháha ọlẹ kahị la ẹ-ẹga nyamwụ jẹ bwula ọ-kpa okpoko bala ang ụdụ nyahị da ọjịra-jịra ụbwọ.
JẸ́ GỤ ỌỌWA
Kụ ẹhị yẹ agbẹyị ịhyẹ ịlẹ á ka jẹ́-ẹ da ọjịra-jịra ụbwọ.
3. Ahị ka jẹ́-ẹ hu ang ụdụ nyahị ha
IJihova bala iJisọsị la ọháha ẹ-ẹga nya angịlẹ kị kaa hu ha la ọkẹkẹnị. Ọ-chụ pwokwita, iJisọsị mịloja ha ahụ-ogu ọhẹ ọlẹ kọ la ang gbuu ka, ma kọ tị maga nyọka hu ha. Wa iLuku 21:1-4, kanụ ya ẹla u-uhye nya ịtọ ẹla ịlẹ:
-
Ahị baba nyọka hu okpoko ọtụka-ọtụka ha ene kọ ka kpụ Ohe ịpyọ?
-
Ányị ọ tị́ kaa la iJihova bala iJisọsị ụka kahị hu ha bwu ọkịlẹtụ?
Nyọka jẹ́ ang ọlẹ kị kaa kpa ọhaha nyahị họ, yẹ IFIM ọwẹ, kanụ ya ẹla u-uhye nya ịtọ ẹla ọlẹ:
-
Ányị ị tị́ kaa bwu kpa o-hu ha nyahị da ọjịra-jịra ịla ịkịka nya odehe wuu ụbwọ?
4. Ahị ka jẹ́-ẹ yụbwọ kpụ ịlọhị ọ-ọkịlẹtụ nyọka dụbwọ
Lụka onyogo, angị kaa gbịgba ha iJihova kaa họ ụkụrwọ yẹẹyẹẹ nyọka kpahị ju ẹga ọgbịgba nyaa. Ma, ọọwa gụ ọ-ka hu okpoko ha kem. Wa 2 Ego Ogbegbe 34:9-11, kanụ ya ẹla u-uhye nya ịtọ ẹla ọlẹ:
-
Ányị ọla Isirẹlụ ọnyị myị́ ọnyị à tị́ kaa dụbwọ kpahị ju ube ịgọgọ nya iJihova lee ẹga ọgbịgba?
Nyọka yẹ jaabwọ ọlẹ ká Alibeenu nya iJihova kaa ba ọhọhọ ọlụka nya ịBayịbụụ ọwẹ jẹ, yẹ IFIM ọwẹ, kanụ ya ẹla u-uhye nya ịtọ ẹla ịlẹ:
-
Ịyẹ tị́ du kọ baba nyọka kpa Ube nya Ịpyị-Adịrahụ nyahị cheri-cheri bala ọ-kpahị jwoo?
-
Agbẹyị iyina a tị́ ka jẹ́-ẹ dụbwọ?
5. Aanahị alẹng ka jẹ́-ẹ hu ịlaa ha nyọka da ọjịra-jịra ụbwọ gụ ọọwa
Ụpwụ Ịgọgọ ju Angịnyị nya ịKịrayịsị ịlẹ kị ri alẹng ọhụ nyọka maga la ọngịrị nyaa wuu nyọka da ọjịra-jịra ụbwọ. Nyọka yẹ ọ-chụ pwokwita, yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.
-
Ẹ-ẹpwụ nya ifim ọwẹ, ányị Ryan à tị́ maga nya ịlẹhị-ịlẹhị nyọka da ọjịra-jịra ụbwọ gụ ọọwa?
ỊBayịbụụ ya ẹla u-uhye nya ang ịlẹ ká angịlẹ kị tịtọ nyọka ri angịmyẹrụ lee angịgbahị nya ọjịra-jịra ka họ. Wa 1 iTimoti 3:1-13, kanụ ya ẹla u-uhye nya ịtọ ẹla ịlẹ:
ỌNGỊNYỊ KA TỌNG WO MYỊ́: “Ale Alibeenu nya iJihova à tị́ kaa yé okpoko bwu kpa họ ụkụrwọ nyaa?”
-
Ányị a tị́ ka wẹ?
ẸLỊYẸ A TỊ́ JẸ́?
Ọ myị̀ iJihova lẹhị nya abwọlẹ kahị kaa kpa ụka, ọngịrị, bala ang ụdụ nyahị da ọjịra-jịra ụbwọ.
Ẹlịyẹ A Tị́ Yụbwọ Chị?
-
Ányị ahị tị́ ka bwu kpa ụka bala ọngịrị nyahị da ọjịra-jịra ụbwọ?
-
Ányị ahị tị́ ka bwu kpa ang ụdụ nyahị da ọjịra-jịra ụbwọ?
-
Agbẹyị iyina à tị́ háng ká ka da ọjịra-jịra ụbwọ?
JẸ́ ANG ỊLẸ DỌỌ U-UHYE
Kụ ẹhị yẹ ang odudu ọlẹ ká Ohe á tịtọ ká angịlẹ kị kaa gbịgba họọ ka hu ebwo nya ang ookpokpo ẹ-ẹpwụ nya iwo ha kaka.
Akụrwọ ịhyẹ ji ká ịBayịbụụ ya nyori alẹng ịlẹ kị hu enyi Ohe nya-à ka haa lẹ. Ma kori ká ọnyang ọlẹ kọ hu enyi Ohe á tị baba nyọka họ akụrwọ ịwẹ bẹẹ?
“Etu nya Olegbeju Oriri ẹ-Ẹpwụ nya Ọjịra-jịra” (Ẹpwang ọ-Kụ Gbeji nya Ọya Oheeye, 2021)
Wo oja nya aanahị alẹng ịhyẹ ịlẹ kị mẹ ugbodu ojuju jẹ bwula ọ-chịlaa imyi kpẹpwụ nyọka kpa apwụ nyahị kịla aanahị ịkịla.
Ọ-Kpa Apwụ ị-Da ỊBayịbụụ Wụlẹ Nyahị Kịla Aanahị Ịla Congo (4:25)
Jẹ́ ang odudu ká abwọlẹ ká Alibeenu nya iJihova kaa yé okpoko kpa họ ụkụrwọ nyaa datị hi abwọlẹ ká alebwo nya ịgba ọgbagba ịkịla kaa họ.
“Ányị Alibeenu nya IJihova à Tị́ Kaa Bwu Yé Okpoko Kpa Họ Ụkụrwọ Nyaa?” (Ụpwụ ọla intanẹtị)
