ẸNỤ nya ịWẹnẹsdee, Ọya Ọhọhẹ 18, 2023, ẹla o-ya dodehe ọdatị ọhẹ kpehe ịị jw.org, kị ya nyori nyị chụ Aanahị Gage Fleegle bala Jeffrey Winder nyọka ri angịhyẹ nya Angị Kpẹhị Rịrị Ogu nya Alibeenu nya iJihova lẹ. Aanahị imiiye ịwẹ gbịgba ha iJihova kpẹẹkpẹẹ lụka ọtata lẹ.

Ị kpa Ọọnahị Fleegle nwa o-oye nya ọmwụ-ẹnụ obyi nya Pennsylvania, U.S.A., adamwụ bala ịnamwụ tị mẹ ẹlịlẹhị jọ́ọ bwu eji-eji ịnyịnyị. Ụka kọ gu ẹka iwo da uhye, ọwa bala alugbiyegu nyamwụ ka ẹpwụ nya epweji ọhẹ ọlẹ ká ọbaba nya angị kpa ẹrụ ọnyịịla pyẹ ji gụ́ ụka ọọwa. Nyọlẹ kọ nọ pyịnyẹng, o hu enyi Ohe la Ọya Ọkụrụ Okpokpo 20, 1988.

Adịda bala ịnịna nya Ọọnahị Fleegle kaa jwoo ọhụ ụka myị́ ụka nyọka kpa ụka nyamwụ wuu họ ụkụrwọ ha iJihova. Ị kaa ye angị kpẹhị rịrị isekut bala angị họ ụkurwọ ị-ịBẹtẹlụ wẹ ẹpwa nyaa ụka lụmẹ-lụmẹ, ọọwa du ká Ọọnahị Fleegle jẹ́ yẹ jaabwọ ká aanahị alẹng bala anyang ịwẹ kaa chị ọkẹkẹnị kaka ba. Nyọlẹ kọ hu enyi Ohe kpá, ọ́ tata ene kọọ dọmwụ nya ịlahị nya ụgbẹyị oyeye kpụrụrụ la Ọya Ohikichu 1, 1989 kaka. Ẹka imiiye kịlahị nya ọọwa, ọ wu ịngịhyẹ ọlẹ kọ chị nọ ha ịlọmwụ lụka kọ gu ẹka 12 ọyị, kọ ri ọ-ka họ ụkụrwọ ị-ịBẹtẹlụ. Ọ dọmwụ nyọka họ ụkụrwọ ị-ịBẹtẹlụ ọla Brooklyn la Ọya Okiriwo nya 1991.

Ụ-ụwa ị-ịBẹtẹlụ, Ọọnahị Fleegle họ ụkụrwọ ẹ-ẹpwụ nya ẹka ineku ẹ-ẹga ọlẹ kịị wu apwụ ba awụlẹ, ene kịị kpọọ ka Service Department. Lụka ọwẹ, ọ họ ụkụrwọ ẹ-ẹpwụ nya ẹka ịmanyị-ịmanyị bala aanahị ịla ọjịra-jịra ịlẹ kị kaa ya òja nya Russia. La 2006 o ye ọọnahị ọlẹ ká ẹnyị nyamwụ ri Nadia, ọwa ịnyịnyị wẹ ka julọọ ị-ịBẹtẹlụ. Ịwa lawụlẹ kaa ka ọjịra-jịra ọlẹ kịị ya òja nya ala Portugal ene kịị yẹ ka ọlẹ kị kaa ya òja nya ala Spain, ị tị da ụbwọ ụ-ụwa kpoye nya ẹka iwo. Nyọlẹ ká Ọọnahị Fleegle họ ẹka lụmẹ-lụmẹ ịị Service Department kpá, ị kpọọ ka họ ụkụrwọ  ẹ-ẹga nya Teaching Committee Office ene kịị kpọọ ka Service Committee Office. La Ọya Ọhata 2022 ị chwọọ nyọka ri ọngọ da ụbwọ nya ala Service Committee nya Angị Kpẹhị Rịrị Ogu.

Ị kpa Ọọnahị Winder ọwa nwa ịị Murrieta, California, U.S.A. Adamwụ bala ịnamwụ à kpọọ nwa ẹ-ẹpwụ nya ẹlịlẹhị lẹ, ọ tị hu enyi Ohe la Ọya Ọhata 29, 1986. Ọ chụ nyọka chị-chị ye ịlahị nya ụgbẹyị la ọya ọ-ba ọọwa ba kpangga. Ọ jẹ́ ịpyọ ọkpụpụ nyamwụ gbee kọọ tịtọ nyọka kịnyaa lọọ. Nyọlẹ kọ chị-chị ye ịlahị nya ụgbẹyị ẹ-ẹpwụ nya ọya ịmanyị-ịmanyị kpá, ọ dọmwụ nya ịlahị nya ụgbẹyị oyeye kpụrụrụ la Ọya Okiriwo 1, 1986.

Ụka ká Ọọnahị Winder gu ẹka iwo da uhye, ọ ju aanamwụ ịgbahị imiiye ịhyẹ kị juwa ị-ịBẹtẹlụ lụka ọwẹ ụga. Ụga ojuju ọọwa du kọ tịtọ nyọka ya ụbwọ ju ụpwụ ẹ-ẹpwụ nyọka ka ịBẹtẹlụ ụka kọ nwa pwụ ọọwa. La Ọya Ọharụ 1990 lẹ, ị wụrọọ ka ka họ ụkụrwọ ị-ịBẹtẹlụ ọla Wallkill lẹlẹ.

Ụ-ụwa ị-ịBẹtẹlụ, Ọọnahị Winder họ ụkụrwọ bala ebwo ịdatị-datị, lala Cleaning Department, Farm Department, bala Bethel Office. Ọ ye ọọnahị Angela, la 1997, ị tị kaa họ ụkụrwọ la awụlẹ ị-ịBẹtẹlụ bwu ụka ọọwa pyịyọọ. Ị kpaa rụ ka Warwick la ẹka nya 2014, ụ-ụwa Ọọnahị Winder kaa da ụbwọ ẹ-ẹpwụ ebe ịnwụnwụ ịla egbeju-ẹpwa nyahị ọlụwa. La ẹka nya 2016 kị rụ ka Watchtower Educational Center ọla Patterson, Ọọnahị Winder kaa họ ụkụrwọ bala ala Audio/Video Services. Ẹka ine ị-ịlahị nya ọọwa, ị tịrẹkpẹ ka Warwick, ọọwa ị chụ Ọọnahị Winder nyọka họ ụkụrwọ ịị Personnel Committee Office lẹlẹ. La Ọya Ọhata 2022, ị chwọọ nyọka ri ọngọ da ụbwọ nya ala Personnel Committee nya Angị Kpẹhị Rịrị Ogu.

Ahị raabwọ ká iJihova ka wahị kụrwaa jaabwọ kị wẹẹ kịnyaa la ọ-họ ụkụrwọ chajị nya Ịpyị-Adịrahụ nya Ohe, chajị ị ri “ịhaha” lee ahị bwu ẹga nyamwụ.—Efe. 4:8.