1. Ya ọ-chụ pwokwita nya ang odudu kahị baba nya iJihova ọ-ka kpahị ụgbẹyị wẹẹ.

 KỤ IRYA nyori à hwahị ẹ-ẹpwụ nya ipinu ọhẹ wẹẹ. Ang ị-la uhi-uhi lụmẹ-lụmẹ dakoko jung: iyo ịnyịịngịrị, ang ịchịchị ịlẹ kị ka ya ẹdụrụ ha ọngịnyị myị́, amẹ ịlẹ kịị wọ ọngịnyị, bala ụjẹ ọlẹ ká ọngịnyị ka chabwọ kpụ, lụmẹ ụ-ụwa. À ka chị ọkẹkẹnị yẹẹyẹẹ kori ká la ọngịnyị ọlẹ kọ ka kpang ụgbẹyị kpehe bwu ụwa, ọgụgụ kori ká ọngọọwa á jẹ́ ụwa yẹẹyẹẹ kpụ kọ ka jẹ́-ẹ kpang cheji ba hi ẹga ịlẹ kị la uhi-uhi! Odehe ọlẹ lala ipinu ọwẹ. Ang ị-la uhi-uhi ịlẹ kị ka bịrị igu oriri nyahị bala iJihova myị́ ji lụmẹ-lụmẹ. Ma ahị tị la ọngọ ka kpahị ụgbẹyị ọlẹ kọ la kpẹẹkpẹẹ, kọ ri iJihova. Ọ kaa kpahị cheji ba hi ang ị-la uhi-uhi jahị da ka ẹga ọlẹ kahị wẹẹ jẹ ka, kọ ri ọhịhị ọmyịmyị-ka ọla odehe onyeewe.

2. Ányị iJihova à tị́ kaa kpahị ụgbẹyị?

² Ányị iJihova à tị́ kaa kpahị ụgbẹyị? Ang ọhọhẹ ri Omyi Ẹla nyamwụ, kọ ri ịBayịbụụ. Ma, ọ tị kaa kpahị ụgbẹyị bwula angịnyị ehe ịnyịnyị. Ọ-chụ pwokwita, ọ kaa ya ang oriri nya olegu ọlẹ kọ kaa dahị ụbwọ nyọka jẹ́-ẹ cheje nya ẹla la ẹla ọjẹ́jẹ hahị bwula “ọnchẹ ọ-chịla o-hu ọkịlẹtụ ha bala ọngọ jẹ́ ẹla.” (Mat. 24:45) IJihova kaa kpahị ụgbẹyị bwula angịkịla ịlẹ kị nwanwa yẹẹyẹẹ ịnyịnyị. Ọ-chụ pwokwita, angị kpẹhị rịrị isekut bala angịgbahị nya ọjịra-jịra kaa juhị ọhụ bala ọ-mẹ ang jẹẹhị ụ-ụgbẹyị ọlẹ kọ kaa dahị ụbwọ ẹ-ẹpwụ nya ụka olujwo. Ahị ji iJihova obe yẹẹyẹẹ nyọlẹ kọ wẹẹ kpahị ụ-ụgbẹyị ọlam-ọlam la ahyẹẹnụ ihyẹẹkpẹ nya odehe ọlẹ! O du kahị jẹ́-ẹ kịnyaa la ọ-họ ang ọlẹ kọ ka kpụ iJihova ịpyọ bala ọ-jẹdịyẹ kịnyaa ụ-ụgbẹyị nya ọhịhị.

3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

³ Ọ tị lịnyị odu lẹ, ọ ka lahị ujwo ụka ọhẹ la ọ-ka ba ẹla ọmẹjẹ  nya iJihova jẹ myị́, ọgụgụ kori ká ẹla ọọwa á wụhị ọyị bwu ẹga nya angịnyị ehe ịlẹ kị la kpẹẹkpẹẹ ka. Ịyẹ tị́ du? Ẹla ọlẹ kị byihi á ka ri ọlẹ kọ háahị ka myị́. Lee ahị ka ya myị́ nyori ẹla ọlẹ kị mẹjẹẹhị wẹ á la kpakpa nwà ka lẹ, ọ́ ka jẹ́-ẹ bwu ẹga nya iJihova ka. Ụka ọlịnyị, ahị baba nyọka jẹ́ myị̀myị̀ nyori iJihova à wẹẹ kpa angịnyị nyamwụ ụgbẹyị lẹ bala o-ri ẹla nyamwụ ọ-ba jẹ kaa kpa apyobwuna wahị ụka wuu. Nyọka dahị ụbwọ ju ahị ọdahile nyahị ọngịrị, ang ọjẹ́jẹ ọlẹ ka ya ẹla u-uhye nya (1) abwọlẹ ká iJihova kpa angịnyị nyamwụ ụgbẹyị lụka onyogo, (2) abwọlẹ kọ wẹẹ kpahị ụgbẹyị alẹ, bala (3) abwọlẹ kahị kaa ye apyobwuna bwula ọ-kịnyaa la ọ-ba ụgbẹyị nyamwụ jẹ.

ABWỌLẸ KÁ IJIHOVA KPA ẸPWỤMA NYA ISIRẸLỤ ỤGBẸYỊ

4-5. Ányị iJihova à tị́ mẹjẹ nyori ọwa à wẹẹ kpa ala Isirẹlụ ụgbẹyị bwula iMosisi lẹ? (Yẹ ifoto.)

⁴ IJihova chụ iMosisi nyọka kpa ala Isirẹlụ kpehe bwu Ijipiti. Ọ tị ya ang-ẹjẹẹ ha ala Isirẹlụ kị ka jẹ́ nyori ọwa à wẹẹ kpaa ụgbẹyị bwula iMosisi lẹ. Ọ-chụ pwokwita, ọ kaa kpaa ụgbẹyị la abwụma nya egbamwụ ọhẹ lẹnụ bala ila ụma ọhẹ lodu. (Ehe. 13:21) IMosisi ba egbamwụ bala ila ị-ịwa jẹ, ị tị kpọọ ọwa bala ala Isirẹlụ ụgbẹyị kaka ta Ihu Ọnyẹẹgbẹgbụ. Angịnyị ju uhi nyọlẹ kị me nyori ịwa nyị wụ hịla a-arịrị nya ihu bala alẹwụ nya ala Ijipiti ịlẹ kị wẹẹ kwaa lẹ. Ị me nyori iMosisi nyị họ tịpyọ nyọlẹ kọ kpaa kaka ta Ihu Ọnyẹẹgbẹgbụ. Ma iMosisi á họ ẹlẹhẹ tịpyọ ka. IJihova à tọchị-tọchị kpa angịnyị nyamwụ ụgbẹyị ka ụwa bwula iMosisi lẹ. (Ehe. 14:2) Ọọwa Ohe à chaa da ụ-ụgbẹyị ọla ẹbyẹbyị lẹlẹ.—Ehe. 14:26-28.

⁵ Ẹ-ẹpwụ nya ẹka 40 kịlahị nya ọọwa, iMosisi kịnyaa la ọ-dahịhile nyori iJihova à wẹẹ kpa egbamwụ ọwẹ kpa angịnyị nyamwụ ụgbẹyị u-ugbileji lẹ. a Ụka ọhẹ dọmwụ ji ká iJihova ya egbamwụ ọọwa rịrị u-uhye nya ọdụ nya iMosisi, chajị ká ala Isirẹlụ wuu ka jẹ́-ẹ yọọ. (Ehe. 33:7, 9, 10) IJihova kaa ya ẹla bwu ẹpwụ nya egbamwụ ọọwa ta iMosisi, ọọwa lẹ iMosisi à kaa ya ẹla ọọwa kpata ya je ala Isirẹlụ lẹlẹ. (Eje. 99:7) Ala Isirẹlụ la ang-ẹjẹẹ lụmẹ-lụmẹ ịlẹ kị mẹjẹ nyori iJihova à wẹẹ kpa iMosisi kpaa ụgbẹyị lẹ.

6. Ányị ala Isirẹlụ à tị́ họ la ẹla ọmẹjẹ nya iJihova? (Ọwawa 14:2, 10, 11)

⁶ Ọ tị tolujwo nyori, ụmụmẹ nya ala Isirẹlụ nyẹẹkpẹ da ang-ẹjẹẹ ọlẹ kọ mẹjẹ nyori iJihova à wẹẹ kpa iMosisi kpa angịnyị nyamwụ ụgbẹyị lẹ. (Wa Ọwawa 14:2, 10, 11.) Ị pwa ụka lụmẹ-lụmẹ nyori iJihova à wẹẹ kpa iMosisi họ ụkụrwọ lẹ. Ọọwa du ká iJihova pwa la ọ-ya iwe da ha oyi ọlụka ọwẹ nyọka pwụ Ọpyị ọ-Myọnụ Ha.—Ọwa. 14:30.

7. Ya ọ-chụ pwokwita nya angịhyẹ ịlẹ kị ba ụgbẹyị nya iJihova jẹ wẹẹ. (Ọwawa 14:24) (Yẹ ifoto ịnyịnyị.)

⁷ Ma, ala Isirẹlụ ịhyẹ tị ji kị myị dịrẹ ụgbẹyị nya iJihova. Ọ-chụ pwokwita, iJihova yẹkẹẹ: “ỊKalẹbụ . . . dịrẹm kpẹẹkpẹẹ lọkịlẹtụ ookpokpo.” (Wa Ọwawa 14:24.) Ohe wahị kụrụ ịKalẹbụ, kpụ ọ dọmwụ ya iwe da họọ nyọka chụ ẹga ọlẹ kọ họ́ọ gụ́ nyọka kụ ọ-ọpyị nya iKenan. (Joch. 14:12-14) Oyi nya ala Isirẹlụ ịlẹ ká Ohe ya iwe da ha nyọka pwụ ọpyị nya iKenan ya ọgụ-ẹpẹtẹ ọnyịịla deeji ẹ-ẹpwụ nya ụgbẹyị nya iJihova ọ-ba jẹ. Ụka ká iJochuwa ku ọmwakpa nya iMosisi nyọka kpa ala Isirẹlụ ụgbẹyị, ị “jwoo ihi lụka nya ọhịhị nyamwụ wuu.” (Joch. 4:14) Chajị nya ọọwa, iJihova wahị kụrwaa bwula ọ-kpaa ka ọpyị ọlẹ kọ myọnụ haa.—Joch. 21:43, 44.

8. Da abwọlẹ ká iJihova kpa angịnyị nyamwụ ụgbẹyị lụka nya ịdịrịhụ wụlẹ wẹẹ. (Yẹ ifoto ịnyịnyị.)

 ⁸ Ẹka lụmẹ-lụmẹ ị-ịlahị nya ọọwa, iJihova chụ angịleje ịlẹ kị kaa kpa angịnyị nyamwụ ụgbẹyị. Nyọlẹ kọ nọ chẹẹ, kọ pwụ ụka nya ịdịrịhụ, iJihova chụ alọmwụ ịlẹ kị ka kpẹhị rịrị angịnyị nyamwụ ịnyịnyị. Ịdịrịhụ ịlẹ kị họ kpẹẹkpẹẹ kaa ba ẹla ọmẹjẹ nya alọmwụ jẹ. Ọ-chụ pwokwita, Adịrahụ iDevidi kpa ịlọmwụ keji ye ọ-nwụ rịrị myị bwu ẹga nya ọlọmwụ ịNatan. (2 Sam. 12:7, 13; 1 Ego. 17:3, 4) Adịrahụ iJehochafatị kpụnịrọ ọlọmwụ ịJahasiyẹlụ nyọka kpọọ ụgbẹyị bala o-ju ala iJuda ọhụ nyọka “myị la ẹla ọlẹ ka ọlọmwụ [nya Ohe] ya.” (2 Ego. 20:14, 15, 20) Ụka ká Adịrahụ iHesekaya la akama, ọ kaa jahị da ka ẹga nya ọlọmwụ Ayịsaya nyọka dọọ ụbwọ. (Ayị. 37:1-6) Ụka myị́ ụka ká ịdịrịhụ á ba ẹla ọmẹjẹ nya iJihova jẹ, iJihova kaa wahị kụrwaa bala ọ-chewu ka ẹpwụma nyaa. (2 Ego. 20:29, 30; 32:22) Ọ chịla kọ ka la ọng myị́ ọng gede-gede nyori iJihova à wẹẹ kpa alọmwụ ịwẹ kpa angịnyị nyamwụ ụgbẹyị lẹ. Kpọkpọọkpọ, iru nya ịdịrịhụ ịwẹ bala ala Isirẹlụ ịkịla nyẹẹkpẹ da alọmwụ nya iJihova.—Jer. 35:12-15.

ABWỌLẸ KÁ IJIHOVA KPA ANGỊNYỊ NYA ỊKỊRAYỊSỊ ỊLA OYI ỌHỌHẸ ỤGBẸYỊ

9. Owo iJihova à tị́ kpa kpa angịnyị nya ịKịrayịsị ụgbẹyị la oyi ọhọhẹ? (Yẹ ifoto ịnyịnyị.)

⁹ Nyọlẹ ká iJisọsị wuleji bwula igu kpá, iJihova ya ọjịra-jịra nya Angịnyị nya ịKịrayịsị yeji. Ányị ọ tị́ kaa kpa Angịnyị nya ịKịrayịsị ụgbẹyị lụka ọwẹ? Ọ chụ iJisọsị nyọka ri olegbeju nya ọjịra-jịra. (Efe. 5:23) Ma iJisọsị á kaa ya ẹla bala ọngọjụgbẹyị ọnyị myị́ ọnyị kpụrụrụ nyọka họ ang ọlẹ kị baba nyọka họ ka. Ọ kaa kpa ịlahị bwula alẹrụ bala angịgbahị ịla iJerusalẹm. (Ụkụr. 15:1, 2) Ị chụ angịgbahị ịhyẹ ịnyịnyị nyọka kpẹhị rịrị ọjịra-jịra.—1 Tẹs. 5:12; Tay. 1:5.

10. (a) Ányị ụmụmẹ nya Angịnyị nya ịKịrayịsị ịwẹ à tị́ họ la ẹla ọlẹ kị mẹjaa? (Ụkụrwọ nya Alẹrụ 15:30, 31) (b) Ịyẹ tị́ du ká angịhyẹ lụka ọwẹ á myọnụ ju angịlẹ ká iJihova kpa kpaa ụgbẹyị ka? (Yẹ akpa ọlẹ kọ ri “ Ang Odudu Ká Angịhyẹ Pwa Angịlẹ kị Ku Ọmwakpa nya IJihova.”)

¹⁰ Angịnyị nya ịKịrayịsị ịlụka ọwẹ ye ụgbẹyị ọkpakpa nya angịwẹ myị? Ụmụmẹ nyaa kaa chị ọkẹkẹnị nyọka ba ẹla ọmẹjẹ nyaa jẹ. ỊBayịbụụ ya nyori “ị juwa chị ọkẹkẹnị ọtụka-ọtụka ju ẹla ọ-kpụ́ ẹjẹ ọlẹ” kị ya jaa. (Wa Ụkụrwọ nya Alẹrụ 15:30, 31.) Ma, ányị iJihova à tị́ wẹẹ kpa angịnyị nyamwụ ụgbẹyị lụka nyahị?

 ABWỌLẸ KÁ IJIHOVA WẸẸ KPAHỊ ỤGBẸYỊ ALẸ

11. Ya ọ-chụ pwokwita ọhẹ ọlẹ kọ mẹjẹ nya abwọlẹ ká iJihova kpa angịnyị nyamwụ ụgbẹyị la ẹka ịkpangjẹ wẹẹ.

¹¹ IJihova wẹẹ kpa angịnyị nyamwụ ụgbẹyị alẹ wẹẹ. Ọ kaa họ ịnyị bwugla Omyi Ẹla nyamwụ bala Ọnyị nyamwụ, kọ ri olegbeju nya ọjịra-jịra. Ang-ẹjẹẹ ji ahị ka jẹ́-ẹ yẹ nyori Ohe kaa kpa angịnyị ehe ịhyẹ họ ụkụrwọ kụ ọmwakpa nya ịlọmwụ alẹ? Ee. Ọ-chụ pwokwita, kụ ẹhị yẹ ẹla ọlẹ kọ họ ku ẹkpẹ nya 1870 wẹẹ. Charles Taze Russell bala alogu nyamwụ dọmwụ nyọka jẹ́ nyori ẹka nya 1914 ka ri ẹka ọkpọnchị ẹ-ẹpwụ nya ọ-họ jịra nya ọmwụ ọyẹyẹ nya Ịpyị-Adịrahụ nya Ohe ọ-ka yeji. (Dan. 4:25, 26) Ị kpụnịrọ ọmwụ ọyẹyẹ ịla ịBayịbụụ à du kị jẹ́ ẹlẹwẹ lẹ. IJihova kpaa ụgbẹyị ẹ-ẹpwụ nya ịBayịbụu ọjẹ́jẹ nyaa? Ọ la gede-gede nyori ọ họ ịnyị. Ang ọlẹ kọ họ odehe la ẹka nya 1914 mẹjẹ nyori Ịpyị-Adịrahụ nya Ohe dọmwụ nyọka kpeji ụka ọwẹ lẹ. Ẹwụ nya Odehe Wuu Ọhọhẹ dọmwụ, ene ká ẹdụrụ, ọpyị ọ-hụ jigi-jigi, bala ang oriri ọgamwụ tọọ da. (Luk. 21:10, 11) IJihova à kpa alẹng ị-la ọkịlẹtụ ọnyịịla ịwẹ da angịnyị nyamwụ ụbwọ wẹ ịlẹhị lẹ.

12-13. Ịyẹ angị kpa ịlahị à tị́ họ chajị kị ka jẹ́-ẹ kpa ẹrụ ọnyịịla pyẹ gụ́ ọọwa lụka nya Ẹwụ nya Odehe Wuu Oheeye?

¹² Kụ irya nya ang ọlẹ kọ họ lụka nya Ẹwụ nya Odehe Wuu Oheeye wẹẹ. Nyọlẹ ká aanahị ịlẹ kịị kpa ịlahị e-egbeju ẹpwa wụla ụpwụ nya Ọwụrụụ-wụrụ 17:8, ị wẹ ka yẹ nyori ẹwụ nya odehe ọwẹ nyị́ ka cheji ẹ-ẹwụ nya Amagẹdọn ka, ma okpunyi nyị ka ji pwụ ụbẹẹtụ ọhẹ kpụ ọ ka wụrụ iwe da ha ụkụrwọ nya ẹrụ ọnyịịla ọ-kpa pyẹ gụ́ ọọwa. Lẹ ogu nya iJihova ya ube-ụpwụ ọlẹ kọ ri Watchtower Bible College (School) of Gilead yeji nyọka mẹ ang jẹ́ angịlẹ kị ka ya ẹla nya Ohe ẹ-ẹpwụma nya odehe wuu, nanana nyọlẹ kọ lala o-ri nyị́ ka jẹ́-ẹ họ ụkụrwọ ụka ọwẹ ka. Ị ya angịlịnyị du ẹrụ lụka ọlẹ ká ẹwụ dọmwụ ji wẹẹ. Da ọọwa u-uhye, ọnchẹ ọ-jẹ́ ẹla nwụla ang ọmẹjẹ ọhẹ nọ kị wụrụ nyị Course in Theocratic Ministry b nyọka mẹ ang jẹ ọng myị́ ọng ẹ-ẹpwụ nya ọjịra-jịra chajị kị ka jẹ́-ẹ ya ẹla nya Ohe bala ọ-jẹ́ mẹ ang jẹ gụ́ ọọwa. Bwula agbẹyị ịwẹ, anchẹ nya Ohe wẹẹ nwụlanọ gbe ụkụrwọ nya ẹla Ohe oyaya ọlẹ kọ ka ji ị-ịlahị.

 ¹³ Kori kahị chẹhị kẹkpẹ, ahị ka yẹ gede-gede nyori iJihova kpa angịnyị nyamwụ ụgbẹyị lụka olujwo ọwẹ. Nyọlẹ ká Ẹwụ nya Odehe Wuu Oheeye myị́ kpá, anchẹ nya iJihova ịla ẹpwụma lụmẹ-lụmẹ jẹ́ ye okpunyi bala ịlaa ọlala pwụ ẹgẹhẹ ẹ-ẹpwụ nya ụkụrwọ nya ẹrụ ọnyịịla ọ-kpa pyẹ lẹ. Ụkụrwọ ọwẹ dọmwụ pyẹ pyọọ kpụ ụmụmẹ nya angịnyị wẹ ka jẹ́ iJihova lẹ.

14. Ịyẹ tị́ du kahị ká jẹ́-ẹ dahịhile ẹla ọlẹ ká ogu nya iJihova bala angịgbahị nya ọjịra-jịra kaa mẹjẹ? (Ọwụrụụ-wụrụ 2:1) (Yẹ ifoto ịnyịnyị.)

¹⁴ Alẹ angịlẹ kị ji ẹpwụ nya Angị Kpẹhị Rịrị Ogu kaa ya ẹhị rịrị ka ẹga nya ịKịrayịsị nyọka kpaa ụgbẹyị. Ị kaa tịtọ ká ẹla ọlẹ kị mẹjẹ aanahị ka pwoku ụgbẹyị ọlẹ ká iJihova bala iJisọsị kaa yẹ ẹla. Ị tị kaa kpa angị kpẹhị rịrị isekut bala angịgbahị nya ọjịra-jịra mẹ ang jẹ aanahị ịnyịnyị. c Angịgbahị nya ọjịra-jịra ịlẹ ká Ohe ya ida wụ ju ụbwọ “u-upwuriri” nya ịKịrayịsị. (Wa Ọwụrụụ-wụrụ 2:1.) Ẹlịlẹhị ri, angịgbahị ịwẹ á la kpẹẹkẹẹ ka, ị kaa họ pyị. IMosisi bala iJochuwa họ pyị ụka ọhẹ, ịnyịnyị ọ tị la ẹ-ẹga nya alẹrụ lẹ. (Ọwa. 20:12; Joch. 9:14, 15; Rom. 3:23) Ma ahị ka yẹ nyori iJisọsị wẹẹ kpa ọnchẹ ọ-jẹ́ ẹla bala angịgbahị ịlẹ kọ chụ ụgbẹyị, ọ tị ka kịnyaa la ọ-họ ịnyị “gbee pwụ ọbaba nya odehe ọlẹ.” (Mat. 28:20) Lẹ ahị ka jẹ́-ẹ dahịhile ụgbẹyị ọkpakpa nya angịlẹ kọ chụ nyọka kpa ịlahị.

AHỊ KAA YE APYOBWUNA KORI KAHỊ KỊNYAA LA Ọ-BA ỤGBẸYỊ NYA IJIHOVA JẸ

15-16. Ẹlịyẹ a tị́ jẹ́ bwu oja nya angịlẹ kị kpa ẹla ọmẹjẹ nya iJihova họ ụkụrwọ?

¹⁵ Kori kahị kịnyaa la ọ-ba ang ọmẹjẹ nya iJihova jẹ, ahị dọmwụ ka ye apyobwuna lẹẹlẹẹ. Ọ-chụ pwokwita, Andy bala Robyn myị nyọka họ jaabwọ kị jwaa ọhụ nyọka hu ọhịhị nyaa hukee. (Ala iHiburu 13:5.) Ọọwa dudu kị jẹ́ la ụka da ụbwọ ẹ-ẹpwụ nya Ebe nya Ịpyị-Adịrahụ bala ịkịla ọnwụnwụ. Robyn yẹkẹẹ: “Ụka ọhẹ ahị kaa kụ ẹpwa ọlẹ kọ ri ochiche yẹẹyẹẹ la ọ-dọmwụ kaa ye ẹga ọ-kpụ ang ka. M̀ dọmwụ go ang ị-kpa hwo ifoto nyam lụmẹ-lụmẹ ra, nanana nyori ifoto ohwohwo kaa hám yẹẹyẹẹ. M̀ nya egbejida nyọlẹ kam gyaa ra. Ma lala iSera ahụ nya Ebiraham, m̀ cheje nyọka ya ẹhị rịrị kịlahị, ọkọkọ nyọka chẹhị kẹkpẹ.” (Hib. 11:15) Ẹlịyẹ ahụ bala ọrụ ọwẹ à tị́ jẹ́ bwu oja nyaa? Robyn yẹkẹẹ: “Ahị chị ọkẹkẹnị nyọka jẹ́ nyori iJihova ahị wẹe ya ang myị́ ọlẹ kahị la ha lẹ. Ụka ká am bala ọrụm á ja họ ụkụrwọ ọlẹ ká iJihova ya hahị, ahị jẹ́-ẹ nịra ẹhị kaka yẹ abwọlẹ ká ọhịhị ka la  odehe onyeewe.” Andy myị jwọọ ịnyịnyị yẹkẹẹ: “Ahị chị ọkẹkẹnị nyọlẹ kahị jẹ́ kpa ụka bala ọngịrị nyahị wuu họ ụkụrwọ ha iJihova.”

¹⁶ Ụgbẹyị ọkịla oyina ahị tị́ kaa ye apyobwuna kori kahị dịrẹ ụgbẹyị ọlẹ ká iJihova mẹjẹ́ẹhị? Ụka ká Marcia họ kpá bwu ube-ụpwụ ọla ịlahị, ọ nwụlanọ nyọka ye ịlahị nya ụgbẹyị jaabwọ kị jwọọ irya. (Mat. 6:33; Rom. 12:11) Ọ yẹkẹẹ: “Ụpwụ yem nyọka ka ube-ụpwụ ọgbẹgbịlẹ ẹ-ẹpwụ nya ẹka ine la ọ-ka nwụ uri ka. Ma m̀ tị tịtọ nyọka họ ụkụrwọ ha iJihova gụ́ ọọwa. Lẹ m̀ chụ nyọka ka ube-ụpwụ ọlẹ kị ka mẹ ụkụrwọ nya ịbang jẹm chajị kọ ka jẹ́-ẹ dam ụbwọ ẹ-ẹpwụ nya ịlahị nya ụgbẹyị oyeye. Ọwẹ ri ọhẹ ẹ-ẹpwụ nya eje ịkpọnchị ịlẹ kam chị kọ tị há yẹẹyẹẹ. M̀ jẹ́-ẹ ye ịlahị nya ụgbẹyị kpụrụrụ lẹẹlẹẹ, ụkụrwọ ọlẹ kam tị kaa chịchị họ du kam jẹ́-ẹ ye ụka da ụbwọ ị-ịBẹtẹlụ bala ọ-họ akụrwọ ịkịla lụmẹ-lụmẹ ha iJihova ịnyịnyị.”

17. Ahị ọwawa iyina ahị tị́ kaa ye kori kahị kpa ẹla ọmẹjẹ nya iJihova họ ụkụrwọ? (Ayịsaya 48:17, 18)

¹⁷ Ụka ọhẹ, ẹla ọlẹ ká ogu nya iJihova kaa mẹjẹẹhị kaa chewu keehi. Ọ-chụ pwokwita, ị dahị ọna u-uhye nya okpoko ọ-há ọngịnyị kpoye bala ọ-ka họ ang ọlẹ kọ ka kpahị kaka bịrị ehile nya iJihova. Ahị kaa ye ahị ọwawa ịnyịnyị kori kahị dịrẹ ụgbẹyị nya iJihova u-uhye nya ẹla ịlịịwẹ. Ahị kaa yẹ abwọ hi akama lụmẹ-lụmẹ, ọkịlẹtụ á tị kaa lahị eje ka ịnyịnyị. (1 Tim. 6:9, 10) Ọọwa ka dudu kahị ka jẹ́-ẹ hụ ụkụrwọ ha iJihova yẹẹyẹẹ, ahị tị ka ye ọkẹkẹnị bala okpunyi ịnyịnyị.—Wa Ayịsaya 48:17, 18.

18. Ịyẹ tị́ du ká cheje nyọka kịnyaa la ọ-dịrẹ ụgbẹyị nya iJihova?

¹⁸ Ịwẹẹ ọdada á juwa ka, iJihova ka kịnyaa la ọ-kpa angịnyị ehe kpahị ụgbẹyị lụka nya akama ọtụka okpelego gbee ka ju ka ụka nya Eji Ọkpakpa ọla Ẹka Ụnọ. (Eje. 45:16) Ahị ka kịnyaa la ọ-ba ẹla ọmẹjẹ nyaa jẹ tụ́ ụka ká ẹla ọla irya nyahị á datị? Ọ ka chịhịkpẹẹ la ọ-ka họ ịnyị kori kahị kaa ju ihi nya ẹla ọmẹjẹ ọlẹ ká iJihova wẹẹ kpa kpahị ụgbẹyị lẹẹlẹẹ. Lẹ, ahị kịnyaa la ọ-ba ẹla ọmẹjẹ nya iJihova jẹ ụka wuu, tụ́ ịlẹ kọ kaa ya hahị bwu ẹga nya angịlẹ kọ chụ nyọka kpẹhị rịrịịhị mẹ. (Ayị. 32:1, 2; Hib. 13:17) Jaabwọ kahị tị wẹẹ họ ịnyị, ahị ka jẹ́-ẹ dahịhile iJihova, Ọngọ kpahị ụgbẹyị du kahị jẹ́-ẹ cheji ba ang ịlẹ kị ka bịrị igu oriri nyahị balọọ, jaabwọ kahị wẹẹ jahị da ka ọhịhị ọmyịmyị-ka ọla odehe onyeewe.