Ye Ọkẹkẹnị Ụka Ká Ja Godayị La Ugbodu Ojuju Gbe IJihova
À KAA ya ẹhị rịrị gbe ụka ọlẹ ká iJihova ka ta ang ịtịpyọ wuu ayịreji kọ ka họ ang myị́ ang wuu inyeewe? (Ọwụ. 21:1-5) Ịwẹẹ ọdada á juwa ka! Ma, ọ́ tị kaa chịkpẹẹ lụmẹ ụka wuu nyọka godayị gbe iJihova la ugbodu ojuju ka, ọgụgụ ri ụka kahị ji ẹpwụ nya akama. Ọkịlẹtụ kaa chịhị pyepyẹ kori ká ẹhị ọrịrịị-rịrị nyahị á ja da giri-giri.—Etu 13:12.
Kpọkpọọkpọ, iJihova ya ahị guru kahị ka godayị la ugbodu ojuju gbe ụka ọlẹ kọ hu nọ nyọka họ ẹla. Ịyẹ tị́ du kọ ya ahị guru kahị ka họ ịnyị? Ịyẹ à tị́ ka dahị ụbwọ nyọka chị ọkẹkẹnị jaabwọ kahị wẹẹ godayị?
ỊYẸ TỊ́ DU KÁ IJIHOVA YA AHỊ GURU KAHỊ KA GODAYỊ?
ỊBayịbụụ yẹkẹẹ: “[IJihova] wẹẹ godayị nyọka mẹ ọháha nyamwụ jẹẹnụ bala ọ-ka yẹnụ ahyẹẹrwẹrwa. [IJihova] ri Ohe Oluhye ọ-họ ẹla ọkpakpa. Ịnya angịlẹ kị dahịhiloo há haa lẹ.” (Ayị. 30:18) Ala iJuu ịlẹ kị la egbeju ọngịrị ị da omyi ẹla ịwẹ du ta kpangga lẹ. (Ayị. 30:1) Ma angịhyẹ ịlẹ kị họ kpẹẹkpẹẹ ji ẹpwụ nya ala iJuu ịwẹ, ẹlẹwẹ tị ya ẹhị ọrịrịị-ịrị haa ịnyịnyị. Omyi ẹla ịwa-ịwa ya ẹhị ọrịrịị-rịrị ha anchẹ nya iJihova ịlẹ kị họ kpẹẹkpẹẹ alẹ ịnyịnyị.
Lẹ ahị ka dayị la ugbodu ojuju pyii chajị iJihova wẹẹ dayị la ugbodu ojuju ịnyịnyị. Ọ hu ụka ọlẹ kọ ka ta odehe ọlẹ ayịreji nọ lẹ, ọ tị wẹẹ godayị gbe ahyẹẹnụ bala awa ọọwa ọ-ka pweeji. (Mat. 24:36) Ọ ka la gede-gede ụka ọọwa nyori ẹla ọlẹ ká Olegu Onyobyi chị ba Ohe bala anchẹ Nyamwụ ri ọnọọkịla. Ọọwa ọ ka ta Olegu Onyobyi bala ọngọngọhẹ ọlẹ kọ chẹkpẹ jwoo ayịreji lẹlẹ, ma ọ tị ka ‘yẹhị ahyẹẹrwẹrwa.’
Ọlẹ gbee ka da ụka ọọwa, iJihova á ka tụ akama nyahị kịnyaa ka myị́, ma ọ tị ya ahị ọdahile hahị nyori ahị ka jẹ́-ẹ chị ọkẹkẹnị jaabwọ kahị wẹẹ godayị. Jaabwọ ká Ayịsaya ya, ahị ka jẹ́-ẹ chị ọkẹkẹnị jaabwọ kahị wẹẹ ya ẹhị rịrị gbe ang ọnyịịla ọ-ka họ. (Ayị. 30:18) a Ányị ahị tị́ ka bwu ye ọkẹkẹnị ọọwa? Ang ine ka dahị ụbwọ.
ABWỌLẸ KAHỊ KA BWU YE ỌKẸKẸNỊ ỤKA KAHỊ JA GODAYỊ
Ya ẹhị rịrị a-ang ọnyịịla ọlẹ kọ wẹẹ họ ọ-ọhịhị nyang. Adịrahụ iDevidi ya ẹhị yẹ ang ọtịpyọ lụmẹ-lụmẹ ẹ-ẹpwụ nya ọhịhị nyamwụ. (Eje. 37:35) Kpọkpọọkpọ, ọ da ụpwụ yẹkẹẹ: “Godayị kpọọ ẹ-ẹga nya [iJihova,] ká dayị pịlẹẹẹ họọ. Ā kụ limahị ọọ-lajị nya angị inyibyi ịwẹ kị wẹẹ há pwụụpwụụ koo.” (Eje. 37:7) IDevidi la ịlọmwụ kpa ẹla ọmẹjẹ ọwẹ họ ụkụrwọ bwula ọ-ya ẹhị rịrị u-uhye nya ọchịda ọlẹ ká Ohe chọọ eye. Ang ịnyịịla ịlẹ wuu ká iJihova họ họọ tị kaa myọọ lẹhị ịnyịnyị. (Eje. 40:5) Kori kahị ya ẹhị rịrị u-uhye nya ang ịnyịịla ịlẹ kị wẹẹ họ ọ-ọhịhị nyahị ọkọkọ nya ịtịpyọ, ọ ka chịhị kpẹẹ la ọ-ka godayị gbe iJihova.
Kpa iwe ọnyị myị́ ọnyị gu ogbo ha iJihova. Ọngọ da Eje Ọnyịịla 71, kọ ka ri iDevidi myị́, ya ẹla rụ iJihova yẹkẹẹ: “M̀ ka [kịnyaa la ọ-godayị gbeng,] m̀ ka juwa gwogbo hang gụ ọọwa-ọọwa.” (Eje. 71:14) Ányị ọ tị́ ka bwu gwogbo ha iJihova? Ọ ka ya ẹla nya iJihova je angịkịla bala o-mwu eje gwogbo họọ myị́. (Eje. 71:16, 23) Lala iDevidi, ahị ka jẹ́-ẹ ye ọkẹkẹnị jaabwọ kahị wẹẹ godayị gbe iJihova. Ahị kaa gwogbo họọ ụka kahị kpa ẹrụ ọnyịịla pyẹ, ya ẹla nyamwụ je alugbiyegu bala aligu nyahị, bala o-mwu eje nyahị. Ụka ọkịla ká ja mwu eje nyahị, à ka maga nyọka ke ụrụ wo etu nya omyi ẹla ịlụwa bala abwọlẹ kị ka ya ọkẹkẹnị hang myị́?
Myị ká aanang ịla ọjịra-jira a jung ọhụ. Ụka ká iDevidi la akama, o byi iJihova yẹkẹẹ: “M̀ ka yang dodehe ẹ-ẹga nya angịnyị nyang.” (Eje. 52:9) Ahị ịnyịnyị ka jẹ́-ẹ ye ọhụ ojuju bwu ẹga nya aanahị alẹng bala anyang ụka nya ọjịra-jịra bala ẹrụ ọnyịịla ọ-kpa pyẹ, tụ́ ụka kahị tụ guru nya ịpyọ ọkpụkpụ.—Rom. 1:11, 12.
Ju ẹhị ọrịrịị-rịrị nyang ọngịrị. Eje Ọnyịịla 62:5 yẹkẹẹ: “M̀ godayị lọhụ ọdapịlẹẹ gbe Ohe Oluhye, Ọwa ụbwọọmwụ m̄ dahịhile lẹ.” Ọ baba ká ẹhị ọrịrịị-rịrị nyahị ka la ọngịrị, ọgụgụụgụ kori ká ocheju nya odehe á wẹ hyaa lụka ọlẹ kahị me irya ka. Ahị jẹ́ myị̀myị̀ nyori eye ọchịchị nya iJihova ka họ jịra pyii, jaabwọ myị́ abwọ kahị ka dayị gbaa tata ka ba. Ahị ka jẹ́-ẹ ju ẹhị ọrịrịị-rịrị nyahị ọngịrị bwula Omyi ẹla nya Ohe ọjẹ́jẹ. Ọ-chụ pwokwita, kụ irya u-uhye nya ọ-họ jịra nya ọmwụ ọyẹyẹ ịlụwa, abwọlẹ ká ẹla ịla ụpa ọhẹ myị ju ọkịla, bala ẹla ịlẹ ká iJihova chị ehe mẹjẹẹhị u-uhye nya ịlọmwụ. (Eje. 1:2, 3) Ịnyịnyị, ahị baba nyọka kịnyaa juwa “kpa ọngịrị nya Olegu Ịgọgọ raabwọ” nyọka kpa igu o-riri nyahị balọọ kpọọ jaabwọ kahị wẹẹ godayị gbe eye ọchịchị nya ọhịhị ọmyịmyị-ka ọ-ka họ jịra.—Jud. 20, 21.
Lala Adịrahụ iDevidi, jẹ́ myị̀myị̀ nyori iJihova kaa kpa ẹhị rịrị angịlẹ kị wẹẹ godayị gboo bala ọ-kaa mẹ ọháha o-gbu enyi ka Nyamwụ jẹ ẹ-ẹga nyaa. (Eje. 33:18, 22) Kịnyaa la o-godayị la ugbodu ojuju gbe iJihova bwula ọ-ya ẹhị rịrị u-uhye nya ang ịnyịịla ịla ọhịhị nyang, bwula o-gwogbo họọ, bwula o-ye ọhụ ojuju bwu ẹga nya aanahị ịla ọjịra-jịra, bala o-ju ẹhị ọrịrịị-rịrị nyang ọngịrị mẹ.
a Etu nya omyi ẹla ọlẹ kị yẹda kaka ri “dadhịhilọọ” ọ-ọgba ọwẹ ka jẹ́-ẹ ri abwọlẹ kị kaa “charịnya lee ọ-ya ẹhị rịrị gbe ẹlẹhẹ ọ-ka họ,” mẹjẹ nyori ọ́ tịpyọ nyọka charịnya nya ọchịda ọlẹ ká iJihova ka kpa wahị ka.
