1-2. Akama iyina anchẹ nya iJihova a tị́ ka la myị́?

 ANG ọtịpyọ ọ-họ tahị ka yẹ ọhịhị nyahị da ẹpwụ nya ẹhị ọ-mwụ biri myị́. Ọ-chụ pwokwita, ọọnahị ọlẹng ọhẹ ká ẹnyị nyamwụ ri Luis a wẹ ka jẹ́ nyori ọwa nyị la ebe ogoja ọlẹ kọọ jụ angịnyị hyaa-hyaa ka. Ọngọ họ utoji byoo nyori ọya ịmanyị-manyị nyị à hi họọ kọ ka hihi lẹlẹ. Monika bala ọrụmwụ kaa kpa ụka nya gbịgba ha iJihova lawụlẹ. Ẹnẹhẹ, Monika wẹ ka jẹ́ nyori ọrụmwụ, kọ ri ọngọgbahị nya ọjịra-jịra, kaa họ ọhọbịrị kpịbaa-kpịbaa ẹ-ẹpwụ nya ẹka lụmẹ-lụmẹ lẹ. Olivia, ọọnahị ọnyang ọhẹ ọlẹ kọ rwọru lẹka, baba nyọka rụnyẹ rụ hi ẹpwa nyamwụ chajị nya igbachiwụ ọ-ta ang ayịreji ọlẹ kọ wẹẹ jẹ warị. Ụka kọ nya tịrẹkpẹ, ọ yẹ nyori ọhu ọwẹ bịrị ẹpwa nyamwụ wuu lẹ. Lụka ọ-kpahị ju ka, ọhịhị nya angịwẹ wuu yẹda. À chịpwụrụ bwu ẹpwụ nya iwe-ahụrụ ọ-ya ahị me ka ọhẹ ọlẹ kọ yẹ odehe nyang ahị kụrụ eji ẹnẹhẹ lẹ?

² Nanana nyori ahị ri anchẹ nya iJihova ịkpẹẹkpẹẹ, ahị kaa yẹ akama bala ọ-ju ẹdụrụ jaabwọ kọọ la ẹ-ẹga nya angịkịla ịnyịnyị. Ahị tị ka myịmyị-ị̀ baba nyọka bọhụ ẹ-ẹpwụ nya ẹtẹ ọbaba lee ịtụ pyịpyị o-bwu ẹga nya angịlẹ ká angịnyị nya Ohe wụ ẹjẹ. Ịlẹhị lẹ iJihova á kaa wu akama ịwẹ kpa la ọ-ka wẹ ẹga nyahị ka, ma ọ chehe nyọka dahị ụbwọ ẹ-ẹpwụ nyaa. (Ayị. 41:10) Bwula ụbwọ ọdada nyamwụ, ahị ka jẹ́-ẹ kịnyaa la ọ-chị ọkẹkẹnị, cheje ịnyịịla, bala ogodayị giri-giri họọ nanana nyori ahị wẹẹ chịpwụrụ bwu ẹpwụ nya akama ịlẹ kị lujwo kpoye-kpoye. Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya agbẹyị ine ịlẹ ká iJihova kaa dahị ụbwọ ụka ká ang olujwo á họ  tahị. Ahị ka myị́myị́-ị̀ ya ẹla u-uhye nya ang ọlẹ kahị baba nyọka họ chajị kahị ka ye apyobwuna bwu ẹpwụ nya ụbwọ ọdada ọọwa.

IJIHOVA KA KPA ẸHỊ RỊRỊNG

3. Ụka kahị ja chịpwụrụ bwu ẹpwụ nya akama, ịyẹ à tị́ ka jụhị a-abwọ la ọhọhọ myị́?

³ Ang odu ko lujwo. Ụka ká ang ọtịpyọ á họ tahị, ọ ka jụụhị abwọ la ọ-ka kụ irya nya ẹla rige-rige ụ-ụgbẹyị ọlẹ kahị ka jẹ́-ẹ cheje nya ẹla kpakpa myị́. Ịyẹ tị́ du? Chajị nyori ọkịlẹtụ nyahị myị̀ la ajụjụ bala uko ọchịchị. Ọ ka lahị lala ahị nyị ja kpa ata ma ẹ-ẹpwụ nya ukpowu, la ọ-jẹ́ ẹga kahị wẹẹ ka datị ka. Wo jaabwọ kọ la aanahị anyang imiiye ịlẹ kahị ya ẹla nyaa ene lẹẹ ụka kị ji ẹpwụ nya ịmayẹ wẹẹ. Olivia yẹkẹẹ: “Nyọlẹ ká igbachịwụ ọọwa ta ẹpwa nyam ayịreji, ọkịlẹtụ kpụm enyi, ḿ jẹ́ ala ẹga kam ri ka.” Monika ya ẹla nya ọpịrịju nya ọrụmwụ yẹkẹẹ: “Ẹlẹwẹ jụm kaka kpoye. Ọ lam lala o-ri ọngọhẹ nyị gum ẹma ọ-ọkịlẹtụ. Ọ kaa lujwo ham nyọka họ ụkụrwọ ọla ahyẹẹnụ ọnyị myị́ ọnyị. Ẹla ọlẹ ká ọngịnyị ya kam ka myị ka, à họ tam wẹ lẹ.” Ányị iJihova à tị́ myọnụ nyọka dahị ụbwọ ụka ká ọkịlẹtụ á kpụhị enyi?

4. Jaabwọ ká ụpwụ nya iFilipayị 4:6, 7 ya, ịyẹ iJihova à tị́ cheye nyọka họ hahị?

⁴ Ang ọlẹ ká iJihova kaa họ. Ọ chihi eye nyọka ya ang ọlẹ ká ịBayịbụụ wụrụ “okpunyi nya Ohe” hahị. (Wa Ala iFilipayị 4:6, 7.) Okpunyi ọwẹ ri ọkịlẹtụ ọ-pwọhị kpuru ọọlajị nya igu ọlam-ọlam ọlẹ kahị ri balọọ. Okpunyi ọwẹ “kpoye nya ọ-jẹ́ myịmyị nya angịnyị ehe wuu”; ọ la ẹbyẹbyị kpoye nyọka jẹ́-ẹ jẹ́ jaabwọ kọ kaa bwu lịnyị. À ye okpunyi nya ọkilẹtu ụ-ụgbẹyị ọla ẹbyẹbyị nyọlẹ ká raabwọ yẹẹyẹẹ ha iJihova u-uhye nya ẹla ẹnẹhẹ lẹ? Abwọlẹ kọ lang wẹ à ri “okpunyi nya Ohe” lẹlẹ.

5. Ányị okpunyi nya Ohe à tị́ kaa kpẹhị rịrị irya bala ọkịlẹtụ nyahị?

⁵ Ọgba ọwẹ-ọwẹ ya nyori okpunyi nya Ohe nyị ka “wu,” lee ọ-chewu ke “ọkịlẹtụ nyanụ bala irya ọlẹpwụ nyanụ wuu.” Omyi ẹla ọlẹ kị yẹda kaka ri ‘wu kpa’ wẹ ri omyi ẹla nya alisoja ọlẹ kọ chabwọ nya abwọlẹ kị kaa kpẹhị rịrị epweji du kọ kaa la ewu ọ-chịke bwu ẹga nya aluji ịlẹ kị ka gba mịlọọ. Angịnyị ịlẹpwụ nya epwji ọlẹ kị ja kpẹhị rịrị kaa nune la okpunyi, chajị ị jẹ́ nyori alisoja nyị juwa chewu kaa. Ụ-ụgbẹyị ọlịnyịnyị, ụka ká okpunyi nya Ohe á kpẹhị rịrị irya bala ọkịlẹtụ nyahị, ọhụ kaa pwọọhị kpuru, chajị ahị jẹ́ nyori ahị la ewu ọ-chike. (Eje. 4:8) Jaabwọ kọ la ẹ-ẹga nya ịHana, kori ká iwe-ahụrụ nyahị á dọmwụ yẹda i-ijata ka wẹwẹ, ahị ka jẹ́-ẹ la okpunyi. (1 Sam. 1:16-18) Ụka ká ọkịlẹtụ nyahị á tị weji, ahị jẹ́-ẹ kụ irya nya ẹla rige-rige bala ọ-cheje nya ẹla ụ-ụgbẹyị ọnyịịla gụ́.

6. Ịyẹ ahị tị́ ka họ chajị kahị ka ye apyobwuna bwu okpunyi nya Ohe? (Yẹ ifoto ịnyịnyị)

⁶ Ang ọlẹ kahị baba nyọka họ. Ụka ká la  akama lẹ, be ẹkọ wụrụ iJihova ọngọ kaa gbehi mẹ. Ányị ahị tị́ ka bwu họ ịnyị? Raabwọ gbee ká ka la okpunyi nya Ohe. (Luk. 11:9; 1 Tẹs. 5:17) Luis, ọngọlẹ kahị ya ẹla nyamwụ lalẹ ene, ya jaabwọ ká ọwa bala Ana ahụ nyamwụ jẹ́ bọhụ ụka kị jẹ́ nyori ọya ịmanyị-manyị à hi họọ kọ ka hịhị lẹlẹ. Ọ yẹkẹẹ: “Ụka ọlịịwẹ, ọ kaa lujwo nya ịlẹhị-ịlẹhị nyọka jẹ́-ẹ cheje nya ẹla u-uhye nya utoji ọlẹ kị ka họng bala ẹla ịkịla. Ma abwọ ọrịrị du kahị jẹ́ la okpunyi ẹ-ẹpwụ nya iwe-ahụrụ ọwẹ wuu.” Luis bala ahụ nyamwụ ya nyori ịwa nyị raabwọ nya ịlẹhị-lẹhị mwụba-mwụba, bịlẹ iJihova nyọka ya okpunyi nya ọkịlẹtụ, ọhụ ọbeji, bala ẹla ọjẹ́jẹ ọ-kpa cheje ọnyịịla ha ịwa. Ị tị yẹ nyori ọ daa ụbwọ ịlẹhị. Kori ká juwa ẹ-ẹpwụ nya ụka olujwo lẹẹlẹẹ, maga ká raabwọ yẹẹyẹẹ, à ka yẹ jaabwọ ká okpunyi nya iJihova ka chewu ke irya bala ọkịlẹtụ nyang.—Rom. 12:12.

IJIHOVA KA HỌ A KA LA GIRI-GIRI

7. Ányị ọ tị́ kaa lahị ụka kahị ja chịpwụrụ bwụ ẹpwụ nya akama?

⁷ Ang odu ko lujwo. Ụka kahị ja chịpwụrụ bwu ẹpwụ nya ịmayẹ ilujwo, áhị jẹ́-ẹ kụ irya bala ọ-họ ẹla jaabwọ kahị kaa họ ene-ene ka. Ọ kaa lahị jaabwọ ka agbụ nya enyi kaa kpa ụmwụ nya enyi kele-warị, chajị áhị jẹ́-ẹ ya irya nọ ẹ-ẹga ookpokpo ka. Ana, ọngọlẹ kahị ya ẹla nyamwụ lalẹ ene ya nyori irya ịdatị-datị nyị kaa wẹ ẹpwụ nya ọwa ụka ká Luis gbu kpá. Ọ yẹkẹẹ: “Ụka ọhẹ ọkịlẹtụ kaa kpụm enyi gbee kam ka dọmwụ nya ọ-la ịlọm ahyẹẹrwẹrwa. M̀ kaa ju agbama ịnyịnyị nyọlẹ kọ juwa kaka.” Ụka ọkịla, Ana kaa la ịlọmwụ ụbwọọmwụ bala ọ-kaa ju agbama nyọlẹ ká ọwa à wẹẹ ka cheje nya ẹla ịlẹ ká Luis ọrụmwụ à kaa chị ene-ene lẹ. Ọ kaa lọọ ụka ọhẹ lala o-ri nyị juwa ẹ-ẹpwụ nya ihu ọlẹ ká igbachịwụ juwa gu agbụ. Ányị iJihova à tị́ kaa dahị ụbwọ ụka ká imahị nya ẹla á ja yẹ rịrịịhị?

8. Jaabwọ ká Ayịsaya 33:6 ya, ahị ọdahile oyina iJihova à tị́ ya hahị?

⁸ Ang ọlẹ ká iJihova kaa họ. Ọ ya ahị ọdahile hahị nyori ọ ka họ kahị ka la kpọng-kpọng. (Wa Ayịsaya 33:6.) Ụka ká ụmwụ nya enyị á jẹ ta igbachịwụ ẹ-ẹpwụ nya ihu, ọ ka dọmwụ nyọka gu gbaa-gbaa ka ịkịka ọhẹ bala ọkịla ụ-ụgbeyị ọ-la uhi-uhi myị́. Nyọka jẹ́-ẹ dayị kpọọ, iru nya ụmwụ ịhyẹ kaa la ịngịhyẹ ọlẹ kị kaa ya kwọọ ịkịka oyiye-oyiye juka ẹpwụ nya enyi nyọka woo kpa. Ang ịịwa kaa wu ụmwụ kpa kpọọ la ọ-ka gu gbaa-gbaa kpoye ka, du ká angịlẹ kị ji ẹpwụ nya ụmwụ ọọwa á kaa chuko kpoye ka, ká ẹdịyẹ nyaa tị kaa kpịpyọ ịnyịnyị. Ma, ụka ká ụmwụ á ja jẹ kịlahị, ang ịlẹ kị ya kwọọ wẹ à jẹ́-ẹ da ụbwọ lẹ. Ụ-ụgbẹyị ọlịnyịnyị, iJihova ka wụhị kpa kpọọ jaabwọ kahị wẹẹ jẹ ka ịlahị ẹ-ẹpwụ nya ọmyịmyị lụka nya akama.

9. Ányị ang-abwọ ị-kpa mwahị nya ẹla nyahị à tị́ ka jẹ́-ẹ dahị ụbwọ nyọka jẹ́-ẹ godayị kpọọ? (Yẹ ifoto ịnyịnyị)

 ⁹ Ang ọlẹ kahị baba nyọka họ. Ụka ká ẹla á kịlang-kịla o-olegu, maga ká kịnyaa la ọ-raabwọ, ka ọjịra-jịra bala, ẹrụ ọnyịịla ọ-kpa pyẹ. Ịlẹhị lẹ, á ka jẹ́-ẹ họ jaabwọ ká kaa họ ene ka myị́, ma kpịtịya nyori iJihova á ya ehi guru kahị ka họ kpoye nya ọngịrị nyahị ka. (Kụ ẹhị yẹ iLuku 21:1-4 ịnyịnyị.) Ịnyịnyị, maga ká hu ụka nọ nya ang ọjẹ́jẹ nya ịlọng bala ọ-kụ irya jwoo. Ịyẹ tị́ du? Chajị iJihova ya apwụ bala ifim ịlẹ kị ka dahị ụbwọ godayị kpọọ hahị bwula ogu nyamwụ. Nyọka jẹ́-ẹ yẹ ang ọlẹ ká baba, à ka mwahị; nya ẹla la ang-abwọ ọlẹ kọ ji la òja nyang myị́, lala JW Library^® app, Watch Tower Publications Index, bala Research Guide for Jehovah’s Witnesses. Monika ọngọlẹ kahị ya ẹla nyamwụ lalẹ ene, ya nyori ọwa nyị kaa mwahị nya ẹla la ang abwọ ịwẹ ụka ká ọwa nyị́ yẹ ká ọjụjụ ọla ọkịlẹtụ nya ọwa nyị́ ja la ọngịrị gụ́ olene. Ọ-chụ pwokwita, ọ mwahị nya omyi ẹla ọlẹ kọ ri “anger.” Ụka ọkịla, ọ kaa mwahị nya omyi ẹla ọlẹ kọ ri “betrayal” lee “loyalty.” Ọọwa lẹ ọ kaa wa ụpwụ u-uhye nyamwụ gbee kọ la ịlọmwụ lẹlẹ. Ọ yẹkẹẹ: “Ụka kam ja dọmwụ nya ang ọjẹ́jẹ ọlịịwẹ, ḿ kaa họọ kpẹnẹẹ ka. Ma jaabwọ kam wẹẹ wa ụpwụ u-uhye nya ẹla ọọwa gụ́ olene, ọ kaa lam lala o-ri iJihova nyị wẹẹ wum bajẹ ọtụka-ọtụka. Jaabwọ kam ja wa ụpwụ, m̀ wẹ ka yẹ nyori iJihova jẹ́ irya ịlẹ kị ji ẹpwụ nyam wuu, bala o-ri ọ wẹẹ dam ụbwọ.” Ụbwọ ọdada o-bwu ẹga nya iJihova ọlịịwẹ ka nyọka jẹ́-ẹ wu ịlọng kpa kpọọ ká irya ị-ịwa ka kpụ ba.—Eje. 119:143, 144.

IJIHOVA KA DANG ỤBWỌ

10. Ányị ọ tị ka lahị myị́ ụka ká ang ọjụjụ kpoye-kpoye á họ tahị?

¹⁰ Ang odu ko lujwo. Ụka ká ang ojuju kpoye-kpoye á họ tahị, ahyẹẹnụ ịhyẹ ka juwa ká ịnyịrọ ka chịhị pyẹpyẹ lee ká ọkịlẹtụ ka kpụhị enyi myị́. Ahị ka me ịlọhị lala ọngịnyị ọlẹ kọọ jụ ụnyẹ rụ ene, ma ká ang họọ lẹẹlẹẹ du kọ kaa jẹdịyẹ kpụngẹẹ-kpụngẹẹ. Ang ịlẹ kị kaa chịhị kpẹẹ la ọhọhọ ene-ene ka lujwo hahị lẹẹlẹẹ myị́, lee áhị ka la irya nyọka họ ang ịlẹ kị kaa kpụhị ịpyọ ene-ene kaka myị́. Lala Ịlayịja, ọ ka lahị myị́ lala o-ri nyị lujwo kpoye nyọka wuleji. Ọ ka háahị nyọka nune kpẹẹ lẹ. (1 Ịdị. 19:5-7) Ịyẹ iJihova à tị́ cheye nyọka họ ụka ká ịnyịrọ á chịhị pyẹpyẹ?

11. Ụbgẹyị ọkịla oyina iJihova à tị́ kaa dahị ụbwọ? (Eje Ọnyịịla 94:18)

¹¹ Ang ọlẹ ká iJihova kaa họ. O cheye nyọka dahị ụbwọ. (Wa Eje Ọnyịịla 94:18.) Jaabwọ  ká ọngọ rụnyẹ ọlẹ ká ang họ ka baba nya ụbwọ ọdada ene kọ ka jẹ́-ẹ jẹdịyẹ ka ẹga ọhẹ lee ọkịla, ahị ịnyịnyị baba nya ụbwọ ọdada nyọka jẹ́-ẹ họ ụkụrwọ nya iJihova jaabwọ kọ baba. Ụka ọlịnyị, iJihova ya ahị odahile hahị nyori: “Am à ri [iJihova] Ohe Oluhye nyanụ lẹ, m̀ yụbwọ chịnụ giri-giri juwa byinu yẹkẹẹ, ‘Anụ ju uhi ka, m̀ ka danụ ụbwọ.’” (Ayị. 41:13) Adịrahụ iDevidi ye ụma nya ụbwọ ọdada ọlịịwẹ. Ụka ká akama chọọ ọgụ bala aluji ọ-myị họọ ka, o byi iJihova yẹkẹẹ: “[IJihova], ahụ à chẹwụ kem bala ọ-chịm da lẹ.” (Eje. 18:35) Ụgbẹyị oyina iJihova a tịị dahị ụbwọ?

12. Owo iJihova à tị́ ka kpa dahị ụbwọ ụka ká ịnyịrọ à chị́hị pyẹpyẹ?

¹² IJihova kaa dahị ụbwọ bwula ọ-gu angịkịla gbịla nyọka dahị ụbwọ. Ọ-chụ pwokwita, ụka ká ịnyịrọ á chị́ iDevidi pyẹpyẹ, iJonatan oligu nyamwụ à kaa jwọọ ụga nyọka jwọọ ọngịrị bala o-jwọọ ọhụ lẹ. (1 Sam. 23:16, 17) Ịnyịnyị, iJihova chụ Ịlayịcha nyọka da Ịlayịja ụbwọ. (1 Ịdị. 19:16, 21; 2 Ịdị. 2:2) Alẹ, iJihova ka kpa ugbiyegu nyahị, aligu nyahị, lee angịgbahị nya ọjịra-jịra dahị ụbwọ myị́. Ma, ụka ká ang ọjụjụ á họ tahị, ọ kaa háahị nyọka chebwo hi angịkịla. Ọ kaa háahị kahị ka ji ụbwọọhị. Ọ kaa lịnyị ẹ-ẹga nya angịnyị lụmẹ-lụmẹ. Ma ịyẹ ahị tị́ ka họ kahị ka ye ụbwọ ọdada nya iJihova?

13. Ịyẹ ahị tị́ baba nyọka họ chajị kahị ka ye apyobwuna bwu ụbwọ ọdada nya iJihova? (Yẹ ifoto ịnyịnyị)

¹³ Ang ọlẹ kahị baba nyọka họ. Maga ká kụrụ oleggu nya ịlọng ọ-chị ebwo. Ụka kahị chị ịlọhị ebwo, irya nyahị kaa ka oye ookpokpo, ahị ka ja kụ irya u-uhye nya ịlọhị bala akama nyahị kem. Irya ịlịịwẹ ka gu abwọlẹ kahị kaa cheje nya ẹla myị́. (Etu 18:1) Ịlẹhị lẹ, ahị wuu baba nya ụka ọhẹ ọlẹ kahị ka ji ụbwọọhị, ọgụgụụgụ ụka ká ang ọtịpyọ á họ tahị. Ma, kori kahị ji ụbwọọhị tata lụmẹ, ọ ka lala o-ri ahị nyị ja ku angịlẹ ká iJihova wẹẹ ka kpa dahị ụbwọ rụ hi ịlọhị. Lẹ jaabwọ myị́ abwọ ká ang á lujwo kaka ba lụka nya akama, maga ká ye ụbwọ ọdada nya alugbiyegu nyang, aligu, bala angịgbahị nya ọjịra-jịra myị. Yaa lala angịlẹ ká iJihova wẹẹ kpa dang ụbwọ.—Etu 17:17; Ayị. 32:1, 2.

IJIHOVA KA KPỤ́NG ẸJẸ

14. Ang iyina à tị́ ka chị uhihi juhi myị́?

¹⁴ Ang odu kọ lujwo. Ụka ọhẹ ka ji ká uhi ka juhị myị́. Ẹ-ẹpwụ nya ịBayịbụụ, anchẹ nya Ohe ị-la ọmyịmyị kaa ya ẹla rụ ụka kị yẹ akama lee ụka ọlẹ kị ju uhihi chajị nya aluji nyaa lee ang ọkịla. (Eje. 18:4; 55:1, 5) Ịnyịnyị,  ị ka bahị ẹtẹ u-ube-ụpwụ, ọlụkụrwọ nyahị, bwu ugbiyegu nyahị, lee bwu ẹga nya igomenti myị́. Ọhẹka ahị ka ju uhi nya igu ọọlajị nya ẹdụrụ ọlẹ kọ jụụhị myị́. Ụka ọlịnyị, ahị ka la ịlọhị lala ọnyị ọlụbwọ ọlẹ kọ jẹ́-ẹ da ịlọmwụ ụbwọ ka myị́. Ányị iJihova à tị́ kaa dahị ụbwọ ụka ọlịịwẹ?

15. Jaabwọ ká Eje Ọnyịịla 94:19 ya, ịyẹ iJihova à tị́ ka họ hahị?

¹⁵ Ang ọlẹ ká iJihova kaa họ. Ọ kaa kpụhị ẹjẹ bala ọ-ya okpunyi hahị. (Wa Eje Ọnyịịla 94:19.) Ẹla ọla ụpwụ nya eje ọnyịịla ọwẹ kpahị irya ka ẹga nya ọnyị ochiche ọlẹ kọ jẹ́ nune myị́ ka ọọlajị nya ịkpala ịtụka-tụka ịlẹ kị ja kpụ. Ahị ka jẹ́-ẹ kụ irya nya abwọlẹ ká adamwụ wẹ ka hwoo ba ọkịlẹtụ, kpọọ gbee kọ jẹ́-ẹ nune. Nanana nyori ịkata ị-ịwa juwa kpụ wee, ọ kaa la ịlọmwụ ẹ-ẹpwụ achwọ nya adamwụ. Ụka kahị ja yẹ akama ị-la uhi-uhi, ahị ka baba nya Adahị olepwoohe ọ-ka dahị ụbwọ lala o-ri nyị huuhi ba ọkịlẹtụ gbee kahị ka kpụ ba ịnyịnyị myị́. Ányị ahị tị́ ka jẹ́-ẹ ye eje ọkpụ́kpụ ọlịnyị bwu ẹga nya iJihova?

16. Ịyẹ ahị tị́ ka họ chajị kahị ka ye apyobwuna bwu ẹjẹ ọkpụ́kpụ nya iJihova? (Yẹ ifoto ịnyịnyị)

¹⁶ Ang ọlẹ kahị baba nyọka họ. Maga ká la ụka bala iJihova yẹẹyẹẹ bwula abwọ ọrịrị bala Omyi Ẹla nyamwụ ọwawa. (Eje. 77:1, 12-14) Kori ká họ ịnyị ụka ká ji ẹpwụ nya akama, ang ọhọhẹ ọlẹ kọ ka wẹ irya nyang ka ri ọ-ka kpa ka tọ Adang olepwoohe. Ya ang ọlẹ kọ ri uhi bala akama nyang je iJihova. Ke ụrụ wo lọọ bwula ụpwụ ịgọgọ ọwawa, ká ya iwe da họọ kọ kpụ́ng ẹjẹ. (Eje. 119:28) Ụpa nya ịBayịbụụ ọhẹ ka ji kpangga kọ ka kpụ́ng ẹjẹ ụka ká ja ju uhihi. Ọ-chụ pwokwita, à ka jẹ́-ẹ ye ọhụ ojuju myị́ ẹ-ẹpwụ nya apwụ nya iJobu, Eje Ọnyịịla, bala Etu, tụ ẹla nya iJisọsị ịlẹ kị juwa ụ-ụpwụ nya ịMatiyu egbeju 6. Ụka ká raabwọ ha iJihova bala ọ-wa Omyi Ẹla nyamwụ, à ka ye ẹjẹ ọkpụ́kpụ bwụ ẹga nyamwụ.

17. Ahị odahile oyina ahị tị́ ka la?

¹⁷ Ahị ka jẹ́-ẹ la ahị ọdahile ẹ-ẹga nya iJihova nyori ọ ka juwa tahị ụka ká ang ọtịpyọ á họ tahị. Áhị ka la ụbwọọhị ẹnẹnẹhẹ ka. (Eje. 23:4; 94:14) IJihova cheye nyọka kpa ẹhị rịrịịhị, họ kahị ka la giri-giri, dahị ụbwọ, bala ọ-kpụ́hị ẹjẹ. Ayịsaya 26:3 ya ẹla rụ iJihova yẹkẹẹ: ‘Angịlẹ wuu ká irya nyaa godayị kpakpakpa u-uhye nyang, kị pyị giri-giri ka, ahụ iJihova ka kpaa ẹ-ẹpwụ nya okpunyi nyang ọlẹ kọ jịra kpẹkpẹẹ, chajị nyọlẹ kị hu ọkịlẹtụ hang dahịhileng.’ Lẹ dahịhile iJihova, ká họ jaabwọ ká ka jụ họ ba myị nyọka ye apyobwuna bwu ụbwọ ọdada nyamwụ wuu mẹ. Kori ká họ ịnyị, à ka ye ọngịrị tịrẹkpẹ ụka ká iwe-ahụrụ á lujwo hang.