1. Ịyẹ tị́ du kahị ka ju uhi ụka ọhẹ myị́?

 AHỊ wuu kaa ju uhi ụka ọhẹ. Ẹlịlẹhị tị ri, ang ọlẹ kahị jẹ́ bwu ịBayịbụụ gbahị kpehe hi uhi nya igu, uhi nya alegu-inyibyi, bala uhi nya ijuju. Ma ahị tị jam hịhị lụka ọlẹ ká “ang iluhi-uhi,” lala ẹwụ ọdada, agbụrụ ọhọhọ, bala ẹdụrụ ji. (Luk. 21:11) Ahị dọmwụ ka ju uhi nya angịnyị, lala alegbeju ikpeji ịlẹ kị kaa yẹhị ụhị lee alugbiyegu nyahị ịlẹ ká ịgba ọgbagba nyahị á háa ka myị́. Angịhyẹ kaa chị uko nyori ịwa nyị́ ka jẹ́-ẹ bọhụ ẹ-ẹpwụ nya akama ọlẹ kị la lẹẹlẹẹ lee ọlẹ kị ka la ị-ịlahị ka myị́.

2. Chabwọ nya iwe-ahụrụ nya iDevidi ụka kọ juwa ị-ịGatị wẹẹ.

² IDevidi kaa ju uhi ụka ọhẹ ịnyịnyị. Ọ-chụ pwokwita, ụka ká Adịrahụ ịSọlụ wẹẹ da urwe nyamwụ nyọka nwọọ, iDevidi chụ nyọka rụnyẹ rụ ka epweji nya iFilisitiya ọlẹ kọ ri ịGaatị. Akichi, kọ ri adịrahụ nya ịGaatị, wẹ ka jẹ́ nyori iDevidi nyaa ri ọgẹwụ ọtụka ọlẹ ká angịnyị kaa mwu eje rụ nyị “nwụ angị ụnụnụụnọ iwo” nya ala iFilisitiya lẹ. IDevidi “ju uhi . . . nya ịlẹhị-ịlẹhị ọọ-la ọọwa.” (1 Sam. 21:10-12) O chuko nya ang ọlẹ ká Akichi ka họ tọọ myị́. Ányị iDevidi à tị́ bwu kụrụ uhihi nyamwụ?

3. Jaabwọ ká Eje Ọnyịịla 56:1-3, 11 ya, ányị iDevidi à tị́ bwu kụrụ uhi nyamwụ?

³ Ụ-ụpwụ nya Eje Ọnyịịla 56, iDevidi ya jaabwọ kọ lọọ ụka kọ juwa ị-ịGatị. Ọ ya ang odudu kọ juhi ụ-ụpwụ nya eje ọnyịịla ọwẹ, ọ tị ya jaabwọ kọ bwu kụrụ uhihi nyamwụ ịnyịnyị. Ụka ká iDevidi á juhi, ọ kaa dahịhile iJihova. (Wa Eje Ọnyịịla 56:1-3, 11.) Ahị ọdahile ọọwa á tị ri ododu ka. Bwula ụbwọ ọdada nya iJihova, iDevidi jẹ́ kpa ijẹẹhị onyeewe ọhẹ kpehe ọlẹ kọ họ ụkụrwọ: Ọ họ lala o-ri nyị ri ọlụla! Akichi yẹ iDevidi lala  ọngịnyị o-ju apyobwuna ka du kọ kwoo ri hi ẹga nyamwụ, ọkọkọ nyọka la irya nya ọ-nwọọnwụ. Lẹ iDevidi jẹ́ be.—1 Sam. 21:13–22:1.

4. Ányị ahị tị́ ka bwu ju ahị ọdahile nyahị ẹ-ẹga nya iJihova ọngịrị? Ọ-chụ pwokwita oyina à tị́ ji?

⁴ Ahị ịnyịnyị ka jẹ́-ẹ kụrụ uhi nyahị bwula ọ-dahịhile iJihova. Ma ányị ahị tị́ ka ju ahị ọdahile nyahị ẹ-ẹga nya iJihova ọngịrị, ọgụgụ ụka kahị ja juhi? Yẹ ọ-chụ pwokwita ọlẹ lẹẹ. Kori ká wẹ ka jẹ́ nyori à la ẹdụrụ ọhẹ, à ka juhi ụka nya ọgbanyẹ myị́. Ma, uhi nyang ka chụhi kori ká dahịhile ịdonkita nyang. Ọhẹka à wo oja nyamwụ jaabwọ kọ kaa họ angịnyị uda bwu ẹdụrụ ọlẹ kọ jụng wẹ. Ọ ke ụrụ lang kpẹnẹẹ ụka ká wẹẹ ya joo jaabwọ kọ kpang, du ká jẹ́ myị̀myị̀ nyori ọ jẹ́ jaabwọ kọ lang. Ọ dọmwụ ka da utoji ọlẹ kọ kaa họ ụkụrwọ yẹẹyẹẹ ha angịkịla ju hang myị́. Ụ-ụgbẹyị ọlịnyị, ahị kaa ju ahị ọ-dahile nyahị ẹ-ẹga nya iJihova ọngịrị bwula ọ-kụ irya ju ang ịlẹ kọ họ ene-ene lẹ, ịlẹ kọ wẹẹ họ lẹẹlẹẹ, bala ịlẹ kọ dọmwụ ka họ hahị ị-ịlahị wẹẹ. Ẹla ọlẹ ká iDevidi họ à wẹ lẹ. Jaabwọ kahị wẹẹ ka kụ ẹhị yẹ ẹla ịhyẹ bwu ụpwụ nya Eje Ọnyịịla 56, kụ irya u-uhye nya abwọlẹ ká ahụ ịnyịnyị ka ju ahị ọdahile nyang ọngịrị ẹ-ẹga nya iJihova bala ọ-kụrụ uhi nyang.

ỊYẸ IJIHOVA À TỊ́ HỌ ENE-ENE LẸ?

5. Ụka ká iDevidi á ju uhi, ịyẹ ọ tị́ kaa kụ irya ju? (Eje Ọnyịịla 56:12, 13)

⁵ Ụka ká ọhịhị nya iDevidi juwa ẹ-ẹga ọ-la uhi-uhi, ọ ya ẹhị rịrị u-uhye nya ang ịnyịịla ịlẹ ká iJihova họ ene-ene lẹ. (Wa Eje Ọnyịịla 56:12, 13.) Ọwẹ ri ẹla ọlẹ ká iDevidi kaa họ ẹ-ẹpwụ nya ọhịhị nyamwụ wuu. Ọ-chụ pwokwita, ụka ọhẹ ọ kaa kụ irya u-uhye nya ụkụrwọ ụbwọ nya iJihova, du kọ kaa kpịtịya nya ọngịrị ọtụka nya iJihova bala irya ọlẹ kọ la ẹ-ẹga nya angịnyị ehe. (Eje. 65:6-9) IDevidi kụ irya u-uhye nya ang ịlẹ ká iJihova họ ha angịkịla ịnyịnyị. (Eje. 31:19; 37:25, 26) Ma ọ tị kaa kụ irya gụgụụgụ u-uhye nya ang ịlẹ ká iJihova họ họọ ọwa ayịdang. IJihova da iDevidi ụbwọ bala ọ-chị ewu koo bwu ụka-ụka kọ ri onjwo ochichce. (Eje. 22:9, 10) Kụ irya jaabwọ ká irya ọkụkụ ọlịịwẹ ka ju ahị ọdahile nya iDevidi ọngịrị ẹ-ẹga nya iJihova kaka ba wẹẹ!

6. Ụka kahị ja ju uhi, ịyẹ à tị́ ka dahị ụbwọ nyọka dahịhile iJihova?

⁶ Ụka ká ja ju uhi, tọ ịlọng wo yẹkẹẹ, ‘Ịyẹ  iJihova à tị́ họ ene-ene lẹ?’ Kụ irya u-uhye nya ang ịlẹ ká iJihova họ ene-ene lẹ. Ọ-chụ pwokwita, ụka kahị “me irya” kpori-kpori u-uhye nya abwọlẹ ká iJihova kaa kpahị ju ịchịnụ bala ịfụlawa—ịlẹ kọ họ la abwụma nya ịlọmwụ kpụ ị jẹ́-ẹ gbịgba họọ ka—ahị ka dahịhilọọ nyori ọ ka kpahị juhi ịnyịnyị. (Mat. 6:25-32) Kụ irya ịnyịnyị u-uhye nya ang ịlẹ ká iJihova họ ha anchẹ nyamwụ. À ka jẹ́ ang u-uhye nya ọngọhyẹ ọlẹ kọ la ọmyịmyị ọnyọọngịrị lụka nya ịBayịbụụ, lee à ka wa oja nya anchẹ nya iJihova ịlụka nyahị ọhẹ myị́. a Da ọọwa u-uhye, kụ irya nya abwọlẹ ká iJihova kpahị jung ahụ la ịlọng ene-ene ịnyịnyị. Ányị ọ tị́ bwu kpang wẹ ka jẹ́ ẹlịlẹhị? (Jọn. 6:44) Ányị ọ tị́ bwu wẹ abwọ ọrịrị nyang? (1 Jọn. 5:14) Ányị a tị́ wẹẹ bwu yé apyobwuna bwu iya ọkịlaakịla nya Ọnyị ọlịkẹjẹ nyamwụ?—Efe. 1:7; Hib. 4:14-16.

7. Ányị oja nya ọlọmwụ ịDanẹlụ à tị́ bwu da Vanessa ụbwọ nyọka kụrụ uhi nyamwụ?

⁷ Iwe-ahụrụ ọ-la uhi-uhi ọhẹ la ta ọọnahị ọnyang ọhẹ bwu Haiti, ká ẹnyị nyamwụ ri Vanessa. b Ọlẹng ọhẹ e-epweji nyamwụ kaa wụrọọ nyọka doo ẹrụ ẹnụ myị́ ẹnụ bala ọ-kaa yẹ rịrọọ nyọka ri igu balọọ. Vanessa tị pwa gbang-gbang. Ma ọlẹng ọọwa tị ju agbama gụ́ olene kpụ ọ dọmwụ kaa chị uhi jwoo. Ọọnahị ọwẹ yẹkẹẹ: “M̀ ju uhi yẹẹyẹẹ.” Ányị Vanessa à tị́ bwu kụrụ uhi nyamwụ? Ọ họ ang ọlẹ kọ ka họ myị́ nyọka chị ewu ke ịlọmwụ. Ọngọgbahị nya ọjịra-jịra ọhẹ jwoo ọhụ nyọka kpa ẹla ọọwa ka gba alịdangeri. Ma ọọnahị ọwẹ ya ẹhị rịrị u-uhye nya abwọlẹ ká iJihova chị ewu ke anchẹ nyamwụ lụka onyogo. Vanessa yẹkẹẹ: “Ọngọ họhẹ ọlẹ kam kaa kụ irya nyanwụ ri ịDanẹlụ. Ị woo ju ka ụjẹ nya ẹgabẹ ịlẹ ká imyi nwụ yẹẹyẹẹ, nanana nyori ọ́ da ẹlẹlẹhẹ ka. Ma iJihova chị ewu koo. Lẹ m̀ bịlẹ iJihova kọ ka ye ẹlẹwẹ jubwọ ham. Nyọlẹ kam họ ịnyị, ḿ kaa ju uhi kaka.”—Dan. 6:12-22.

ỊYẸ IJIHOVA À TỊ́ WẸẸ HỌ LẸẸLẸẸ?

8. Ẹlịyẹ iDevidi à tị́ jẹ́ myị̀myị̀? (Eje Ọnyịịla 56:8)

⁸ Ịlẹhị lẹ iDevidi ji ẹpwụ nya iwe-ahụrụ ọ-la uhi-uhi ụka kọ juwa ị-ịGatị, ọ́ ya ẹhị rịrị u-uhye nya ẹla ọlẹ kọ ri uhi nyamwụ ka. Ọkọkọ nya ọọwa, ọ chụ nyọka ya ẹhị rịrị u-uhye nya ang ọlẹ ká iJihova wẹẹ họ họọ lụka ọwẹ. IDevidi yẹ jẹ́ nyori iJihova wẹẹ kpọọ ụgbẹyị bala ọ-chị ewu koo bala o-ri Ohe jẹ́ jaabwọ ká ẹla ọọwa lọọ ọ-ọkịlẹtụ. (Wa Eje Ọnyịịla 56:8.) IDevidi la aligu ịnyịịla ịnyịnyị, angịnyị lala iJonatan bala Ahimẹlẹkị Ọngọkiliya Ọgbahị ịlẹ kị chẹkpẹ jwoo bala ọ-dọọ ụbwọ ụ-ụgbẹyị ọlẹ kọ baba. (1 Sam. 20:41, 42; 21:6, 8, 9) Nanana nyori Adịrahụ ịSọlụ tịtọ nyọka nwụ iDevidi, ọ jẹ́ be la ọhịhị nyamwụ. Ọ jẹ́ myị̀myị̀ nyori iJihova jẹ́ ang ọlẹ kọ wẹẹ họ tọọ kpangga bala abwọlẹ ká ẹla ọọwa lọọ.

9. Ịyẹ iJihova à tị́ kaa yẹ u-uhye nya ọngọngọọng nyahị?

⁹ Ụka ká ju ka ẹpwụ nya ọmayẹ ọlẹ kọ lang uhi-uhi, jẹ́ nyori iJihova kaa ya ẹhị reeji nya ọmayẹ ọọwa bala abwọlẹ ká ọmayẹ ọọwa lang. Ọ-chụ pwokwita, iJihova jẹ́ ụhị ọlẹ kị kpa ala Isirẹlụ yẹ ụ-ụwa Ijipiti, ọ tị “jẹ ẹla chajị nya akama ọlẹ kị wẹ-ẹ̀ yẹ” bala ojuju nyamwụ ịnyịnyị. (Ehe. 3:7) IDevidi mwu eje ya iJihova nyị yẹ “akama” ọlẹ kọ wẹẹ yẹ bala ọ-jẹ́ ‘ila ọlẹ kọ wẹẹ rwọọ ẹ-ẹpwụ.’ (Eje. 31:7) Ụka ká anchẹ nya Ohe á ja yẹ akama—kori kọ dọmwụ ri eje ọlẹ kị chị la ẹla ọ-jẹ́ nwà ka nya ịlaa wẹwẹ—“ọ kaa tọọ olujwo.” (Ayị. 63:9, NW) Ụka ká uhi á ja jung, iJihova jẹ́ jaabwọ kọ lang, ọ tị nwụlanọ nyọka dang ụbwọ kụrụ uhi ọọwa ịnyịnyị.

10. Ịyẹ tị́ du ká jẹ́ myị̀myị̀ nyori iJihova kpahị jung bala ọ-dang ụbwọ nyọka bọhụ ẹ-ẹpwụ nya ịmayẹ ọnyị myị́ ọnyị?

 ¹⁰ Kori ká ja chịpwụrụ bwu ẹpwụ nya ịmayẹ ị-la uhi-uhi, ọhẹka á ka yẹ abwọlẹ ká iJihova wẹẹ dang ụbwọ ka myị́. Ịyẹ a tị́ ka jẹ́-ẹ họ? Bịlọọ kọ dang ụbwọ nyọka yẹ ụbwọ ọdada nyamwụ. (2 Ịdị. 6:15-17) Tị kụ irya ju ẹla ọlẹ: Ẹla o-ya dodehe ọhẹ lee ẹla ọwẹwẹ nya ọọnahị ọhẹ jung ọngịrị ọọjịra-jịra ẹnẹhẹ lẹ? Ụpwụ nyahị ọhẹ, lee ifim, lee eje ọkpịpyọ-kpịpyọ ọhẹ jung ọhụ ẹnẹhẹ lẹẹ? Ọọnahị ọhẹ ya ẹlẹhẹ lee ọ-wa ụpwụ ịgọgọ ọhẹ jeng ọlẹ kọ jung ọhụ ẹnẹhẹ lẹẹ? Ahị kaa deeri nya abwọlẹ ká ọháha bala ọhụ ojuju o-bwu ẹpwụ nya Omyi Ẹla nya Ohe kaa dahị ụbwọ kaka ba. Ị tị ri āhị ọtụka-ọtụka bwu ẹga nya iJihova. (Ayị. 65:13; Mak. 10:29, 30) Ị ri ang-ẹjẹẹ nyori iJihova kpahị jung. (Ayị. 49:14-16) Ị tị mẹjẹ ịnyịnyị nyori à ka jẹ́-ẹ dahịhilọọ.

11. Ịyẹ à tị́ da Aida ụbwọ nyọka kụrụ uhi nyamwụ?

¹¹ Aida, kọ ri ọọnahị ọnyang ọhẹ bwu Senegal, ya ẹhị reeji nya abwọlẹ ká iJihova dọọ ụbwọ lụka nya ọmayẹ ọhẹ. Nyọlẹ ká ọwa à ri ọnyị nya ọgbanyẹ wẹẹ, adamwụ bala ịnamwụ ya ahị guru nyori ọ ka la okpoko kpụ ọ-ka kpa kpa ịlọmwụ tụ́ ịwa ayịdang. Ma nyọlẹ ká Aida hu ọhịhị nyamwụ hukee chajị kọ ka jẹ́-ẹ ye ịlahị nya ụgbẹyị wẹẹ, ọ́ la okpoko gbuu kaka. Alugbiyegu nyamwụ kaa wụ ẹjẹ tọọ bala ọ-kpọọ abyị. O yẹkẹẹ: “M̀ ju uhi nyori ḿ ka jẹ́-ẹ da adam bala ịnam ụbwọ myị́ ka bala o-ri ọng myị́ ọng ka nyẹẹkpẹ dam. M̀ dọmwụ kaa kpụ iJihova abyị nyọlẹ kọ ya iwe da ká ang tịpyọ pwụ ọlịịwẹ.” Ọọwa lẹ ọ ke ụrụ wo ẹla oyaya ọhẹ ọọjịra-jịra lẹlẹ. O yẹkẹẹ: “Ọọnahị ọlẹ kọ la ụpa ọọwa kpụhị ịtịya nyori iJihọva nyị jẹ́ ịngịngịhyẹ ọlẹ kọ ri uhi nyahị ọ-ọkịlẹtụ. Bwula ọhụ ojuju nya angịgbahị nya ọjịra-jịra bala angịkịla, m̀ wẹ ka jẹ́ dụmwọ-dụmwọ nyori iJihova la ọháha ẹ-ẹga nyam wẹẹ. M̀ dọmwụ nyọka raabwọ ha iJihova la ahị ọdahile gụ́ olene nyori ọ ka dam ụbwọ, m̀ tị kaa la okpunyi ọlam-ọlam jaabwọ kam wẹẹ yẹ ọwẹwẹ nya abwọ ọrịrị nyam.” Nyọlẹ kọ nọ chẹẹ, Aida yé ụkụrwọ ọlẹ kọ kaa yé okpoko kpa da ịlọmwụ ụbwọ ẹ-ẹpwụ nya ịlahị nya ụgbẹyị oyeye bala ọ-kaa yé okpoko da adamwụ bala ịnamwụ ụbwọ tụ́ angịkịla ịnyịnyị. O yẹkẹẹ: “M̀ jẹ́-ẹ dahịhile iJihova  yẹẹyẹẹ lẹ. Lẹẹlẹẹ, ó-ri kam raabwọ lẹ aalẹ, uhi nyam kaa rụnyẹ rụ lẹ.”

ỊYẸ IJIHOVA À TỊ́ KA HỌ Ị-ỊLAHỊ?

12. Jaabwọ ká Eje Ọnyịịla 56:9 ya, ẹlịyẹ iDevidi à tị́ jẹ́ myị̀myị̀?

¹² Wa Eje Ọnyịịla 56:9. Ọgba ọwẹ ya ụgbẹyị ọkịla ọlẹ ká iDevidi bwu kụrụ uhi nyamwụ. Nanana nyori ọhịhị nyamwụ juwa ẹ-ẹga ọ-la uhi-uhi wẹẹ, ọ kụ irya u-uhye nya ang ọlẹ ká iJihova ja ka họ họọ ị-ịlahị. IDevidi jẹ́ nyori iJihova ka chọọ da lụka ọlẹ kọ pwoku. IJihova tị́ ya dodehe ene nyori iDevidi nyị ka ri adịrahụ nya ala Isirẹlụ. (1 Sam. 16:1, 13) A-ahị nya iDevidi lẹ, ang myị́ ang ọlẹ ká iJihova á chehe lẹ, ọ lala o-ri nyi họ jịra ene-ene lẹ.

13. Ẹlịyẹ ahị tị́ ka jẹ́ myị̀myị̀ nyori iJihova ka họ?

¹³ Ịyẹ iJihova à tị́ chehe nyọka họ hang? Ahị ya ahị guru nyori ọ ka chị ewu keehị hi akama ọnyị myị́ ọnyị ka. c Ma kpịtịya nyori akama ọnyị myị́ ọnyị kọ ja chịng ọgụ lẹẹlẹẹ, iJihova ka myaa wuu ẹ-ẹpwụ nya odehe onyeewe ọlẹ kọ wẹẹ warị. (Ayị. 25:7-9) Ọngọ họhị la ọngịrị nwa kpụ ọ ka wule egu eji, họhị uda, bala ọ-ka tụ aluji nyahị wuu kịnyaa.—1 Jọn. 4:4.

14. Ẹlịyẹ ahị tị́ ka kụ irya ju myị́?

¹⁴ Ụka ká uhi á ja wẹ ẹpwụ nyang, kụ irya u-uhye nya ang ọlẹ ká iJihova ka họ hang ị-ịlahị. Kụ irya u-uhye nya abwọlẹ kọ ka lang ụka ká Ohe Onyobyi á ka jam kaka, ụka ká alọkwọ á ka jam kaka, ká alabwẹla ịnyịịla kem à ka jam odehe, bala ụka ká ọkpẹẹkpẹẹ ọlala-ka ka myị́ hiihi dụmwọ-dụmwọ ahyẹẹnụ ọnyị myị́ ọnyị. Ẹla ọ-họ mẹjẹ ọhẹ ji la ọjịra-jịra ọtụka nya 2014 kọ mẹjẹ jaabwọ kahị ka kụ irya u-uhye nya ẹhị ọrịrịị-rịrị nyahị myị́. Adịda ọhẹ wẹẹ ya ẹla bala ugbiyegu nyamwụ u-uhye nya abwọlẹ ká omyi ẹla ọla ụpwụ nya 2 iTimoti 3:1-5 ka datị ịnọ kori ká ẹla ọlụwa á ja chabwọ abwọlẹ ká ịparadayịsị ka la. Ọ yẹkẹẹ: “Lụka nya odehe onyeewe, ụka ọlẹ kọ ka kpịpyọ gụ́ wuu ka ji. Angịnyị ka ri angịlẹ kị la ọháha ẹ-ẹga nya angịkịla, angịlẹ ká ang ụdụ nya olegu há, angị họ ang ba o-oyi bala angị kpa ịlaa keji, angị ya ogbo ha Ohe Oluhye, angị ju adaa bala ịnaa ihi, angị myị̀ la obe ojiji, angị godayị giri-giri, la ọháha ọgẹnẹ-gẹnẹ ẹ-ẹga nya alugbiyegu nyaa, angị họ ẹla ọlẹ kị myọnụ nyị ka họ, angị ya ẹla ọnyịịla u-uhye nya angịkịla, angị wu ịlaa kpa, angị la kpẹnẹẹ, angị la ọháha u-uhye nya ang ọnyịịla, angị chịla o-hu ọkịlẹtụ ha, angị yabwọ hi ẹla, angị la olegu ọdụmwọ, angịlẹ ká Ohe Oluhye há gụ ang ịkpịpyọ nya odehe, angịlẹ kị kaa họ ẹla nya Ohe Oluhye bwu ọkịlẹtụ nyaa; aa ji ogu ta angịnyị ịlịnyị wuu mẹ.” À kaa ya ẹla bala ugbiyegu nyang lee aanahị ịla ọjịra-jịra u-uhye nya abwọlẹ ká ọhịhị ka la odehe onyeewe?

15. Ịlẹhị lẹ Tanja ju uhi, ma ịyẹ à tị́ dọọ ụbwọ nyọka kụrụ uhi nyamwụ?

¹⁵ Ọọnahị ọnyang ọhẹ bwu North Macedonia ká ẹnyị nyamwụ ri Tanja kụrụ uhi nyamwụ bwula ọ-kụ irya u-uhye nya ahị ọwawa ịla ijuju. Adamwụ bala ịnamwụ á kaa myị họọ ọ ka jẹ́ ịBayịbụụ kpong-kpong ka. Ọ yẹkẹẹ: “Ang ịhyẹ ịlẹ kam ju uhi nyori ị ka họ tam họ ịlẹhị. Ịnam kaa nyim ụka ká ọjịra-jịra ọnyị myị́ ọnyị á myị́ kpa. Adam bala ịnam kaa chị uhi jum nyọka nwụm kori kam ri ọngọhẹ nya Alibeenu nya iJihova.” Ụka ohyẹẹkpẹ, adamwụ bala ịnamwụ kwoo rụ hi ẹpwa. Ányị Tanja à tị́ họ? Ọ yẹkẹẹ: “M̀ ya ẹhị rịrị u-uhye nya abwọlẹ kam ka chị ọkẹkẹnị gboyi myị́ oyi kaka ba kori kam chụ nyọka godayị girigiri. M̀ kaa kụ irya ịnyịnyị u-uhye nya abwọlẹ ká iJihova ka nwụm uri nya ịngịngịhyẹ ọlẹ kọ ka gum byi myị́ lẹlẹ ụ-ụwa odehe onyeewe bala abwọlẹ  kahị ka deeri nya ang ịtịpyọ ọnyị myị́ ọnyị wuu.” Tanja godayị girigiri ịnyịlẹhị. IJihova tị dọọ ụbwọ kpụ o ye ẹga kụ ịnyịnyị. Lẹẹlẹẹ, Tanja rụrwọ ọọnahị ọnyịịla-nyịịla ọhẹ kpụ ịwa lawụlẹ kaa kpa ụka nyaa wuu họ ụkụrwọ ha iJihova la ọkẹkẹnị.

JU AHỊ ODAHILE NYANG ỌNGỊRỊ ALẸ MẸ

16. Ịyẹ à tị́ ka dahị ụbwọ nyọka la ugbodu ojuju ụka kahị ja yẹ ọ-họ jịra nya ọmwụ ọyẹyẹ ọla ụpwụ nya iLuku 21:26-28?

¹⁶ Lụka nya akama ọtụka okpelego, “uhi ojuju bala uko ọchịchị” ka myị ẹpwụ nya angịnyị wuu. Ma anchẹ nya Ohe tị ka kụ girigiri la ugbodu ojuju. (Wa iLuku 21:26-28.) Ịyẹ tị́ du kahị ka ju uhi ka? Chajị ahị jẹ́-ẹ dahịhile iJihova ene-ene lẹ. Tanja, ọlẹ kahị ya ẹla nyamwụ ene wẹ ya nyori ẹla ịlẹ kị họ tọọ lụka ọkẹkpẹ nyị wẹẹ da ọwa ụbwọ nyọka jahị da iwe-ahụrụ ilujwo ịkịla. Ọ yẹkẹẹ: “M̀ wẹ ka yẹ nyori iwe-ahụrụ ọhẹ-lọhẹ á ji ká iJihova á ka jẹ́-ẹ dahị ụbwọ ẹ-ẹpwụ nyamwụ ka lẹ ka.” Ụka ọhẹ ọ kaa lala o-ri angịkịla nya-à kpa iwe-ahụrụ nyahị ụ-ụbwọ lẹ, iJihova tị la ọngịrị gwaa. Jaabwọ myị́ abwọ ká ọmayẹ á tị́ la ọngịrị kaka ba, ọ ka cheju pyii lẹ.”

17. Ányị egbeju ẹla nya 2024 à tị́ ka jẹ́-ẹ dahị ụbwọ? (Yẹ ifoto ọla ẹbẹ nya ọgbanyẹ.)

¹⁷ Ang lụmẹ-lụmẹ ji alẹ kị ka jẹ́-ẹ kpa uhi wẹ ẹpwụ nyahị. Ma lala iDevidi, ahị ka jẹ́-ẹ pwa la ọ-ka ya iwe da ká uhi ka kpahị họ ẹla. Egbeju ẹla nya ẹka nyahị ọla 2024 ri abwọ ọlẹ ká iDevidi rị ha iJihova yẹkẹẹ: “Ụka kam ju uhi, m̀ kaa dahịhileng.” (Eje. 56:3) Jaabwọ ká ụpwụ ọ-da ịBayịbụụ wụlẹ ọhẹ ya ẹla u-uhye nya ọgba ọwẹ, iDevidi “á kaa ya irya nịrọ ang ịlẹ kị ri uhi lee akama nyamwụ ka. Ọkọkọ nya ọọwa, ọ kaa kpụnịrọ ọngọlẹ kọ ka jẹ́-ẹ chọo da.” Kụ irya kịnyaa u-uhye nya egbeju ẹla nya ẹka nyahị ọwẹ ka ịlahị-ịlahị mẹ, ọgụgụ ri ụka ká ja chịpwụrụ bwu ẹpwụ nya iwe-ahụrụ ịla uhi-uhi. Hu ụka nọ nyọka kpa kụ irya u-uhye nya ang ịlẹ ká iJihova họ lụka ọkẹkpẹ, ilẹ kọ wẹẹ họ lẹẹlẹẹ, bala ịlẹ kọ ka họ ị-ịlahị. Ọọwa lẹ, à ka jẹ́-ẹ ya lala iDevidi yẹkẹẹ: “M̀ dahịhile Ohe Oluhye, ḿ ju uhi ka” lẹlẹ.—Eje. 56:4.