Nyọka họ ẹla kpụ iJihova ịpyọ, ahị baba nyọka la ọmyịmyị. Ma, ịBayịbụụ ya nyori “aangịnyị wuu a ri angị la ọmyịmyị . . . ka” (2 Tẹs. 3:2) “Angịnyị inyibyi ịlẹ kị ri alọkwọ,” ká Ọlẹrụ ịPọlụ baba nya ọ-gbakpehe bwu ụbwọ nyaa, ọ wẹẹ ya ẹla rụ lẹ. Ma ẹla ọlẹ kọ ya u-uhye nya ọmyịmyị gu angịkịla ịnyịnyị. Angịhyẹ á tịtọ kị ka myị nyori Ohe ọhẹ juwa kọ rị Ọngọ họ ang myị́ ang wuu ka. (Rom. 1:20) Angịkịla tị ka ya myị́ nyori ịwa nyị myị la ịngịhyẹ lee ọngọhẹ ọlẹ kọ la ọngịrị ọtụka. Ma ọmyịmyị ọlịịwẹ kem á nwà kpụ ọngịnyị ka họ ẹla kpụ iJihova ịpyọ ka.

Ahị baba nyọka jẹ́ myị̀myị̀ nyori iJihova ji ịnyịlẹhị bala o-ri ọ kaa “wahị kụrụ” angịlẹ kị la ọmyịmyị ọnyọọngịrị lee ọ-nwaa uri. (Hib. 11:6) Ọmyịmyị ri ụpa nya ugbe nya olegu ịgọgọ nyamwụ. Kori kahị bịlẹ iJihova ẹ-ẹpwụ nya abwọ ọrịrị, ọ ka ya olegu ịgọgọ nyamwụ hahị. (Luk. 11:9, 10, 13) Ụgbẹyị ọkpọnchị ọkịla ọlẹ kahị ka jẹ́-ẹ bwu ye olegu ịgọgọ ri ọ-ka wa Omyi Ẹla nya Ohe, chajị ị dọọ bwula ọngịrị nya olegu ịgọgọ. Ọọwa lẹ ahị ka kụ irya ju ẹla ọlẹ kahị wa bala ọ-maga nyọka kpa họ ụkụrwọ lẹlẹ. Bwula ọ-họ ịnyị, ahị wẹẹ mẹjẹ nyori ahị ya iwe da ká olegu nya iJihova ka dahị ụbwọ la ọhịhị ọlẹ kọ ka mẹjẹ nyori ahị la ọmyịmyị ụma ọlẹ kọ tịtọ.