ANG ỌJẸ́JẸ 28
EJE 123 Loyally Submitting to Theocratic Order
À Jẹ́ Ẹlịlẹhị Datị?
“Anụ godayị rịrị ụ-ụwa giri-giri mẹ. Kanụ hu ẹla nya ịlẹhị ọhọhọ nyanụ chị ọhị gbanggbang lala ugba ọchọhị nyanụ mẹ.”—EFE. 6:14.
ẸHỊ NYA ẸLA
Ọ-ka yẹ jaabwọ kahị ka bwu jẹ́ ọdatị nya ẹlịlẹhị ọlẹ kahị jẹ́ bala ịnịịkịla ịlẹ ká Olegu Onyobyi bala aluji nyahị kaa kpa pyẹ.
1. Ányị ẹlịlẹhị à tị́ kaa lang?
ẸLỊLẸHỊ ọlẹpwụ nya Omyi Ẹla nya Ohe há anchẹ nya iJihova yẹẹyẹẹ. Ọwa ọmyịmyị nyahị à kpụnịrọ lẹ. (Rom. 10:17) Ahị wẹ ka jẹ́ myị̀myị̀ nyori iJihova ya ọjịra-jịra nya angịnyị nya ịKịrayịsị yeji nyọka ri “itiwe bala ojẹkpa o-wu ẹla nya ịlẹhị . . . kpa.” (1 Tim. 3:15) Ahị tị kaa myọnụ nyọka ‘kpa ịlọhị keji ha angịlẹ kị wẹẹ kpẹhị rịrị’ ẹ-ẹpwụ arịrị nyahị jaabwọ kị wẹẹ da ẹlịlẹhị wụlẹ jehi bwu ẹpwụ nya ịBayịbụụ bala ọ-kaa mẹ ụgbẹyị jẹ pwoku irya nya Ohe.—Hib. 13:17.
2. Jaabwọ ká ụpwụ nya iJemsi 5:19 ya, ịyẹ à tị́ ka họ tahị myị́ ụka kahị jẹ́ ẹlịlẹhị kpá?
2 Ma, kori kahị dọmwụ ye ẹlịlẹhị myị kpá bala ọ-jẹ́ nyori ahị baba nyọka ba ẹla ọlẹ ká ogu nya Ohe kaa mẹjẹẹhị jẹ wẹwẹ, ahị ka hwahị myị́ wẹẹ. (Wa iJemsi 5:19.) Ọ ka há Olegu Onyobyi yẹẹyẹẹ kahị ka hwabwọ la ọ-dahịhile ịBayịbụụ lee ẹla ọlẹ ká ogu nya Ohe wẹẹ mẹjẹẹhị.—Efe. 4:14.
3. Ịyẹ tị́ du kahị baba nyọka ya ụbwọ chị ẹlịlẹhị gogo? (Ala Efesọsị 6:13, 14)
3 Wa Ala Efesọsị 6:13, 14. Lụka o-kpii Ohe Onyobyi ka kpa ẹla ọ-pyịrị angịnyị ju ọhẹ kpehe nyọka hụ ala ẹpwụma wuu ahị du kị ka ya ẹkpẹ chị awụlẹ jahị da iJihova. (Ọwụ. 16:13, 14) Ahị ka jẹ́-ẹ ya ahị guru nyori Olegu Onyobyi ka maga gụ́ olene nyọka hụ angịnyị nya iJihova ahị ịnyịnyị. (Ọwụ. 12:9) Chajị nya ọọwa lẹ, ọ baba kahị ka mẹ ang jẹ ịlọhị nyọka jẹ́ ọdatị nya ẹlịlẹhị bala ọnọọkịla, bala ọ-ka ju ihi nya ẹlẹ ọlẹ kọ ri ịnyịlẹhị. (Rom. 6:17; 1 Pit. 1:22) Ọchịda nyahị lụka nya akama ọtụka okpelego ka kpụnịrọ ẹlẹwẹ!
4. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?
4 Ẹ-ẹpwụ nya ang ọjẹ́jẹ ọlẹ, ahị ka yẹ abwẹla imiiye ịlẹ kahị baba nyọka la chajị kahị ka jẹ́-ẹ jẹ́ ẹlịlẹhị ọlẹ kọ ji ẹwpụ nya ịBayịbụụ bala ọ-ka myọnụ ju ụgbẹyị ọlẹ ká ogu nya Ohe wẹẹ mẹjẹẹhị. Ọọwa lẹ ahị ka ya ẹla u-uhye nya ang ịta ịlẹ kahị ka họ nyọka jẹ́-ẹ ya ụbwọ chị ẹlịlẹhị gogo lẹlẹ.
ABWẸLA ỊLẸ KAHỊ BABA NYỌKA JẸ́-Ẹ JẸ́ ẸLỊLẸHỊ
5. Ányị uhi nya iJihova ojuju à tị́ ka dahị ụbwọ nyọka jẹ́ ẹlịlẹhị datị?
5 Uhi nya iJihova o-juju. Ọ-ka ju uhi nya iJihova ụ-ụgbẹyị ọlẹ kọ pwoku ri ọ-ka la ọháha ẹ-ẹga nyamwụ gbee kahị ka myị-ị̀ họ ịngịngịhyẹ ọlẹ kọ ka wọọ ẹjẹ ka. Ọ kaa chịhị kpakpa nyọka jẹ́ ọdatị nya ang ọnyịịla bala ọtịpyọ, bala ọdatị nya ẹlịlẹhị bala ọnọọkịla, chajị ká ẹla nyahị ka kpụ iJihova ịpyọ. (Etu 2:3-6; Hib. 5:14) Áhị ka ya iwe da uhi nya ọngịnyị ehe ojuju ka la ọngịrị gụ́ ọháha ọlẹ kahị la ẹ-ẹga nya iJihova ẹnẹnẹhẹ ka, chajị ang ọlẹ kọ há angịnyị ehe kaa wụ iJihova ẹjẹ.
6. Ányị angị iwo nya ala Isirẹlụ à tị́ ká pyị ẹlịlẹhị anyoko ọọlajị nya uhi ojuju nya angịnyị ehe?
6 Kori kahị ju uhi nya angịnyị ehe gụ́ Ohe aalẹ, ị ka hụhị ahị hi ẹlịlẹhị myị́. Kụ ẹhị yẹ oja nya angị 12 ịlẹ kị du ẹrụ ka wụla ọpyị ọlẹ ká iJihova myọnụ nyọka ya ha ala Isirẹlụ yẹ wẹẹ. Angị iwo lẹpwụ nyaa ju uhi nya ala iKenan gụ́ ọháha ọlẹ kị la ẹ-ẹga nya iJihova. Ị byi ala Isirẹlụ aanaa yẹkẹẹ: “Áhị lọngịrị nyọka mwẹla ta alụwa myị koo! Ị lọngịrị gụụhị.” (Ọwa. 13:27-31) Ẹ-ẹhị nya ọngịnyị lẹ, ala iKenan la ọngịrị gụ́ ala Isirẹlụ—ọọwa tị ri ịnyịlẹhị. Ma ọngọnyị kọ ya nyori ala Isirẹlụ nyị́ ka kụrụ ala iKenan myị́ ka aalẹ, ọngọọwa deeri nya iJihova. Alibaje angị iwo ịwẹ ịnọ baba kị ka ya ẹhị rịrị u-uhye nya ẹla ọlẹ ká iJihova tịtọ ká ala Isirẹlụ ka họ. Ịnọ ị ka kụ irya nya ẹla ọlẹ ká iJihova họ haa lụka ọkẹkpẹ wẹ kpangjẹ. Ọọwa ịnọ ị ka jẹ́ nyori ọngịrị nya ala iKenan nyị́ ri ịngịngịhyẹ a-ahị nya ịnya iJihova, kọ la ọngịrị gụgụ wuu, ka lẹlẹ. IJochuwa bala ịKalẹbụ tị datị hi angị la ọmyịmyị ka ịwẹ, chajị ịwa tịtọ nyọka họ ẹla kpụ iJihova ịpyọ. Ị byi alụma yẹkẹẹ: “Ó-ri ká ẹla nyahị á kpụ [iJihova] ịpyọ aalẹ, ọ ka kpahị kele kọ ka hwoo hahị.”—Ọwa. 14:6-9.
7. Ányị ahị tị́ ka họ kahị ka jẹ́-ẹ ju uhi nya iJihova gụ́ ọọwa? (Yẹ ifoto ịnyịnyị.)
7 Nyọka jẹ́-ẹ ju uhi nya iJihova gụ́ ọọwa, ahị baba nyọka kụ irya u-uhye nya ẹla ọlẹ kọ ka kpọọ ịpyọ ụka myị́ ụka kahị ja chị eje nya ẹla. (Eje. 16:8) Ụka ká wa ịBayịbụụ, tọ ịlọng wo nyori, ‘Kori ó rim am kam juwa ẹ-ẹpwụ nya iwe-ahụrụ ọwẹ, ányị m tị́ ka cheje ọwẹ?’ Ọ-chụ pwokwita, yẹ ịlọng ká juwa ẹ-ẹpwụ nya ala Isirẹlụ ká juwa wo ụka ọlẹ ká angị iwo nya angịlẹ kị du ẹrụ wẹẹ ya nyori ala Isirẹlụ nyị́ ja kụrụ ala iKenan myị́ ka wẹẹ. À ka myị ju ẹla ọlẹ kị ya kpụ a ka dọmwụ nyọka ju uhi nya ọngịnyị ehe, lee ọháha ọlẹ ká la ẹ-ẹga nya iJihova bala irya nyọka họ ẹla kpọọ ịpyọ tị́ ka kụrụ? Ẹpwụma nya ala Isirẹlụ lẹpwụ-lẹpwụ á myị ju ẹlịlẹhị ọlẹ ká iJochuwa bala ịKalẹbụ ya ka. Ọọwa du ká iwe nyọka juka Ọpyị Ọmyọnụ Ha nyaa.—Ọwa. 14:10, 22, 23.
Owo a tị́ ka myị ju? (Yẹ ọgba 7)
8. Abwẹla oyina ahị tị́ ka maga nyọka la gụ́ ọọwa? Ịyẹ tị́ du?
8 Ịlọng ọ-kpa keji. Angịlẹ kị kpa ịlaa keji iJihova à kaa wụla ẹlịlẹhị je lẹ. (Mat. 11:25) Ahị ka kpa ịlọhị keji myọnụ nya ụbwọ ọdada nyọka jẹ́ ẹlịlẹhị. (Ụkụr. 8:30, 31) Ma, ahị tị ka dụmwọ-dụmwọ kahị ka hu ịlọhị gẹdẹẹ ka. Ịlọhị ọ-hu gẹdẹẹ ka du kahị ka kụ irya nyori ẹla ọjẹ́jẹ nyahị nyị la kpakpa lala itiwe nya ehile ịla Ụpwụ Ịgọgọ bala ẹla ọlẹ ká ogu nya iJihova wẹẹ mẹjẹẹhị.
9. Ányị ahị tị́ ka bwu kpa ịlọhị keji ka ịlahị-ịlahị?
9 Nyọka jẹ́-ẹ kpa ịlọhị keji kịnyaa, ahị baba nyọka kpịtịya nya abwọlẹ kahị byẹhị kaka ba a-ahị nya iJihova. (Eje. 8:3, 4) Ahị ka jẹ́-ẹ raabwọ ịnyịnyị ká iJihova ka dahị ụbwọ nyọka la olegu nya ịlọhị ọ-kpa keji bala ọ-myị ọmẹjẹ. IJihova ka dahị ụbwọ nyọka hu irya nyamwụ ọlẹ kọ kaa mẹjẹẹhị bwu ịBayịbụụ bala ogu nyamwụ kụ ịlahị nya ịnya ịlọhị. Ụka ká ja wa ịBayịbụụ, ya ẹhị reeji nya ang ẹjẹẹ ịlẹ kị mẹjẹ nyori ịlọhị ọ-kpa keji há iJihova, ẹhịịchịrị, ọngịnyị o-hu ịlọmwụ gẹdẹẹ, bala egbeju ọngịrị ọlala tị wọọ ẹjẹ. Kori ká tị la iwe-ahụrụ ọlẹ ká ọngịrị á bọọ ẹ-ẹgọ lee ká kaa kụ ịlahị nya angịkịla aalẹ, à ka maga ká ka kpa ịlọng keji yẹẹyẹẹ.
ABWỌLẸ KAHỊ KA BWU YA ỤBWỌ CHỊ ẸLỊLẸHỊ GOGO
10. Owo anyị iJihova à tị́ kaa kpa mẹ ẹla bala ụgbẹyị jẹ angịnyị nyamwụ lẹ?
10 Dahịhile ẹla ọlẹ ká ogu nya iJihova wẹẹ mẹjẹẹhị. Lụka nya ala Isirẹlụ inyogo, iJihova kaa ya ẹla je angịnyị nyamwụ bwula iMosisi ene kọọ hi ta iJochuwa. (Joch. 1:16, 17) Ala Isirẹlụ kaa yé ahị ọwawa ụka kị yẹ angịwẹ lala angịlẹ kị ku ọmwakpa nya iJihova Ohe Oluhye. Ẹka ohu ịmanyị tị́ ku ẹkpẹ nya ọọwa ká ọjịra-jịra nya angịnyị nya ịKịrayịsị wẹ ka yeji họhẹ-họhẹ, alẹrụ angị 12 à kaa kpa ịlahị lẹ. (Ụkụr. 8:14, 15) Nyọlẹ kọ nọ chẹẹ, angịgbahị ịkịla ịlẹ kị juwa i-iJerusalẹm julaa ịnyịnyị. Nyọlẹ kị kaa kpa ẹla ọlẹ ká angịwẹ mẹjẹ họ ụkụrwọ wẹẹ, “angịnyị nya Ohe Oluhye . . . ịlụwa wuu, a juwa la ọngịrị gụ olene-ene ẹ-ẹpwụ nya ọmyịmyị ọlala nyaa lẹlẹ. Angịnyị nya Ohe Oluhye . . . ịlụwa juwa chị anyị da ịlaa ẹ-ẹpwụ nya iru ojuju kịlahị-ịlahị ẹnẹnẹẹnụ ịnyịnyịịnyị.” (Ụkụr. 16:4, 5) Lụka nyahị ọlẹ, ahị ịnyịnyị kaa yé ahị ọwawa kori kahị ba ẹla ọlẹ ká ogu nya iJihova wẹẹ mẹjẹẹhị jẹ. Ma ányị ọ tị kaa la iJihova kori kahị nyẹẹkpẹ da angịlẹ kọ chụ nyọka kpahị ụgbẹyị? Ahị ka wẹ ịtọ ẹla ọwẹ bwula ọ-kụ ẹhị yẹ ẹla ọlẹ kọ họ ụka ká ala Isirẹlụ wẹẹ jẹ ka Ọpyị Ọmyọnụ Ha.
11. Ịyẹ à tị́ họ ta angịlẹ kị la egbeju ọngịrị ta iMosisi ọngọlẹ ká iJihova chụ nyọka kpa angịnyị nyamwụ ụgbẹyị? (Yẹ ifoto ịnyịnyị.)
11 Ụka ọhẹ nyọlẹ ká ala Isirẹlụ wẹẹ jẹ ka Ọpyị Ọmyọnụ Ha, alẹng ịhyẹ ịlẹ kị la gbẹgbịlẹ dọmwụ nyọka chị iMosisi ọnụ bala ụkụrwọ ọlẹ ká iJihova ya jwọọ ụbwọ. Ị yẹkẹẹ: “Ánụ jẹ ká ọng myị ọng nyahị ahị ala Isirẹlụ wuu ri angị ịlịgọgọ nya [iJihova] ịnyịnyị ka-á? [IJihova] jam tahị ịnyịnyị.” (Ọwa. 16:1-3) Ịlẹhị lẹ “ala Isirẹlụ wuu” la ịgọgọ a-ahị nya Ohe ịnyịlẹhị, iJihova à tị chụ iMosisi nyọka kpa ịlahị ẹ-ẹpwụ nya angịnyị Nyamwụ lẹ. (Ọwa. 16:28) Bwula ọ-kpụ iMosisi abyị, iJihova angị la egbeju ọngịrị ịwẹ à wẹẹ kpụ abyị ịnyịnyị lẹ. Ị́ ya ẹhị rịrị u-uhye nya ẹla ọlẹ ká iJihova tịtọ ka; ị ya ẹhị rịrị u-uhye nya ang ọlẹ ká ịwa tịtọ, kọ ri ọ-ka la ọngịrị bala angịnyị ọ-ka jáa gụ́ ọọwa. Ohe nwụ angịlẹ kị kpa ịlahị nya egbeju ọngịrị ọlala ọwẹ, tụ́ angịlẹ kị myị jwaa ịnyịnyị. (Ọwa. 16:30-35, 41, 49) Ahị jẹ́ myị̀myị̀ nyori iJihova á kaa myị ju angịlẹ kị la egbeju ọngịrị ta ẹla ọlẹ ká ogu nyamwụ wẹẹ mẹjẹ alẹ ka.
Owo a tị́ ka chẹkpẹ ju? (Yẹ ọgba 11)
12. Ịyẹ tị́ du kahị ka jẹ́-ẹ dahịhile ogu nya iJihova kịnyaa?
12 Ahị ka jẹ́-ẹ dahịhile ogu nya iJihova kịnyaa. Ụka kọ la gede-gede nyori ọbaba nya ọ-nwụhọ ji u-uhye nya abwọlẹ kahị kaa wo etu nya ẹlẹhẹ bwu ịBayịbụụ lee ụgbẹyị ọlẹ kahị kaa bwu họ ụkụrwọ nya Ohe, angịlẹ kị wẹẹ kpa ịlahị á kaa họ atịmẹ nyọka nwụ ang họ ka. (Etu 4:18) Ị kaa họ ịnyị chajị nyori, ị tịtọ nyọka họ ẹla kpụ iJihova ịpyọ gụ́ ẹla ọkịla ọhẹ-lọhẹ. Ị kaa maga da ịlaa nyọka cheje nya ẹla kpụnịrọ Omyi Ẹla nya Ohe, kọ ka ri ang ọ-yẹ kpa họ ha anchẹ nya iJihova wuu.
13. Ịyẹ à tị́ ri “ẹla nya ịlẹhị . . . ọ-yẹ kpa họ”? Ịyẹ ahị tị́ ka họ lọọ pyii?
13 ‘Ya ụbwọ chị ẹla nya ịlẹhị ọlẹ kọ ri ang ọ-yẹ kpa họ gogo.’ (2 Tim. 1:13) “Ẹla nya ịlẹhị . . . ọ-yẹ kpa họ” ọọwa ri ang ọmẹjẹ nya Angịnyị nya ịKịrayịsị ọlẹ kọ juwa ẹ-ẹpwụ nya ịBayịbụụ. (Jọn. 17:17) Ang myị́ ang ọlẹ kahị myị la kaa kpụnịrọ ẹla ọmẹjẹ ọlịnyị wuu. Ogu nya iJihova mẹjẹẹhị kahị ka ya ụbwọ chị ẹla ọ-yẹ kpa họ ọọwa gogo lẹ. Kori kahị hwabwọ la ọ-họ ịnyị ka aalẹ, ahị ka yé ahị ọwawa.
14. Ịyẹ tị́ du ká Angịnyị nya ịKịrayịsị ịhyẹ hwabwọ la ọ-ya ụbwọ chị “ẹla nya ịlẹhị . . . ọ-yẹ kpa họ” gogo?
14 Ịyẹ à tị́ ka họ myị́ kori kahị yẹ kpata hi “ẹla nya ịlẹhị . . . ọ-yẹ kpa họ” ọwẹ? Yẹ ọ-chụ pwokwita lẹẹ. Lụka nya oyi ọhọhẹ, oja ọhẹ dọmwụ nyọka pyẹ ẹ-ẹpwụ nya Angịnyị nya ịKịrayịsị nyori ahyẹẹnụ nya iJihova nyị pweeji lẹ. Ọ chịkpẹẹ myị́ ká ileta ọhẹ—ọlẹ ká angịnyị me nyori ọlẹrụ ịPọlụ à dọọ lẹ—à ya ẹla ọọwa. Angịnyị nya ịKịrayịsị ịla ịTẹsalonika myị ju oja ọọwa la ọ-maga nyọka jẹ́ ọkpẹẹ-kpẹẹ nyamwụ ene ka, ọọwa ị dọmwụ nyọka kpa pyẹ ịnyịnyị lẹlẹ. Kori kị kpịtịya nya ẹla ọlẹ ká ịPọlụ mẹjaa ụka kọ juwa balaa ịnọ, ị́ ka pyịraa ju myị́ ka. (2 Tẹs. 2:1-5) ỊPọlụ gbile aanamwụ ụbwọ ụ-ụrụ nyọka myị ju ẹla ọnyị myị́ ọnyị kị wo ka. Nyọka myịmyị-ị̀ daa ụbwọ ị-ịlahị, ịPọlụ chị ileta oheeye ọlẹ kọ da kịla ala ịTẹsalonika eju la omyi ẹla ịlẹ: “Am ịPọlụ ayịdang a lẹẹ kpa ụbwọ nya ịlọm da ọnụ ọdachị ọlẹ du wanụ lẹ. Ọlẹ a tị ri ụgbẹyị ọlẹ kam kaa bwu kpa yụbwọ ju ileta ọnyị myị ọnyị ọlẹ kam kaa da ẹ-ẹpwụ du kịla angịnyị nyam wuu lẹlẹ.”—2 Tẹs. 3:17.
15. Ányị ahị tị́ ka bwu chewu ke ịlọhị hi ịnịịkịla ịlẹ kị kaa me ẹlịlẹhị? Ọ-chụ pwokwita oyina à tị́ ji? (Yẹ ifoto ịnyịnyị.)
15 Ẹlịyẹ ahị tị́ ka jẹ́ bwu ẹla nya ịPọlụ ọlẹ kọ da kịla ala ịTẹsalonika wẹ? Ụka kahị wo ẹla ọlẹ kọ pwoku ẹla ọlẹ kahị jẹ́ bwu ịBayịbụụ ka lee ụka kahị wo oja ọlẹ kọ gbuhị ịnyịrọ wọọ, ahị ka kpa ẹla ọjẹ́jẹ nyahị họ ụkụrwọ. Lụka nya Soviet Union onyogo, aluji nyahị ya ileta ọhẹ ha aanahị ọlẹ kọ lala o-ri nyị bwu egbeju ẹpwa nyahị ọla odehe wuu. Ileta ọọwa ju aanahị ịhyẹ ọhụ nyọka chebwo kaka ri ogu ọdatị ọlẹ kọ ka họ ang ọlẹ kọ háa myị lẹ. Ileta ọọwa la ịlọmwụ me ẹlịlẹhị. Ma ileta ọọwa á pyịrị aanahị ịlẹ kị godayị giri-giri ju myị́ ka. Ị jẹ́ nyori ẹla ọla ileta ọọwa nyị́ pwoku ẹla ọlẹ kị kaa mẹjáa ene-ene ka. Alẹ, aluji nya ẹlịlẹhị kaa kpa ang-abwọ nya ichene maga nyọka hụhị ahị bala ọ-chịhị ebwo. Ọkọkọ kahị ka myị ká ‘ọkịlẹtụ nyahị ka juwa hụ́ jigi-jigi,’ ahị ka chewu ke ịlọhị bwula ọ-kụ irya ju ẹla ọlẹ kahị wo lee kahị wa, nyọka jẹ́ kori ká ẹla ọọwa á pwoku ẹlịlẹhị ọlẹ kahị jẹ́ ene lẹ.—2 Tẹs. 2:2; 1 Jọn. 4:1.
A myị ká ịnịịlịla ịlẹ kị me ẹlịlẹhị a pyịrịng ju ka (Yẹ ọgba 15) a
16. Jaabwọ ká ụpwụ nya Ala iRom 16:17, 18 ya, ịyẹ ahị tị́ ka họ kori ká angịhyẹ á ji ẹkpẹ da ẹlịlẹhị?
16 Kịnyaa la ọ-yẹ jula angịlẹ kị godayị giri-giri ha iJihova. Ohe tịtọ kahị ka yẹ jula awụlẹ ẹ-ẹpwụ nya ịgba ọgbagba nyahị. Kori kahị ya ụbwọ chị ẹlịlẹhị gogo aalẹ, ahị ka jẹ́-ẹ yẹ jula awụlẹ pyịyọọ. Ọngọnyị kọ ji kpata hi ẹlịlẹhị kaa kpa ebwo ọchịchị wẹ ọjịra-jịra, lẹ Ohe dahị ọna nyori ahị nyị ‘chị ịlọhị ebwo hyaa.’ Kori kahị họ ịnyị ka, ahị la ịlọhị ka dọmwụ nyọka gbile ẹta ẹkpẹ hi ẹlịlẹhị myị́.—Wa Ala iRom 16:17, 18.
17. Apyobwuna iyina ahị tị́ ka yẹ́ kori kahị jẹ́ ẹlịlẹhị datị kahị tị ya ụbwọ chọọ gogo?
17 Ụka kahị jẹ́ ẹlịlẹhị datị kahị tị ya ụbwọ chọọ gogo, ahị kaa ju iJihova chwẹẹ, ọmyịmyị nyahị tị ka la ọngịrị ịnyịnyị. (Efe. 4:15, 16) Ịnịịkịla bala oja ị-kpa pyẹ nya Oledu Onyobyi á ka pyịrịhị ju myị́ ka, iJihova tị ka chewu keehi lụka nya akama ọtụka okpelego ịnyịnyị. Kịnyaa la ọ-ya ụbwọ chị ẹlịlẹhị gogo mẹ, aalẹ ‘Ohe Oluhye nya okpunyi ka juwa tang lẹ.’—Filip. 4:8, 9.
EJE 122 Be Steadfast, Immovable!
a ABWỌ ỌCHỊCHỊ NYA IFOTO: Ọ-họ mẹjẹ nya abwọlẹ ká aanahị ịla Soviet Union gbalẹ ye ileta ọlẹ kọ lala o-ri nyị bwu egbeju ẹpwa ma kọ tị bwu ẹga nya aluji nyahị. Lụka nyahị ọlẹ, aluji nyahị ka kpa ẹla ọlẹ kọ ka hụ angịnyị ahị u-uhye nya ogu nya iJihova pyẹ ẹ-ẹpwụ nya intanẹtị myị́.
