1-2. (a) Ọna nya ẹlịyẹ iJisọsị à tị́ da angịjụgbẹyị nyamwụ? (b) Ịyẹ tị́ du ká angịjụgbẹyị nya iJisọsị nyẹẹkpẹ dọọ? (Yẹ ifoto ịnyịnyị.)

 “OLEGU ọlẹpwụ nyanụ lẹ, ọ la ila ọchịchị lụmẹ juwa le! Ma, ugbinyịrọ tị la dẹwụ-dẹwụ.” a (Mat. 26:41) Bwula ọmyi ẹla ịwẹ, iJisọsị mẹjẹ nyori ọ jẹ́ jaabwọ ká iwe-ahụrụ nya ọkpẹẹkpẹẹ ọlala-ka nyahị la. Ma ụbwọ ọ-gbile ụ-ụrụ ji ẹpwụ nya omyi ẹla nyamwụ ịnyịnyị: Ahị dahịhile ịlọhị kpoye ka. Ẹ-ẹpwụ nya awa ịmanyị-ịmanyị ene ká iJisọsị ya ẹlẹwẹ, angịjụgbẹyị nyamwụ dahịhile ịlaa gbee kịị ya nyori ịwa nyị́ ka nyẹẹkpẹ da iJisọsị ẹnẹnẹhẹ ka. (Mat. 26:35) Irya ọnyịịla ị la wẹ lẹ. Ma, ị́ jẹ́ abwọ nyị ka chaa pyẹpyẹ i-ijata ẹ-ẹpwụ nya akama ka. Lẹ, iJisọsị gbilaa ụbwọ ụ-ụrụ yẹkẹẹ: “Anụ juwa gbeji giri-giri, kanụ juwa raabwọ ha Ohe Oluhye ọgwọgụ ịnyịnyị, chajị kanụ ka chabwọ ju ka ẹpwụ nya ọmayẹ nya ang onyobyi ọhọhọ kaka mẹ.”—Mat. 26:41.

² Ọ tolujwo nyori angịjụgbẹyị ịwẹ á gbeji giri-giri jaabwọ ká iJisọsị ya ka. Ụka ká angịnyị wẹ ka wu iJisọsị, ị dayị bala iJisọsị lee ị tị́ ju uhi rụnyẹ rụ? Nyọlẹ ká angịjụgbẹyị ịwẹ á gbeji giri-giri ka wẹẹ, ị họ ẹla ọlẹ kpangga kị ya ịwa nyị́ ka họ ẹnẹnẹhẹ ka—ị nyẹẹkpẹ da iJisọsị.—Mat. 26:56.

3. (a) Kori kahị ka jẹ́-ẹ godayị giri-giri ha iJihova, ịyẹ tị́ du kahị ka dahịhile ịlọhị kpoye ka? (b) Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

³ Ahị dahịhile ịlọhị nyori ahị ka la ọngịrị ụka myị́ ụka ẹnẹnẹhẹ ka. Ịlẹhị lẹ, ahị kaa cheje ká ịngịngịhyẹ ka jihi kpata hi iJihova ka. Ma, nyọlẹ kahị la kpẹẹkpẹẹ ka wẹẹ, ọ chịkpẹẹ nyori  ọmayẹ nya ang ọtịpyọ ọhọhọ ka wẹ ẹga nyahị myị́. (Rom. 5:12; 7:21-23) Lụka ọ-ya ahị me ka, ahị kaa yẹ ịlọhị ẹ-ẹpwụ nya iwe-ahụrụ ọlẹ ká ang ọtịpyọ kaa me ang ọnyịịla. Nyọka jẹ́-ẹ godayị giri-giri ha iJihova bala Ọnyị nyamwụ, ahị baba nyọka họ jaabwọ ká iJisọsị ya ahị nyị gbeji giri-giri ẹ-ẹga nya ọmayẹ nyọka họ ọhọbịrị. Ang ọjẹ́jẹ ọlẹ ka dahị ụbwọ nyọka họ ịnyị. Họhẹ, ahị ka kụ ẹhị yẹ iwe-ahụrụ ịlẹ kahị baba nyọka gbe ịlọhị gụgụụgụ. Ọọwa lẹ, ahị ka ya ẹla u-uhye nya abwọlẹ kahị ka bwu gbe ịlọhị hi ịmayẹ lẹlẹ. Ohyẹẹkpẹ, ahị ka kụ ẹhị yẹ abwọlẹ kahị ka bwu gbe ịlọhị kịnyaa.

JẸ́ ANG ỊLẸ KỊ RI ỌDẸWỤ-DẸWỤ NYANG

4-5. Ịyẹ tị́ du kahị ka gbe ịlọhị bwu ẹpwụ nya ịhọbịrị ichiche?

⁴ Ịhọbịrị ịhyẹ la pyịnyẹng gụ́ ịkịla, ma ị tị ka jẹ́-ẹ bịrị igu oriri nyahị bala iJihova. Ị ka kpahị kaka họ ịhọbịrị ịlẹ kị tịpyọ gụ́ ịnyịnyị myị́.

⁵ Ahị wuu kaa la ọmayẹ nyọka họ ịhọbịrị. Ma ọngọngọọng nyahị tị la ang ọlẹ kọ ri ọdẹwụ-dẹwụ nyamwụ. Ọ ka ri ọhọbịrị ọtụka ọhọhọ myị́, ọ ka ri abwẹla ọ-chịrị ụma ịhyẹ, lee ọ-ka họ ẹla ba irya nya alodehe jẹ myị́. Ọ-chụ pwokwita, ọngọhẹ ka la ọmayẹ nyọka họ ụya myị́. Ọngọkịla tị ka la ọmayẹ nya abwẹla ị-chịrị, lala ọngịnyị ọ-kpa ụbwọ gu lee arụrụ nya angị ji lọhị-lọhị ọ-yẹyẹ myị́. Ọngọkịla tị ka la akama nya uhi nya ọngịnyị ehe ojuju, ịlọmwụ o-hu gẹdẹẹ, agbama ojuju i-ijata, lee ẹla ọkịla myị́. Ịnyị à du lẹ ká iJemsi yẹkẹẹ: “Ọmayẹ ọnyị myị ọnyị wuu kaa wẹ chị ọngịnyị ehe ọgụ bwula imyi nya ang onyobyi ọhọhọ ọlẹpwụ ọkịlẹtụ nyamwụ.”—Jem. 1:14.

6. Ẹlịlẹhị oyina ahị tị́ ka ya je ịlọhị?

⁶ Ahụ jẹ́ ang ọlẹ kọ kaa ri ọmayẹ nyang gụ́ wuu? Ọ ka tịpyọ kori kahị da ịlọhị lụgbaa nyori áhị la ọdẹwụ-dẹwụ ọhẹ ka lee o-ya nyori ahị la ọngịrị kpoye nyọka chabwọ kpẹpwụ nya ang ọtịpyọ. (1 Jọn. 1:8) Kpịtịya, ịPọlụ ya nyori angịlẹ kị dọmwụ ri angị juwa “họ irya nya Olegu ịgọgọ nya Ohe Oluhye yẹẹyẹẹ” nyị ka kpẹpwụ nya ọhọbịrị myị́ kori kị gbeji giri-giri ka. (Gal. 6:1) Ahị baba nyọka ya ẹlịlẹhị je ịlọhị kahị ka jẹ́ ẹga ọlẹ kahị la ọngịrị nwà ka.—2 Kọr. 13:5.

7. Ịyẹ ahị tị́ baba nyọka gbe ịlọhị bwu ẹpwụ nyamwụ gụ́ wuu? Ọ-chụ pwokwita oyina à tị́ ji?

⁷ Ụka kahị jẹ́ ang ịlẹ kị ri ọdẹwụ-dẹwụ nyahị lẹ, ẹlịyẹ ahị tị́ ka họ mẹ? Maga ká ju ịlọng ọngịrị nyọka kụrụ ịmayẹ ịịwa! Nyọka chu pwokwita, lụka nya ịBayịbụụ ẹga ọlẹ kọ ri ọdẹwụ-dẹwụ nya ugulọ nya epweji wuu à ri ekpileku nyamwụ ẹẹ. Chajị nya ọọwa, ukpileku à ri ẹga ọlẹ kị kaa gbe gụ́ wuu ẹẹ. Ụ-ụgbẹyị  ọlịnyị-ịnyị, ahị baba nyọka gbe ịlọhị gụ́ ẹ-ẹga nya ang ịlẹ kahị jẹ́ nyori ị ri ọdẹwụ-dẹwụ nyahị.—1 Kọr. 9:27.

ABWỌLẸ KAHỊ KA BWU GBE ỊLỌHỊ

8-9. Ịyẹ okolobya ọlẹ kị chabwọ ụ-ụpwụ nya Etu egbeju 7 à tị́ ka họ ịnọ nyọka jẹ́-ẹ cheji ba hi ọhọbịrị ọtụka? (Etu 7:8, 9, 13, 14, 21)

⁸ Ányị ahị tị́ ka bwu gbe ịlọhị? Kụ ẹhị ya ẹla ọlẹ kahị ka jẹ́ bwu ẹga nya okolobya ọlẹ kị ya ẹla rụ ụ-ụpwụ nya Etu egbeju 7 wẹẹ. Ọ họ ụya ta ọnyang ọhẹ kọ ri ọlakpara. Ọgba 22 ya jehi nyori okolobya ọwẹ nyị dịrẹ ọnyang ọọwa “ahyaahị-ahyaahị,” lala o-ri ẹla ọọwa nyị họ kpịraka la ọ-ya ahị me ka. Ma jaabwọ ká ịgba ịlẹ kị jene nya ọwẹ ya, ọ hu ẹta-ẹdịyẹ ịhyẹ ene ká ọwẹ-ẹ̀ kpọọ dụmwọ-dụmwọ ka ẹwpụ nya ọhọbịrị.

⁹ Ịyẹ okolobya ọwẹ à tị́ họ du kọ kpọọ ju ka ẹpwụ nya ọhọbịrị ọwẹ? Ọhọhẹ, Ọ “jẹdịyẹ bwu opeje ọ-ba ẹpwa nya ọnyang ọlụchị ba” lewu-obyi. Ọọwa lẹ, ọ jẹdịyẹ ya ahị da ka ẹpwa nya ọnyang ọọwa lẹlẹ. (Wa Etu 7:8, 9.) Ba ọọwa ba, ụka kọ yẹ ọnyang ọwẹ, ọ́ ji kpata rụ hyoo ka. Ọkọkọ nya ọọwa, ọ myị nyọka jwoo ọnụ bala ọ-ke ụrụ ụka kọ wẹẹ ya ẹla nya iya ọlẹ kọ kịla, ọhẹka chajị ká okolobya ọwẹ ka yọọ lala ọngịnyị ọtịpyọ ka. (Wa Etu 7:13, 14, 21.) Kori ká okolobya ọwẹ á cheji ba hi ang ịlẹ kị kpọọ ju ka ẹwpụ nya ọhọbịrị ịnọ, ọ ka chewu ke ịlọmwụ bwu ẹpwụ nya ọmayẹ bala ọhọbịrị ọwẹ ayịdang.

10. Ẹta-ẹdịyẹ ịtịpyọ iyina ọngịnyị à tị́ ka hu kọ ka lala ịnya okolobya ọwẹ?

¹⁰ Oja ọlẹ ká iSolomọn da wẹ mẹ ang ọlẹ kọ ka họ ta ọnchẹ nya iJihova myị́ jẹ. Ọ ka ju ka ẹpwụ nya ọhọbịrị ọtụka-ọtụka juwa kụ irya nyori ang myị́ ang nyị họ “ahyaahị-ahyaahị” myị́. Lee ọ ka ya myị́ nyori, “Ọ họ la ọ-ya ahị me ka ịnyị.” Ma, kori kọ kụ irya ju ẹla ọlẹ kọ họ, ọ ka yẹ nyori ọ hu ẹta-ẹdịyẹ ịhyẹ kị pwoku ka ene kọ wẹẹ ju ka ẹpwụ nya ọhọbịrị. Ẹta-ẹdịyẹ ịịwa ka ri ogu ọtịpyọ, ụya ọyaya ịlẹ kị pwoku ka, lee ọ-kaa ka ẹga ọlẹ kọ há ha ọngịbyị nya ịKịrayịsị ka—a-achịng lee ẹ-ẹpwụ nya intanẹtị. Ọhẹka ọ dọmwụ hwabwọ la abwọ ọrịrị, ịBayịbụụ ọwawa, ọjịra-jịra ọ-kaka, lee ẹrụ ọnyịịla ọ-kpa pyẹ lẹ. Lala okolobya ọlẹ kị ya ẹla rụ ụ-ụpwụ nya Etu, ọhẹka ịhọbịrị nyamwụ á ka ri ẹla ọ-gụ ọngịnyị họ “ahyaahị-ahyaahị” kpịraka ka myị́.

11. Ịyẹ ahị tị́ ka yẹ abwọ hi chajị kahị ka họ ọhọbịrị ka?

¹¹ Oja ọwẹ tị́ mẹ ẹlịyẹ jẹ́ẹhị? Ọ́-ọhọbịrị kem ahị ka cheji ba hi ka, ahị ka cheji ba hi ẹta-ẹdịyẹ ịlẹ kị kaa kpa ọngịnyị juka ẹpwụ nya ọhọbịrị ịnyịnyị. ISolomọn họ ká ẹlẹwẹ la gede-gede ụka kọ ja oja nya okolobya bala ọnyang ọlakpara ọwẹ kpá. O juhi irya yẹkẹẹ: “Ānụ jẹ ọgụ nyamwụ koo.” (Etu 7:25) Ọ dọmwụ myị́myị́ ya ẹla nya ọnyang ọlịnyị yẹkẹẹ: “Anụ cheji ba hwẹẹẹ hi ụma nya ọnyang ọlịịwẹ, ānụ tụ ju ọnang nyamwụ chwẹẹ koo.” (Etu 5:3, 8) Ee, ahị ka gbe ịlọhị bwu ẹpwụ nya ịhọbịrị bwula ọ-chejiba hwẹẹẹ hi iwe-ahụrụ ọhẹ-lọhẹ ọlẹ kọ ka kpahị ju ka ẹpwụ nyamwụ. b Ọọwa ri ang ịlẹ kị dọmwụ tịpyọ ha ọngịnyị nya ịKịrayịsị ka wẹwẹ, ahị ka chebwo hyaa kori kahị jẹ́ nyori ị ka kpa ọmayẹ wahị bala ọ-kpahị ju ka ẹpwụ nya ọhọbịrị.—Mat. 5:29, 30.

12. Eje nya ẹlịyẹ iJobu à tị́ chị? Ányị ọọwa à tị́ ka dọọ ụbwọ gbe ịlọmwụ hi ọmayẹ? (IJobu 31:1)

¹² Nyọka jẹ́-ẹ cheji ba hi iwe-ahụrụ ịlẹ kị kaa kpa ọngịnyị ju ka ọhọbịrị, ahị baba nyọka cheje la ọngịrị-ọngịrị. Ịnyị iJobu à họ lẹ. Ọ ‘da ịlọmwụ ọnụ nya ịlẹhị-ịlẹhị,’ nyọka kpa ẹhị yẹ ọnyang ọlẹ kọ ri ahụ nyamwụ ka la irya  nya ụya ẹnẹnẹhẹ ka. (Wa iJobu 31:1.) Ọ-họ ẹla ọlẹ kọ cheje wẹ ka dọọ ụbwọ nyọka ji lụrụ hi ụya ọhọhọ. Ahị ịnyịnyị ka jẹ́-ẹ cheje nyọka cheji ba hi ịngịngịhyẹ ọlẹ kọ ka kpahị ju ka ẹpwụ nya ọmayẹ myị́.

13. Ịyẹ tị́ du kahị ka kpahị ju irya ọlẹ kahị kaa kụ? (Yẹ ifoto ịnyịnyị.)

¹³ Ahị ka gbe irya ọkụkụ nyahị ịnyịnyị pyii. (Ehe. 20:17) Angịhyẹ kaa ya nyori ọngịnyị ọ-kụ irya nya ang ọtịpyọ kem kị nyị́ hwọọ họ ka nyị́ tịpyọ abwọhẹ ka. Ma irya ọlịnyị á tị la kpakpa ka. Irya ọ-kụ ju ang ọtịpyọ gbee kaa du ká ọngịnyị ka hu ẹla ọọwa họ. Ọ lala o-ri ọ wẹẹ kpa ọmayẹ wẹ ịlọmwụ, ọ tị ka lujwo họọ nyọka kụrụ myị́. Ịlẹhị lẹ, irya ịtịpyọ kaa wẹ ẹpwụ nyahị ụka ọhẹ. Ang ọlẹ kahị baba nyọka họ ụka ọlịnyị ri ọ-ka gbaa daarụ i-ijata bala ọ-ka kpa irya ka ẹga nya ang ịlẹ kị ri ịnyịịla. Ụka kahị họ ịnyị, ahị kaa chewu ke ịlọhị bwu ẹpwụ nya ọhọbịrị ọtụka ọhọhọ, chajị áhị ya iwe da irya ọtịpyọ ka yẹ ka ri ẹla ọ-baahị ahị ọlẹ kọ ka lujwo la ọ-ma uya ta ka.—Filip. 4:8; Kol. 3:2; Jem. 1:13-15.

14. Ang ọkịla oyina à tị́ ka dahị ụbwọ gbe ịlọhị bwu ẹpwụ nya ọmayẹ?

¹⁴ Ang ọkịla oyina ahị tị́ ka jẹ́-ẹ họ nyọka gbe ịlọhị hi ọmayẹ? Ahị baba nyọka jẹ́ myị̀myị̀ nyori ihi nya ehile nya iJihova ojuju kaa ju apyobwuna hahị ụka myị́ ụka. Ọ ka lujwo hahị ụka ọhẹ nyọka kụ irya bala ọ-yẹ ẹla ụ-ụgbẹyị ọlẹ kọ pwoku irya nya iJihova myị́. Ma kori kahị maga yẹẹyẹẹ nyọka họ ịnyị, ahị ka chị ọkẹkẹnị ọlam-ọlam.

15. Ányị ang ọnyịịla ọ-mama à tị́ ka dahị ụbwọ gbe ịlọhị bwu ẹpwụ nya ọmayẹ?

¹⁵ Ahị baba nyọka mama nya ang ịlẹ kị la kpakpa. Kori kahị ‘myị ká ang onyobyi ā wụụhụ ẹjẹ, ká ang ọnyịịla ā háahị,’ ahị ka jẹ́-ẹ cheje gụ́ ọọwa nyọka họ ang ọnyịịla bala ọ-yẹ abwọ hi iwe-ahụrụ ịlẹ kị ka kpahị ka họ ịhọbịrị. (Emọ. 5:15) Ang ọnyịịla ọ-mama ka dahị ụbwọ nyọka godayị giri-giri ụka kahị yẹ ịlọhị ẹ-ẹpwụ nya ọmayẹ ọlẹ kahị ya ahị me ka lee ịlẹ kahị jẹ́ hu abwọ la ọ-wẹ ẹga nyahị ka.

16. Ányị ọ-họ ang ịlẹ kị ka tụụhị ju iJihova chwẹẹ à tị́ ka dahị ụbwọ nyọka gbe ịlọhị kịnyaa? (Yẹ ifoto ịnyịnyị.)

¹⁶ Ányị ahị tị́ ka họ ká ang ọnyịịla à ka maahị  ma? Ahị ka jẹ́-ẹ họ ịnyị kori kahị kaa kpa ụka nyahị họ ang ọlẹ kọ ka ju ọháha ọlẹ kahị la ẹ-ẹga nya iJihova ọngịrị. Ụka kahị juwa ọọjịra-jịra lee ẹrụ ọnyịịla ọ-kpa pyẹ, áhị kaa la ọmayẹ nyọka họ ang ọtịpyọ ịnyị ka. Ọkọkọ nya ọọwa, ahị kaa yé ọngịrị nyọka jẹ́-ẹ họ ẹla kpụ iJihova ịpyọ gụ́ ọọwa. (Mat. 28:19, 20; Hib. 10:24, 25) Bwula ọ-wa Omyi Ẹla nya Ohe bala ọ-kụ irya jwoo, ahị kaa ju ọháha ọlẹ kahị la ẹ-ẹga nya ang ọnyịịla ọngịrị bala ọ-ka jẹ́-ẹ ba ang ọtịpyọ ẹtẹ gụ́ ọọwa. (Joch. 1:8; Eje. 1:2, 3; 119:97, 101) Kpịtịya, iJisọsị byi angịjụgbẹyị nyamwụ yẹkẹẹ: ‘Anụ juwa raabwọ ha Ohe Oluhye ọgwọgụ, chajị kanụ ka chabwọ ju ka ẹpwụ nya ọmayẹ nya ang onyobyi ọhọhọ kaka mẹ.’ (Mat. 26:41) Ụka kahị raabwọ ha Adahị ola epwoohe, ahị wẹẹ ya iwe da họọ kọ ka dahị ụbwọ, ọọwa tị kaa juhị ọngịrị nyọka cheje nyọka họ ẹla kpọọ ịpyọ.—Jem. 4:8.

KỊNYAA LA O-GBEJI

17. Ọdẹwụ-dẹwụ oyina iPita à tị́ la kọ chehe gụ́ ụka ookpokpo?

¹⁷ Ọhẹka ọ ka chịkpẹẹ ahị ka kụrụ ọdẹwụ-dẹwụ nyahị ịhyẹ myị́. Ma ahị tị ka yẹ nyori ịkịla á kaa rụ hyaa ka. Kụ ẹhị yẹ oja nya ọlẹrụ iPita wẹẹ. O juhi nya ọngịnyị ehe du ko pwa iJisọsị arwarụ ugbabwọ ịta. (Mat. 26:69-75) Ọ lala o-ri nyị kụrụ uhi ọwẹ myị́ lẹ ụka kọ ya ẹla nya Ohe la ugbodu ojuju a-ahị nya “alọjịra-jịra nya ịkọtụ ọgbahị” nya ala iJuu. (Ụkụr. 5:27-29) Ma, ẹka ịmanyị-ịmanyị ka ịlahị nya ọọwa, ọ hwabwọ la o-ju epwedii nya ang oriri ta ala iJentayịlị pwụ ụka ọhẹ chajị “ọ juwa juhi nya angịlẹ ká irya nyaa ri ọ-ka da ala iJentayịlị . . . ụwụwụ.” (Gal. 2:11, 12) Uhihi nya iPita à tịrẹkpẹ myị́myị́ wẹ ẹẹ. Ọhẹka ọ́ jẹ́ kụrwọọ gbang-gbang lẹka.

18. Ányị ang ịhyẹ ịlẹ kị ri ọdẹwụ-dẹwụ nyahị à tị́ kaa la ọngịrị kaka ba?

¹⁸ Ahị ka yẹ ịlọhị ẹ-ẹpwụ nya iwe-ahụrụ ọlịnyị myị́. Ányị ọ tị́ ka bwu lịnyị? Ọdẹwụ-dẹwụ nyahị ọlẹ kahị byi ịlọhị nyori ahị kụrụ lẹ ka tịrẹkpẹ nyọka mahị yẹ myị́. Ọ-chụ pwokwita, ọọnahị ọlẹng ọhẹ myị yẹkẹẹ: “M̀ hwabwọ la ọ-ka yẹ arụrụ nya ụya ẹ-ẹpwụ nya ẹka iwo gbẹgbịlẹ du kam byi ịlọm nyori m̀ kụrụ akama ọwẹ myị́ lẹ. Ma abwẹla ọwẹ lala iyo ọlẹ kọ nọnọ kem, ká iyo ịrụnyẹ ịkịla kaa wulọọ eji.” Ọ kpịpyọ nyori abwọ á chị ọọnahị  ọwẹ pyẹpyẹ ka. Ọ yẹ nyori ọ baba nyọka ma uya ẹnụ myị́ ẹnụ ta abwẹla ọtịpyọ ọwẹ—ọhẹka ọ dọmwụ ka ma uya ọwẹ ẹ-ẹpwụ nya ọhịhị nyamwụ wuu odehe ọtịpyọ ọlẹ. Bwula ụbwọ ọdada nya ahụ nyamwụ bala angịgbahị nya ọjịra-jịra, ọ jẹ́ cheje ọnyọọngịrị ọhẹ nyọka cheji ba hi arụrụ nya ụya ọyẹyẹ.

19. Ányị ahị tị́ ka họ u-uhye nya ọdẹwụ-dẹwụ nyahị ọlẹ kahị jụ kụrụ lẹka?

¹⁹ Ányị ahị tị́ ka họ ká ọdẹwụ-dẹwụ nyahị ọlẹ kahị kụrụ myị́ lẹka ka kpahị ka họ ọhọbịrị ka? Bwula ọ-họ ẹla ọlẹ ká iJisọsị ya u-uhye nya ọmayẹ. Ọ yẹkẹẹ: “Juwa gbeji giri-giri.” Ụka ká dọmwụ me nyori ọwa nyị la ọngịrị wẹwẹ, kịnyaa la ọ-yẹ abwọ hi iwe-ahụrụ ịlẹ kị ka kpang ka ẹpwụ nya ọmayẹ. (1 Kọr. 10:12) Kịnyaa la ọ-họ ang ịlẹ kị dang ụbwọ nyọka kụrụ ọdẹwụ-dẹwụ nyang ụka ọhẹ lẹ. Ụpwụ nya Etu 28:14 yẹkẹẹ: ‘Ọngọlẹ kọọ ju ihi nya iJihova ụka wuu ka chị ọkẹkẹnị.’—2 Pit. 3:14.

APYOBWUNA NYA ỊLỌHỊ O-GBE KỊNYAA

20-21. (a) Apyobwuna iyina ahị tị́ ka yé jaabwọ kahị wẹẹ gbe ịlọhị hi ọmayẹ kịnyaa? (b) Kori kahị kaa maga nyọka cheji ba hi ọmayẹ, ịyẹ iJihova à tị́ ka họ hahị? (2 Ala ịKọrịntị 4:7)

²⁰ Ahị jẹ́ myị̀myị̀ nyori ịlọhị o-gbe kịnyaa kaa ju apyobwuna hahị ụka wuu. Kori kahị họ ọhọbịrị, ahị ka yé “ịpyọ ọkpụkpụ ọlụka o-kpii” myị́, ma kori kahị hịhị ụ-ụgbẹyị ọlẹ ká iJihova tịtọ, ahị kaa yé ọkẹkẹnị ọlam ọlẹ kọ ka juwa pyịyọọ. (Hib. 11:25; Eje. 19:8) Ọ lịnyị chajị Ohe họhị kahị ka hịhị ba agbẹyị nyamwụ jẹ. (Ọmwụ. 1:27) Ọọwa du kahị ka la irya oleje ocheri-cheri bala ahị ọdahile nyọka hịhị gboyi myị́ oyi.—1 Tim. 6:12; 2 Tim. 1:3; Jud. 20, 21.

²¹ Ịlẹhị lẹ, ‘ugbinyịrọ la dẹwụ-dẹwụ.’ Ma ọọwa á ri áhị ka jẹ́-ẹ họ ẹlẹlẹhẹ u-uhye nya ọdẹwụ-dẹwụ nyahị ka lẹ ka. IJihova nwụlanọ nyọka ya ọngịrị ọlẹ kahị baba hahị. (Wa 2 Ala ịKọrịntị 4:7.) Ma, tị kpịtịya nyori, ọngịrị ọgụgụ ọtụka Ohe à kaa ya ha ọngịnyị lẹ. Ọngịrị ọlam-ọlam—kọ ri ọngịrị nya ịlọhị ọlẹ kahị kaa gba kpehe ẹnụ myị́ ẹnụ nyọka gbe ịlọhị hi ọmayẹ—ri ụkụrwọ nyahị kahị ka họ. Kori kahị họ ụpa nyahị, ahị ka jẹ́ myị̀myị̀ nyori iJihova ka wẹ abwọ ọlẹ kahị wẹẹ rị nyọka ya ọngịrị hahị gụ́ ọọwa ụka kahị baba nyamwụ. (1 Kọr. 10:13) Ee, bwula ụbwọ ọdada nya iJihova, ahị ka jẹ́-ẹ kịnyaa la o-gbe ịlọhị bwu ẹpwụ nya ọmayẹ.