Á wa egbeju nya ẹla ịla Ẹpwang ọ-Kụ Gbeji nya ẹka ọlẹ rige-rige lẹ? Aalẹ, yẹ kori á ka jụ́ ịtọ ẹla ileji ịlẹ wẹ myị́ wẹẹ:

Ịyẹ à tị́ ji ẹpwụ nya ọngịnyị ọ-ka la “ọ-nwụ ma nya ọkịlẹtụ”? (Rom. 12:2)

Ọ́ ba ọọ-ka họ ang ọnyịịla ẹ-ẹpwụ nya ọhịhị nyang ụka wuu kem ka. Ahị ọ-ka wụla ụma nya ọngịnyị ọlẹ kahị ri ẹ-ẹpwụ yẹ bala ọ-ka nwụ ọhịhị nyahị họ chajị kọ ka pwoku ehile nya Ohe Oluhye yẹẹyẹẹ, ji ẹpwụ nyamwụ ịnyịnyị.—w23.01, ẹbẹ 8-9.

Ányị ahị tị́ ka jẹ́-ẹ kụ irya kpakpa ụka kahị ja yẹ ang ịlẹ kị wẹẹ họ odehe?

Ọ kaa háahị nyọka jẹ́ jaabwọ ká ang ịlẹ kị wẹẹ họ odehe lẹẹlẹẹ wẹẹ họ ọmwụ ọyẹyẹ ịla ịBayịbụụ jịra. Ma, ọkọkọ nyọka kpa apwụ-apwụ chị ala, ọlẹ kọ ka kpa ojigi-jigi wẹ ẹpwụ nya ọjịra-jịra, ọ baba ká ẹla oyaya nyahị ka kpụnịrọ ẹla ịlẹ ká ogu nya iJihova gba kpehe u-uhye nya ẹla ọọwa. (1 Kọr. 1:10)—w23.02, ẹbẹ 16.

Ányị enyi Ohe ohuhu nya iJisọsị à tị́ datị hi ịnya angị kaa bọọ jẹ?

Ọwa á baba nyọka hu ịlọmwụ ju iJihova ụ-ụbwọ lala ahị ka, chajị ị mọọ ju ka ẹpwụma ọlẹ kọ ri ịnya iJihova ene-ene lẹ. IJisọsị ọwa la kpẹẹkpẹẹ, ọ́ tị họ ọhọbịrị ọhẹ-lọhẹ ka. Lẹ ọwa á baba nyọka yẹ irya da bwụ ọhọbịrị ka.—w23.03, ẹbẹ 5.

Ányị ahị tị́ ka da angịkịla ụbwọ kị ka jẹ́-ẹ wẹ ịtọ ẹla ọọjịra-jịra?

Ahị ka chị ẹla ọwẹwẹ nyahị kpii, du ká angịkịla ka la iwe wẹ ẹla. Áhị ka tụ ahị nya ẹla lụmẹ-lụmẹ ba ya ka ịnyịnyị. Ọ ka du ká ahị nya ẹla ịkịla ka hi ká angịkịla ka wẹ ela bwu.—w23.04, ẹbẹ 23.

Ịyẹ à tị́ ri ‘ụgbẹyị nya ịgọgọ ọlala’ ọlẹ ká Ayịsaya 35:8 ya ẹla rụ?

Họhẹ-họhẹ, ụgbẹyi ọtụka ọọwa ya ẹla rụ ụgbẹyị ọlẹ ká ala iJuu tụ da bwụ ịBabịlọn nyà wẹ ẹpwa nyaa. Ma lụka ọkpanjẹ tị bẹẹ? La ẹka ohu ịmanyị tị́ ju ka ẹka nya 1919, angịhyẹ dọmwụ nyọka nwụla ụgbẹyị ọwẹ nọ bwula ịBayịbụụ ọ-yẹda ka ìja ịkịla bala ọ-daa kpehe, bala ang ịkịla lụmẹ-lụmẹ. Angịnyị nya Ohe wẹẹ jẹdịyẹ ‘ụ-Ụgbẹyị nya Ịgọgọ Ọlala” ọwẹ ka ịparadayịsị nya olegu, ọlẹ kọ ka kpa ahị ọwawa nya Ịpyị-Adịrahụ nya Ohe waa.—w23.05, ẹbẹ 15-19.

Anyang imiiye iyina ụpwụ nya Etu egbeju 9 à tị́ kpa oja nyaa mẹ ang jẹẹhị?

Ụpwụ nya Etu ya ẹla ụ-ụhye “ọnyang oluchi” ọlẹ ká ọwụrụ-wụrụ nyamwụ kaa kpa ọngịnyị ka “ejegu” bala ọnyang ọlẹ kọ kụ ọmwakpa nya “ẹla ọjẹ́jẹ” ọlam-ọlam, ká ọwụrụ-wụrụ nyamwụ ọwa kaa kpa ọngịnyị wẹ “ọgụ nya ang ọjẹ́jẹ” bala ọhịhị. (Etu 9:1, 6, 13, 18)—w23.06, ẹbẹ 22-24.

Ányị ụgbẹyị ọlẹ ká iJihova họ ẹla ẹ-ẹga nya ịLọtụ à tị́ mẹjẹ nyori ọ kaa kpa ịlọmwụ keji bala ọ-kaa yẹ ẹla ẹkpe imiiye?

IJihova byi ịLọtụ nyị rụnyẹ hi ịSọdọm rụ ka oye nya ọgbọdọ mẹ. ỊLọtụ bịlẹ kị ka ya iwe da họọ nyọka ka iSowa ọkọkọ nya ụwa, Ohe tị́ myị họọ.—w23.07, ẹbẹ 21.

Ịyẹ ahụ à tị́ ka họ kori ka ọrụmwụ á kaa yẹ arụrụ nya ụya?

Ọ ka kpịtịya nyori abyị á ri nyamwụ ka. Ọkọkọ nya ọọwa, ọ ka ya irya nịrọ igu oriri nyamwụ bala iJihova bala ọ-kụ irya u-uhye nya oja nya anyang ịla ịBayịbụụ ịlẹ kị yé ẹjẹ ọkpụkpụ bwu ẹga nyamwụ. Ọ ka jẹ́-ẹ da ọrụmwụ ụbwọ nyọka cheji ba iwe-ahụrụ ọ-la uhi-uhi ọwẹ ịnyịnyị myị́.—w23.08, ẹbẹ 14-17.

Ụka kị dahị ịwẹẹ u-uhye nya ang ọlẹ kahị myị la, ányị ẹla ọjẹ́jẹ à tị́ ka dahị ụbwọ wẹ ẹla ụgbẹyị ọkpẹnẹẹ?

Ahị ka jẹ́-ẹ yẹ ịtọ ẹla lee ịwẹẹ odada ọọwa lala ụgbẹyị ọhẹ ọlẹ kahị ka kpa jẹ́ ang ọlẹ kọ ji irya nya ọngọọwa lee ẹla ọlẹ kọ baba họọ. Ọọwa ka du kahị ka jẹ́-ẹ wẹ ẹla ụ-ụgbẹyị ọkpẹnẹẹ.—w23.09, ẹbẹ 17.

Ẹlịyẹ ahị tị́ ka jẹ́ bwụ ẹga nya iMeri nyọlẹ kọ tịtọ nya ụbwọ ọdada nya angịkịla?

Nyọlẹ ká iMeri jẹ́ nyori ọwa nyị ka ri ịnịna nya iMesaya, ọ ye ọngịrị bwu ẹga nya angịkịla. IGebirẹlụ bala Elisabeti kpa ẹla ọla Ụpwụ Ịgọgọ ju iMeri ọhụ. Ahị ịnyịnyị ka jẹ́-ẹ ye ọngịrị bwu ẹga nya aanahị ịla ọjịra-jịra.—w23.10, ẹbẹ 15.

Ányị iJihova à tị́ ka wẹ abwọ ọrịrị nyahị myị́?

Ọ myọnụ nyọka ke ụrụ wo abwọ ọrịrị nyahị bala ọ-ka kụ ẹhị yẹ abwọlẹ kị gu irya nyamwụ. (Jer. 29:12) Ọ ka wẹ abwọ ọrịrị ụma ookpokpo a-agbẹyị ịdatị-datị myị́, ma ahị jẹ́ nyori ọ ka dahị ụbwọ ụka wuu.—w23.11, ẹbẹ 21-22.

Ụpwụ nya Ala iRom 5:2 ya ẹla u-uhye nya “ẹhị ọrịrịị-rịrị,” lẹ ịyẹ à tị́ dụ kị ya ẹla u-uhye nyamwụ myịmyị ọgba 4?

Ụka ká ọngịnyị á wo oja nya ẹrụ ọnyịịla, ọ ka la ẹhị ọrịrịị-rịrị nyọka yé ọhịhị ọla ịparadayịsị ọla odehe ọlẹ myị́. Ma jaabwọ kọ wẹẹ chịpwụrụ bwụ ẹpwụ nya akama ịdatị-datị, kọ tị bọhụ ẹ-ẹpwụ nyaa, bala ọ-yẹ nyori Ohe yoo myị, ẹhị ọrịrịị-rịrị nyamwụ kaa la ọngịrị gụ́ ọọwa bala ọ-lọọ gede-gede gụ olene.—w23.12, ẹbẹ 12-13.