1. Kori kahị kụ irya nya Ebiraham, ịtọ ẹla oyina ahị tị́ ka tọ myị́?

 ỊLẸHỊ lẹ angịnyị lụmẹ-lụmẹ kaa wo oja nya Ebiraham, ụmụmẹ nya angịnyị á tị jẹ́ ẹla u-uhye nyamwụ gbuu ka. Ma, ahụ tị jẹ́ ẹla u-uhye nya Ebiraham yẹẹyẹẹ. Ọ-chụ pwokwita, à jẹ́ ká ịBayịbụụ wụrụ Ebiraham nya “adịda nya angịlẹ kị . . . kpa ọkịlẹtụ nyaa wuu myị la Ohe Oluhye.” (Rom. 4:11) Ọhẹka à tị ka tọ wo myị́ nyori ‘M̀ ka jẹ́-ẹ dịrẹ ọgụ-ẹpẹtẹ nya Ebiraham bala ọ-ka la ọmyịmyị ụma nya ịnyamwụ wẹẹ?’ Ee, à ka họ ịnyị myị́.

2. Ịyẹ tị́ du kọ baba nyọka jẹ́ ang u-uhye nya oja nya Ebiraham? (IJemsi 2:22, 23)

² Ụgbẹyị ọhẹ ọlẹ kahị ka jẹ́-ẹ bwu la ọmyịmyị ụma nya Ebiraham ri ọ-ka jẹ́ ang u-uhye nya ọgụ-ẹpẹtẹ nyamwụ. Ebiraham kaa họ ẹla ọlẹ ká Ohe á byoo nyị họ. Ọ mwụ rụ hi epweji nyamwụ ka ẹga ọlụrụ-lụrụ, ọ kụ ẹpwụ nya ọdụ, bala ọ-nwụlanọ nyọka hu Ayịsiki ọnyị ọlịkẹjẹ nyamwụ kịliya. Ẹla ịwẹ mẹjẹ nyori ọ la ọmyịmyị ọnyọọngịrị. Ọmyịmyị ọlala nya Ebiraham bala ụkụrwọ ọlẹ kọ họ tọọ da du ká Ohe yọọ myị lala oligu nyamwụ. (Wa iJemsi 2:22, 23.) IJihova tịtọ kahị wuu—tụng ahụ ayịdang, ka yé ahị ọwawa ịlịnyị-ịnyị. Chajị nya ọọwa lẹ, ọ ya olegu nyamwụ ha ịPọlụ bala iPita kpụ ị ya ẹla rụ oja nya Ebiraham ẹ-ẹpwụ nya ịBayịbụụ. Ahị wẹẹ ka ya ẹla u-uhye nya oja nyamwụ jaabwọ kị gbọọ kpehe ụ-ụpwụ nya ala iRom egbeju 4 bala ịnya iJemsi egbeju 2. ỊPọlụ bala iJemsi ya ẹla ọkpọnchị ọhẹ u-uhye nya Ebiraham.

3. Ụpwụ ịgọgọ oyina ịPọlụ bala iJemsi à tị́ ya ẹla bwu?

³ ỊPọlụ bala iJemsi ya ẹla rụ ẹla ọla ụpwụ nya Ọmwụ Ọdada 15:6, ọlẹ kọ yẹkẹẹ: ‘Ebiraham kpa ọkịlẹtụ ookpokpo la ọmyịmyị ẹ-ẹga nya iJihova, Ohe Oluhye Ayịdang a tịtị wọọ nya ọngịnyị ọnyịịla ọ-ọla ọọwa lẹlẹ.’ IJihova kaa wụrụ ọngịnyị nyị ọngọ ọnyịịla lee ọngọ la abyị ka, kori kọ ọngọọwa á họ ẹla kpọọ ịpyọ. Ọ  ri ẹla ọkpịpyọ nya Ohe ọ-ka wụrụ ọngịnyị ehe ọ-la kpẹẹkpẹẹ ka ọlẹ kọ myị̀ la ịhọbịrị nya ọngọ la abyị ka! Ọ la gede-gede nyori ọ ka háng ká Ohe ka yẹng nya ọngọ la abyị ka ịnyịnyị, ọọwa tị ka chịkpẹẹ myị́. Nyọka jẹ́ ang ọlẹ kahị ka họ ká iJihova ka wụrụhị ọngịnyị ọnyịịla, ahị kụ ẹhị yẹ ang odudu ká iJihova wụrụ Ebiraham ọngịnyị ọnyịịla wẹẹ.

4. Ịyẹ à tị́ du ká angịnyị ehe á ri alabwẹla ọnyịịla lẹẹlẹẹ ka?

⁴ Ẹ-ẹpwụ nya ileta ọlẹ ká ịPọlụ da kịla ala iRom, o ya nyori angịnyị ehe wuu nyị ri alịhọbịrị. (Rom. 3:23) Lẹ ányị ọ tị́ bwu chịkpẹẹ du ká ẹla nyahị ka há Ohe kpụ kọ ka yẹhị nya ọngọ ọnyịịla bala ọngọ la abyị ka? Nyọka da Angịnyị nya ịKịrayịsị ịlẹ kị la ọkịlẹtụ ọnyịịla ụbwọ wẹ ịtọ ẹla ọwẹ, ịPọlụ kpa oja nya Ebiraham chụ kpịta.

5. Ịyẹ tị́ du ká iJihova wa Ebiraham nya ọlabwẹla ọnyịịla? (Ala iRom 4:2, 4)

⁵ IJihova wụrụ Ebiraham nya ọngịnyị ọnyịịla ụka kọ juwa ọ-ọpyị nya iKenan wẹẹ. Ịyẹ tị́ du ká iJihova jẹ́ wụrụ Ebiraham nya ọngịnyị ọnyịịla? Ebiraham kpa Ehile nya iMosisi kpẹẹkpẹẹ à du lẹ? Ịnyị kpong-kpong ka. (Rom. 4:13) Ọ kpoye nya ẹka 400 nyọlẹ ká Ohe wụrụ Ebiraham nya ọngịnyị ọnyịịla kpá ene ká Ohe ya Ehile ha ẹpwụma nya Isirẹlụ. Ịyẹ tị́ tịtị du ká Ohe wụrụ Ebiraham nya ọngịnyị ọnyịịla? IJihova mẹ ọnahị ọtụka nyamwụ jẹ à du kọ wụrụ Ebiraham ọngịnyị ọnyịịla ọọlajị nya ọmyịmyị nyamwụ lẹ.—Wa Ala iRom 4:2-4.

6. Ịyẹ tị́ du ká iJihova ka jẹ́-ẹ wụrụ alọhọbịrị nya alabwẹla ọnyịịla?

⁶ ỊPọlụ ya nyori ụka ká ọngịnyị nyị́ la ọmyịmyị ẹ-ẹga nya Ohe, ‘Ohe kaa kpa ọmyịmyị ọlala nya ọngọọwa wa ọngọọwa nya ọlabwẹla ọnyịịla.’ (Rom. 4:5) ỊPọlụ myịmyị yẹkẹẹ: “Ọlịnyị a du ká iDevidi ya ẹla rụ́ [ọkẹkẹnị] ọlẹ kọ ka ri ịnya ọng myị́ ọng ọlẹ ká Ohe Oluhye á wa nya ọlabwẹla ọnyịịla ị-ịlahị nya ịlọmwụ ụka ọlẹ ká ọngọọwa á họ ụkụrwọ ọhẹ-lọhẹ ene ka lẹ. Ẹla ọọwa a lẹẹ lẹ: ‘[Ọkẹkẹnị] juwa ha angịlẹ wuu ká Ohe Oluhye hịnyọhi ang inyibyi ịhọhọ nyaa wuu haa lẹ, bala angịlẹ ká Ohe Oluhye á kpa ahyẹẹrwẹrwa nyamwụ chị ang ke ibyi nya ịhọbịrị ịlẹ kị họ wuu ịnyịnyị lẹ. [Ọkẹkẹnị] ka juwa ha ọng myị́ ọng ọlẹ ká [iJihiova] á juwa da ịhọbịrị ọhọhọ nya ọngọọwa ju nọ gbe ẹnụtụrụ nya eje ohyẹẹkpẹ kaka, ịnyịnyị.’” (Rom. 4:6-8; Eje. 32:1, 2) Ohe kaa hịnyọhi lee ọ-hịlẹ ịhọbịrị nya angịlẹ kị la ọmyịmyị ẹ-ẹga nyamwụ. Ọ kaa hịnyọhi haa gbang-gbang la ọ-ka da ịhọbịrị nyaa ju kaka. Ọ ka yẹ angịlịnyị lala alabwẹla ịnyịịla ịlẹ kị la abyị ka.

7. Ịyẹ tị́ du kahị ka jẹ́-ẹ ya nyori angịlẹ kị gbịgba ha iJihova kpẹẹkpẹẹ lụka onyogo ri alabwẹla ọnyịịla?

⁷ Ịlẹhị lẹ Ohe wụrụ Ebiraham, iDevidi, bala angị la ọmyịmyị ịkịla nyị alabwẹla ọnyịịla, ma ọọwa á du kị la kpẹẹkpẹẹ ka. Ma chajị nya ọmyịmyị nyaa, Ohe yaa lala angị la abyị ka, ọgụgụ kori kị chwaa kaka pwoku angịlẹ kị la ọmyịmyị ẹ-ẹga nyamwụ ka. (Efe. 2:12) Jaabwọ ká ịPọlụ họ kọ la gede-gede ẹ-ẹpwụ nya ileta nyamwụ, ọmyịmyị ọlala ri ẹla ọkpọnchị ọlẹ kọ du ká ọngịnyị ka jẹ́-ẹ ri igu bala Ohe. Ọ lịnyị ẹ-ẹga nya Ebiraham bala iDevidi, ịnyịnyị ọ tị la ẹ-ẹga nyahị lẹ.

8-9. Ẹlịyẹ angịhyẹ à tị́ jẹ́ u-uhye nya ẹla ọlẹ ká ịPọlụ bala iJemsi da ka? Ịyẹ à tị́ du?

⁸ Ẹ-ẹpwụ nya ẹka ohu ịmanyị tị́, alegbeju nya ịgba ọgbagba kaa da ịwẹ u-uhye nya ọbaba nya ọmyịmyị ọlala bala apyobwuna nya ụkụrwọ ọhọhọ. Alegbeju ịhyẹ kaa mẹjẹ nyori ang ọlẹ ká ọngịnyị nyị baba nyọka họ wuu kọ ka jẹ́-ẹ chịda ri ọ-ka myị la iJisọsị ịKịrayịsị Ayịbaba. Ọhẹka à ka wo ká angịnyị kaa ya nyori: “Myị la iJisọsị mẹ, aalẹ à ka chịda lẹ.” Alegbeju ịhyẹ dọmwụ kaa ya nyori ịPọlụ nyị mẹ ẹla ọlịnyị jẹ nyọlẹ kọ ya ẹla nya angịlẹ ká “Ohe Oluhye á wa nya ọlabwẹla ọnyịịla ị-ịlahị nya ịlọmwụ ụka ọlẹ ká ọngọọwa  á họ ụkụrwọ ọhẹ-lọhẹ ene ka.” (Rom. 4:6) Ma, angịkịla tị kaa ya nyori ọngịnyị nyị ka chịda myị́ bwula ọ-ka ẹga ká ala ịchọọchị hu nya ẹga ọ-la ịgọgọ bala ọ-họ ang ọnyịịla ha angịkịla. Nyọka họ ká ẹla nyaa ọọwa ka me ẹlịlẹhị, ị kaa da ụbwọ ka ẹla ọlẹ ọlẹpwụ nya iJemsi 2:24 ọlẹ kọ ya nyori: “Abwẹla ọnyịịla ọhọhọ nya ọngịnyị ehe a kaa du ká Ohe Oluhye kaa kpa wa ọngọọwa nya ọlabwẹla ọnyịịla lẹ. Ọ-ọmyịmyị ọlala ọpapịla kem ka.”

⁹ Nyọlẹ ká ịPọlụ bala iJemsi ya ẹla ọdatị hi awụlẹ wẹẹ, alegbeju nya ịgba ọgbagba ịhyẹ kaa ya nyori angịmiiye ịwẹ nyị́ myị ju awụlẹ u-uhye nya ẹla nya ọmyịmyị ọlala bala ụkụrwọ ọhọhọ ka. Alegbeju ịwẹ ka ya myị́ nyori ịPọlụ ọwa nyị myị nyori Ohe ka jẹ́-ẹ wa ọngịnyị nya ọlabwẹla ọnyịịla la ọ-họ ụkụrwọ ene ka, ma iJemsi ọwa tị mẹjẹ nyori ụkụrwọ ọhọhọ nyị baba ene ká Ohe ka jẹ́-ẹ ye ọngịnyị myị. Ọlẹng ọhẹ kọ jẹ́ ang yẹẹyẹẹ u-uhye nya ịgba ọgbagba ya ẹla ọọwa ị-ịlẹ: “IJemsi á jẹ́ ẹla ọlẹ ká ịPọlụ kpa i-irya du kọ ya ọnụ rịrị nyori Ohe nyị ka jẹ́-ẹ wa ọngịnyị nya ọlabwẹla ọnyịịla bwula ọmyịmyị ọlala la ọ-họ ụkụrwọ ene ka lẹ ka.” Ma iJihova à tị kpa ịPọlụ bala iPita angịmịịyẹ da ẹlẹwẹ lẹ. (2 Tim. 3:16) Lẹ ụgbẹyị ọchịkpẹẹ ọhẹ ka ji pyii nyọka jẹ́-ẹ pwọ ẹlẹwẹ kụ awụlẹ. Ụgbẹyị ọọwa ri ọ-ka wụlẹ iwe-ahụrụ ọlẹ kị kpa ya ẹla ọọwa yẹ.

10. “Ụkụrwọ ọhọhọ” ọlanyị ịPọlụ à tị́ ya ẹla rụ kpangga? (Ala iRom 3:21, 28) (Yẹ ifoto ịnyịnyị.)

¹⁰ Ịyẹ à tị́ ri “ụkụrwọ” ọlẹ ká ịPọlụ wẹẹ ya ẹla rụ ụ-ụpwụ nya ala iRom 3 bala 4? Ọ wẹẹ ya ẹla kpangga u-uhye nya “ụkụrwọ nya ehile ọhọhọ,” kọ ri ehile nya iMosisi ọlẹ kị ya ha ala Isirẹlụ ọ-Ọgboọdọ nya ịSayịnayị ịnyị. (Wa Ala iRom 3:21, 28.) Ọ lala o-ri nyị la Angịnyị nya ịKịrayịsị ịla iJuu ịhyẹ ujwo lụka nya ịPọlụ nyọka myị nyori Ehile nya iMosisi bala ụkụrwọ ịlẹ ká Ehile ọọwa wa cheeji nyị chịpwụrụ lẹ. Lẹ ịPọlụ kpa oja nya Ebiraham mẹjẹ nyori “ụkụrwọ nya ehile ọhọhọ”  à du ká Ohe kaa ye ọngịnyị myị ka. Ọmyịmyị ọlala à kaa du lẹ. Ọwẹ ri ọhụ ojuju hahị chajị ọ-jẹ́ ịnyị ya ọhụ ọdapịlẹ hahị nyori igu o-ri bala Ohe ri ang ọlẹ kahị ka ju họ myị́. Ọ mẹjẹ nyori ahị ka jẹ́-ẹ la ọmyịmyị ẹ-ẹga nya Ohe bala ịKịrayịsị, ọọwa à tị du ká Ohe kaa ye ọngịnyị myị lẹ.

11. “Ụkụrwọ ọhọhọ” oyina iJemsi à tị́ ya ẹla rụ?

¹¹ Ma, ụkụrwọ ịlẹ kị ya ẹla rụ ụ-ụpwụ nya iJemsi egbeju 2 datị hi “ụkụrwọ nya ehile ọhọhọ” ọlẹ ká ịPọlụ ya ẹla rụ. IJemsi wẹẹ ya ẹla rụ akụrwọ ịlẹ ká Angịnyị nya ịKịrayịsị kaa họ ahyẹẹnụ ọnyị myị́ ọnyị ẹ-ẹpwụ nya ọhịhị. Akụrwọ ịlịnyị à kaa mẹjẹ kori ká ọngịnyị á la ọmyịmyị ọlam lee kori kọ la ka lẹ. Kụ ẹhị yẹ ọ-chụ pwokwita imiiye ịlẹ ká iJemsi ya ẹla rụ lẹẹ.

12. Ányị iJemsi à tị́ ya ká ọmyịmyị ọlala bala ụkụrwọ ọhọhọ da ori wu awụlẹ? (Yẹ ifoto ịnyịnyị.)

¹² Ẹ-ẹpwụ nya ọ-chụ pwokwita ọhọhẹ, iJemsi ya ẹla u-uhye nya ọbaba nya Angịnyị nya ịKịrayịsị ọ-ka họ ẹla oye-oye ẹ-ẹga nya angịkịla ka. Ọ chụ ẹlẹwẹ pwokwita bwula oja nya ọlẹng ọlẹ kọ chị ihi ju ọngọ kpụdụ ma kọ tị hu ẹpẹpẹ ju ọngọ ri okpeyika. IJemsi ya nyori ọngịnyị ọlịnyị ka me nyori ọ la ọmyịmyị, ma ụkụrwọ ọyina à tị́ mẹ ọmyịmyị nyamwụ ọọwa jẹ? (Jem. 2:1-5, 9) Ẹ-ẹpwụ nya ọ-chụ pwokwita oheeye, iJemsi ya ẹla nya ọngọhẹ ọlẹ kọ yẹ ‘ọnyịnamwụ ọlẹng lee ọnyang ọlẹ kọ la ang ọkụrụ-kụrụ lee ang oriri ka’ ma kọ tị dọọ ụbwọ ụ-ụgbẹyị ọlẹ kọ baba ka. Kori ká ọngọọwa á ya ọwa nyị la ọmyịmyị wẹwẹ aalẹ, ọhọhọ nyamwụ á mẹjẹ nyori ọ la ọmyịmyị ka. Jaabwọ ká iJemsi ya, “ọmyịmyị ọlala ọlẹ kọ kaa kpa ụkụrwọ ọnyịịla ọhọhọ chị ịlọmwụ ehe ka aalẹ, uguru nya ọmyịmyị ọlala, o ri lẹ.”—Jem. 2:14-17.

13. Ọ-chụ pwokwita oyina iJemsi à tị́ kpa ya ẹla nyọka mẹjẹ nyori ahị baba nya ọmyịmyị ọlala bala ụkụrwọ ọnyịịla ọhọhọ? (IJemsi 2:25, 26)

¹³ IJemsi ya ẹla rụ iRehabụ nya ọ-chụ pwokwita  nya ọngịnyị ọlẹ ká abwẹla nyamwụ mẹjẹ nyori ọ la ọmyịmyị. (Wa iJemsi 2:25, 26.) O wo oja u-uhye nya iJihova du kọ jẹ́ nyori ọ kaa da ala Isirẹlụ ụbwọ. (Joch. 2:9-11) Ẹla ọlẹ kọ họ mẹjẹ nyori ọ la ọmyịmyị. Ọmyịmyị ọlala nyamwụ à du kọ chị ewu ke angịmiiye nya ala Isirẹlụ ịlẹ kị du ka wụlẹ epweji nyaa yẹ lẹ. Chajị nya ọọwa, Ohe wa ọnyang ọwẹ nya ọngọ la abwẹla ọnyịịla jaabwọ kọ wa Ebiraham, nanana nyori ọ́ la kpẹẹkpẹẹ ka bala o-ri ala Isirẹlụ ka. Ọgụ-ẹpẹtẹ ọlẹ kọ ya deeji mẹjẹ nyori ọngịnyị baba nyọka họ ụkụrwọ tụ ọmyịmyị da.

14. Ịyẹ tị́ du kahị ka jẹ́-ẹ ya nyori ẹla nya ịPọlụ bala iJemsi á chị awụlẹ ẹta ọna ka?

¹⁴ Lẹ ịPọlụ bala iJemsi wẹẹ ya ẹla u-uhye nya ọmyịmyị ọlala bala ụkụrwọ ọhọhọ ụ-ụgbẹyị ọdatị-datị ịnyị. ỊPọlụ wẹẹ byi ala iJuu ịlẹ kị ri Angịnyị nya ịKịrayịsị nyori ị́ ka jẹ́-ẹ họ ẹla kpụ iJihova ịpyọ bwula Ehile nya iMosisi ọ-kpakpa ị-ịwẹ kem ka, iJemsi ọwa tị wẹẹ ya ẹla u-uhye nya ọbaba nya Angịnyị nya ịKịrayịsị ọ-ka chị ọmyịmyị nyaa ehe bwula ọ-họ ang ọnyịịla ha angịkịla.

15. Akụrwọ ịlanyị ahị tị́ ka họ nyọka mẹjẹ nyori ahị la ọmyịmyị? (Yẹ ifoto ịnyịnyị.)

¹⁵ IJihova á ya nyori ahị ka họ ang ịlẹ ká Ebiraham họ kpangga ene kọ ka wahị nya alabwẹla ọnyịịla ka. Ẹlịlẹhị ri, agbẹyị lụmẹ-lụmẹ ji kahị ka jẹ́-ẹ mẹjẹ nyori ahị la ọmyịmyị bwula ụkụrwọ ọhọhọ. Ahị ka jẹ́-ẹ da angịnyeewe ọwụraba ẹ-ẹpwụ ọjịra-jịra, da aanahị alẹng bala anyang ụbwọ ụka kị la ọbaba, bala ọ-họ ang ọnyịịla ha alugbiyegu nyahị. Ọọwa ka du ká iJihova ka yehị myị bala ọ-wahị kụrụhị. (Rom. 15:7; 1 Tim. 5:4, 8; 1 Jọn. 3:18) Ụkụrwọ ọhẹ ọlẹ kọ kaa mẹjẹ gụgụụgụ nyori ahị la ọmyịmyị ri ẹrụ ọnyịịla ọ-kpa pyẹ je angịkịla la ila ọchịchị. (1 Tim. 4:16) Ahị wuu ka jẹ́-ẹ mẹjẹ bwula ọhọhọ nyahị nyori ahị la ọmyịmyị nyori ang ịlẹ wuu ká iJihova chehe ka họ jịra bala o-ri agbẹyị nyamwụ à há gụ́  lẹ. Kori kahị họ ịnyị, ahị ka jẹ́ myị̀myị̀ nyori Ohe ka wahị nya alabwẹla ọnyịịla bala ọ-wụrụhị aligu nyamwụ.

16. Ịyẹ Ebiraham à tị́ ya ẹhị rịrị gbe kọ tị la ọmyịmyị u-uhye nyamwụ ịnyịnyị?

¹⁶ Ụpwụ nya ala iRom egbeju 4 ya ẹla ọkpọnchị ọkịla ọlẹ kahị ka jẹ́ bwu ẹga nya Ebiraham. Ẹla ọọwa ri ọbaba nyọka godayị gbe ọ-họ jịra nya ẹhị ọrịrịị-rịrị nyahị. IJihova myọnụ nyori ọwa nyị ka wahị kụrụ “alodehe ọlẹ wuu,” lee ẹpwụma lụmẹ-lụmẹ, bwula Ebiraham. Ọwẹ ri ahị ọwawa lụmẹ-lụmẹ ịlẹ ká Ebiraham ka ya ẹhị rịrị gbe! (Ọmwụ. 12:3; 15:5; 17:4; Rom. 4:17) Ma, ụka ká Ebiraham gu ẹka 100 ká iSera gu ẹka 90 lẹ, ị́ ma ọnyị ọlẹ ká Ohe myọnụ lẹka. Ẹ-ẹhị nya ọngịnyị ehe lẹ, ọ lala o-ri nyị́ ka chịkpẹẹ ha Ebiraham bala iSera ị ka ma ọnyị myị́ kaka. Ẹlẹwẹ ka ma ọmyịmyị nya Ebiraham yẹ yẹẹyẹẹ. Kpọkpọọkpọ Ebiraham la ẹhị ọrịrịị-rịrị nyori ọ ka “ri adịda nya epwoja lụmẹ-lụmẹ.” (Rom. 4:18, 19) Nyọlẹ kọ nọ chẹẹ, Ebiraham tị yẹ ang ọlẹ kọ ya ẹhị rịrị gbe ịnyịlẹhị. Ọ wẹ ka ri adịda nya Ayịsiki, kọ ri ọnyị ọlẹ kọ ya ẹhị rịrị gbe lụka ọtata.—Rom. 4:20-22.

17. Ịyẹ tị́ du kahị jẹ́ nyori Ohe ka jẹ́-ẹ wahị nya alabwẹla ọnyịịla bala ọ-yẹhị nya aligu nyamwụ?

¹⁷ Ohe ka jẹ́-ẹ yehị myị bala ọ-wahị nya alabwẹla ọnyịịla kpụ ahị ka ri aligu nyamwụ, jaabwọ kọ la ẹ-ẹga nya Ebiraham. ỊPọlụ ya ẹla rụ ẹla ọọwa ụka kọ da ụpwụ nyori: “Egbe nya ala ịlẹ kị ya wẹ yẹkẹẹ, ‘Ohe Oluhye wọọ lala ọlabwẹla ọnyịịla ị-ịlahị nya ịlọmwụ wẹ lẹ,’ ị́ dọọ kpehe, chajị nya Ebiraham ụbwọọmwụ kem ka. Ma, ẹla ọọwa juwa hahị ahị aloyi ọlẹ ịnyịnyị! Chajị, ahị angịlẹ wuu kahị myị la Ohe Oluhye Ọngọ wule iJisọsị ịKịrayịsị Ọngọlahị eji bwula igu, lẹẹ wuu lẹ, Ohe Oluhye ka wahị lala alabwẹla ọnyịịla ị-ịlahị nya ịlọmwụ ịnyịnyị!” (Rom. 4:23, 24) Lala Ebiraham, ahị baba nyọka la ọmyịmyị, họ ụkụrwọ ọnyịịla, bala ọ-ka dahịhile nyori ang ịlẹ ká Ohe chehe wuu ka họ jịra. ỊPọlụ kịnyaa la ọ-ka ya ẹla u-uhye nya ẹhị ọrịrịị-rịrị nyahị ụ-ụpwụ nya ala iRom egbeju 5. Ahị ka ya ẹla u-uhye nyamwụ ẹ-ẹpwụ nya ang ọjẹ́jẹ ọkịla.